చీరలో స్లిమ్ లుక్ రావాలంటే… ఈ చిన్న టిప్స్ పాటించండి!

చీర కట్టుకున్నప్పుడు మరింత పొడవుగా, స్లిమ్‌గా కనిపించాలని చాలామంది మహిళలు కోరుకుంటారు. ఇందుకోసం ఖరీదైన చీరలు కొనాల్సిన అవసరం లేదు. మన దగ్గర ఉన్న చీరను ఎలా కడుతున్నాం, దానికి ఎలాంటి జాకెట్‌ వేసుకుంటున్నాం, మడతలు ఎలా అమర్చుతున్నాం అనే చిన్న విషయాలే మొత్తం లుక్‌ను మార్చేస్తాయి. ముఖ్యంగా శరీరాన్ని బిగించి ఇబ్బంది పెట్టే దుస్తుల కంటే సహజంగా సౌకర్యంగా ఉండే స్టైలింగ్‌నే ఎంచుకోవాలి.

ఫ్యాబ్రిక్ మడతలపై శ్రద్ధ

మొదట చీర మెటీరియల్‌ విషయంలో జాగ్రత్త అవసరం. శరీరంపై ఎక్కువగా స్టిఫ్ గా ఉండకుండా సాఫీగా ఫ్లోయింగ్ ఫాబ్రిక్ అయిన జార్జెట్‌, క్రేప్‌, షిఫాన్‌, మెత్తని సిల్క్‌ వంటి వస్త్రాలు చక్కటి ఆకృతిని ఇవ్వగలవు. అయితే ప్రతి ఒక్కరికీ ఒకే ఫ్యాబ్రిక్‌ సరిపోదు. మీ శరీరాకృతికి, సందర్భానికి సరిపోయే వస్త్రాన్ని ఎంచుకోవడమే ముఖ్యం. మరీ గట్టిగా ఉండే లేదా ఎక్కువ వాల్యూమ్‌ ఇచ్చే వస్త్రాలు కొన్నిసార్లు ఆకృతిని వెడల్పుగా చూపించవచ్చు.

చీర కట్టేటప్పుడు ముందు భాగంలోని మడతలకు ప్రత్యేక శ్రద్ధ పెట్టాలి. మడతలు ఒకే వెడల్పులో, సమంగా ఉండేలా చూసుకుంటే నడుము దగ్గర అనవసరమైన బల్క్‌ కనిపించదు. ఎక్కువ వస్త్రాన్ని ఒకచోట టక్ చేయకుండా చక్కగా అమర్చడం వల్ల శరీరంపై నిలువు ఆకారం ఏర్పడుతుంది. మడతలు సరిగా ఉండటమే కాకుండా వాటిని సరైన స్థాయిలో టక్‌ చేయడం కూడా లుక్‌పై ప్రభావం చూపుతుంది.

పల్లు.. జాకెట్ ఫిట్టింగ్ కీలకం

పల్లు విషయంలో కూడా కొంత మార్పు చేయవచ్చు. భుజంపై వేసిన పల్లు చాలా వెడల్పుగా విస్తరించకుండా క్రమంగా అమర్చితే పైభాగం సన్నగా కనిపిస్తుంది. పల్లు నిలువుగా లేదా స్వల్పంగా వంపుతో పడేలా చేస్తే చూపు పై నుంచి కిందికి వెళ్లేలా చేసి పొడవైన ఆకృతి కనిపించేలా చేయవచ్చు.

జాకెట్‌ ఫిట్టింగ్‌ చీర లుక్‌లో కీలకమైన భాగం. మరీ బిగుతైన జాకెట్‌ శరీరంపై ఒత్తిడిని చూపించవచ్చు. అదే సమయంలో చాలా వదులుగా ఉన్నది ఆకృతిని స్పష్టంగా చూపించదు. భుజాలు, చేతులు, ఛాతీ దగ్గర సరైన కొలతతో కుట్టించిన జాకెట్‌ చీరను మరింత అందంగా చూపిస్తుంది. మెడ డిజైన్‌ను కూడా మీ శరీరాకృతికి అనుగుణంగా ఎంచుకోవచ్చు. వీ-నెక్‌ వంటి నిలువు ఆకారాలు పైభాగాన్ని కొంత పొడవుగా చూపించే అవకాశం ఉంటుంది.

రంగులు యాక్సెసరీస్ ఎంపిక ముఖ్యం

చీర రంగు విషయంలో నలుపు లేదా ముదురు రంగులకే పరిమితం కావాల్సిన అవసరం లేదు. నేవీ బ్లూ, మరూన్‌, డీప్‌ గ్రీన్‌, పర్పుల్‌ వంటి గాఢమైన షేడ్స్‌ ఒకే టోన్‌లో ఉంటే పొడవైన లుక్‌ ఇవ్వవచ్చు. అలాగే నిలువు గీతలు, సన్నని బోర్డర్లు లేదా ఎక్కువగా విస్తరించని డిజైన్లు కూడా ఆకృతిని క్రమబద్ధంగా చూపించగలవు.

చీర కట్టుకునే ముందు పాదరక్షలను కూడా నిర్ణయించుకోవడం మంచిది. హీల్స్‌ లేదా కొద్దిగా ఎత్తున్న చెప్పులు వేసుకుంటే చీర పొడవును వాటికి తగ్గట్టుగా సర్దుకోవచ్చు. దీంతో కాళ్ల దగ్గర అదనపు వస్త్రం పేరుకుపోకుండా ఉంటుంది.

చివరగా ఆభరణాలు, బ్యాగ్‌, హెయిర్‌స్టైల్‌ విషయంలో అతిగా అలంకరణ చేయకుండా సమతూకం పాటించాలి. ఒకటి లేదా రెండు స్టేట్‌మెంట్‌ యాక్సెసరీస్‌ చాలు. ముఖ్యంగా చీరలో అందంగా కనిపించాలి అంటే మనకు సరిపోయే డ్రేపింగ్‌, సరైన ఫిట్టింగ్‌, సహజమైన ఆత్మవిశ్వాసం కలిపి ఉండటం ముఖ్యం.