ఎవరెస్ట్ మారథాన్ను విజయవంతంగా పూర్తి చేసిన తానా బోర్డ్ చైర్మన్ డా.నాగేంద్ర శ్రీనివాస్
- Published By: Vishal
- June 1, 2026 / 12:11 AM IST
ఉత్తర అమెరికా తెలుగు సంఘం (TANA) బోర్డ్ చైర్మన్, ప్రముఖ వైద్య నిపుణులు డా.నాగేంద్ర శ్రీనివాస్ కొడాలి అంతర్జాతీయ స్థాయిలో మరో అరుదైన మైలురాయిని అధిగమించారు. ప్రపంచంలోనే అత్యంత కఠినమైనదిగా, ఎంతో విపత్కరమైనదిగా గుర్తింపు పొందిన టెన్జింగ్-హిల్లరీ ఎవరెస్ట్ మారథాన్ను ఆయన విజయవంతంగా పూర్తి చేశారు. గ్లోబల్ వేదికపై తెలుగు వారి పట్టుదలను, సాహస పటిమను చాటిచెప్పిన ఆయనపై ప్రపంచవ్యాప్తంగా ఉన్న ఎన్నారై సమాజంతో పాటు తెలుగు రాష్ట్రాల ప్రముఖులు ప్రశంసల జల్లు కురిపిస్తున్నారు.
మంచు కొండల్లో…
ఏటా ఎవరెస్ట్ బేస్ క్యాంప్ పరిసర ప్రాంతాలలో అత్యంత ప్రతిష్టాత్మకంగా నిర్వహించే ఈ మారథాన్, ప్రపంచంలోనే అత్యంత ఎత్తైన ప్రదేశంలో జరిగే రన్నింగ్ ఈవెంట్గా రికార్డుకెక్కింది. సముద్ర మట్టానికి దాదాపు 5,364 మీటర్ల ఎత్తులో, ఆక్సిజన్ స్థాయిలు చాలా తక్కువగా ఉండే చోట ఈ రేసు సాగుతుంది. మైనస్ డిగ్రీల తీవ్రమైన చలి, గడ్డకట్టే మంచు కొండలు, ప్రమాదకరమైన ఘాట్ రోడ్లు వంటి కఠిన వాతావరణ పరిస్థితులను తట్టుకుని, ప్రాణాలను పణంగా పెట్టి డా.నాగేంద్ర శ్రీనివాస్ కొడాలి ఈ రేసును పూర్తి చేయడం ఆయన సంకల్పానికి, శారీరక సామర్థ్యానికి నిదర్శనంగా నిలిచింది.
‘తానా విశ్వ గురుకులం’ కోసం ప్రత్యేక యాత్ర
పురాణ ఇతిహాసాల ఆధారంగా రూపొందించిన ‘తానా విశ్వ గురుకులం’ అనే సరికొత్త విద్యా బోధనా పద్ధతిని ప్రపంచవ్యాప్తంగా ఉన్న తెలుగు వారికి, ముఖ్యంగా అమెరికాలోని ప్రవాసాంధ్రులకు పరిచయం చేయడమే ఈ యాత్ర వెనుక ఉన్న ప్రధాన ఉద్దేశం. తానా సంస్థ ఆశయాలను, సిద్ధాంతాలను దాని వ్యవస్థాపక లక్ష్యాలను సమాజంలోకి బలంగా తీసుకువెళ్లేందుకే డా.నాగేంద్ర శ్రీనివాస్ ఇలాంటి అత్యంత కష్టతరమైన సాహసాన్ని ఎంచుకున్నట్లు స్పష్టమవుతోంది.
పర్వతారోహణలోనూ అగ్రగామి
డా. నాగేంద్ర శ్రీనివాస్ కొడాలి కేవలం రన్నర్ మాత్రమే కాకుండా గొప్ప పర్వతారోహకుడిగానూ రాణిస్తున్నారు. ప్రపంచంలోని ఏడు అత్యున్నత శిఖరాల (Seven Summits) జాబితాలో ఇప్పటికే మూడు ప్రధాన పర్వతాలను ఆయన విజయవంతంగా అధిరోహించడం విశేషం.
- ఇండోనేషియాలోని కార్స్టెన్స్ పిరమిడ్ శిఖరాన్ని విజయవంతంగా అధిరోహించారు.
- రష్యాలోని అత్యున్నత పర్వతం మౌంట్ ఎల్బ్రస్ పై అడుగుపెట్టారు.
- టాంజానియాలోని మౌంట్ కిలిమంజారో శిఖరాన్ని సైతం అధిరోహించారు.
2027 తానా స్వర్ణోత్సవాలకు పిలుపు
సాహస ప్రవృత్తి, సామాజిక సేవాభావం కలిగిన డా.నాగేంద్ర శ్రీనివాస్ సాధించిన ఈ అంతర్జాతీయ ఘనత యువతకు ఎంతగానో స్ఫూర్తినిస్తోందని ప్రముఖులు కొనియాడారు. ఈ విజయం తర్వాత ఆయన మాట్లాడుతూ… తానా నిర్వహిస్తున్న వివిధ సేవా కార్యక్రమాలను ప్రతి ఒక్కరూ ఆదరించాలని కోరారు. అదేవిధంగా, 2027లో డా.నరేన్ కొడాలి గారి అధ్యక్షతన అత్యంత ప్రతిష్టాత్మకంగా జరగబోయే తానా స్వర్ణోత్సవాలను (TANA Golden Jubilee) గ్రాండ్గా నిర్వహించేందుకు, ఆ వేడుకలను విజయవంతం చేసేందుకు ప్రపంచవ్యాప్తంగా ఉన్న తెలుగు వారందరూ తమ సహాయ సహకారాలు అందిస్తూ భాగస్వాములు కావాలని ఈ సందర్భంగా డా.నాగేంద్ర శ్రీనివాస్ కొడాలి పిలుపునిచ్చారు.
