Assam: కాంగ్రెస్పై మోదీ నిప్పులు.. యుద్ధం పేరుతో ప్రజలను భయపెడుతున్నారంటూ మండిపాటు!
- Published By: Vishal
- March 14, 2026 / 02:58 PM IST
PM Narendra Modi: అస్సాం అసెంబ్లీ ఎన్నికల ప్రచారంలో భాగంగా శనివారం సిల్చార్లో నిర్వహించిన బహిరంగ సభలో ప్రధాని నరేంద్ర మోదీ కాంగ్రెస్ పార్టీపై తీవ్రస్థాయిలో విమర్శలు గుప్పించారు. పశ్చిమాసియా యుద్ధం వంటి అంతర్జాతీయ అంశాలను వాడుకుని భారతీయుల్లో భయాందోళనలు రేకెత్తించేందుకు విపక్షం ప్రయత్నిస్తోందని ఆయన ఆరోపించారు.
భద్రతపై భరోసా – విపక్షంపై విమర్శ:
యుద్ధం కారణంగా దేశ పౌరులపై ఎటువంటి ప్రతికూల ప్రభావం పడకుండా కేంద్ర ప్రభుత్వం అన్ని జాగ్రత్తలు తీసుకుంటోందని ప్రధాని స్పష్టం చేశారు. “ఇలాంటి కీలక సమయంలో బాధ్యతాయుతంగా ఉండాల్సిన కాంగ్రెస్, జాతీయ ప్రయోజనాల విషయంలో మరోసారి విఫలమైంది. ప్రజల్లో భయాందోళనలు సృష్టించి నన్ను వేధించాలని చూస్తున్నారు” అని మోదీ మండిపడ్డారు. భారతదేశం సాధిస్తున్న అభివృద్ధిని సహించలేని శక్తుల చేతుల్లో కాంగ్రెస్ కీలుబొమ్మగా మారిందని ఆయన ఆరోపించారు.
ఢిల్లీ ఘటనపై స్పందన:
ఇటీవల ఢిల్లీలో జరిగిన ‘ఏఐ ఇంపాక్ట్ సమిట్’లో యూత్ కాంగ్రెస్ నేతలు చొక్కాలు విప్పి నిరసన తెలపడంపై ప్రధాని ఘాటుగా స్పందించారు. ఓటమితో నిరాశ చెందిన కాంగ్రెస్ నేతలు ఇప్పుడు ఏకంగా దేశంపైనే దాడికి దిగుతున్నారని విమర్శించారు. నిరాశ ముదిరిపోయి దుస్తులు చింపుకోవడం తప్ప ఆ పార్టీకి మరేమీ మిగల్లేదని ఆయన ఎద్దేవా చేశారు.
అస్సాం తీర్పుపై వ్యాఖ్యలు:
అస్సాం ప్రజలు ఇప్పటికే కాంగ్రెస్ను రాష్ట్రం నుండి తరిమికొట్టారని, రాబోయే ఎన్నికల్లో దేశంలోని ప్రతి రాష్ట్రం ఆ పార్టీకి తగిన గుణపాఠం చెబుతుందని ప్రధాని ధీమా వ్యక్తం చేశారు.
