యంగ్ టైగర్ ఎన్టీఆర్ ‘డ్రాగన్’లో దర్శన రాజేంద్రన్ ఎంట్రీ

డ్రాగన్(Dragon) సినిమాపై ఇప్పటికే భారీ అంచనాలు నెలకొన్న వేళ, ఇప్పుడు మరో ఆసక్తికర అంశం ఇండస్ట్రీ వర్గాల్లో చర్చనీయాంశంగా మారింది. యంగ్ టైగర్ ఎన్టీఆర్(NTR), ప్రశాంత్ నీల్(Prasanth Neel) కాంబినేషన్‌లో తెరకెక్కుతున్న ఈ పాన్ ఇండియా ప్రాజెక్ట్‌లో మలయాళ నటి దర్శన రాజేంద్రన్(Darsana Rajendran) కీలక పాత్రలో కనిపించనున్నట్లు ప్రచారం జరుగుతోంది. సహజమైన నటనకు పేరుగాంచిన దర్శన, కథలో భావోద్వేగాలకు బలమైన పునాది వేసే పాత్రను పోషిస్తున్నారని సమాచారం. ఇప్పటికే బాలీవుడ్ నటుడు అనిల్ కపూర్(Anil Kapoor) కూడా ఈ సినిమాలో భాగమవడంతో దేశవ్యాప్తంగా సినిమాకు మంచి రీచ్ లభిస్తుండగా, ఇప్పుడు మ‌ల్లూవుడ్ నుంచి మరో ప్రముఖ నటి చేరడం ప్రాజెక్ట్‌కు అదనపు బలం చేకూర్చే అంశంగా మారింది.

ఇక ఈ కథలో ఫ్లాష్‌బ్యాక్ ఎపిసోడ్‌కు అత్యంత ప్రాధాన్యం ఉన్నట్లు తెలుస్తోంది. ఎన్టీఆర్ పాత్ర గతాన్ని, అతని జీవితంలో చోటుచేసుకున్న కీలక మలుపులను ఈ భాగంలో చూపించనున్నారట. ఈ నేపథ్యంలో దర్శన పాత్ర కథనాన్ని ముందుకు నడిపే ప్రధాన పాత్రల్లో ఒకటిగా ఉండొచ్చనే టాక్ వినిపిస్తోంది. ముఖ్యంగా ప్రశాంత్ నీల్ తన గత సినిమాల‌కు భిన్నంగా ఈ ఎపిసోడ్‌ను మరింత రంగులమయంగా, భావోద్వేగభరితంగా తీర్చిదిద్దుతున్నారని సినీ వర్గాలు చెబుతున్నాయి. దీంతో యాక్షన్‌తో పాటు ఎమోషన్ కూడా డ్రాగన్‌కు ప్రధాన ఆకర్షణగా మారే అవకాశాలు కనిపిస్తున్నాయి.

పాన్ ఇండియా మార్కెట్‌ను దృష్టిలో పెట్టుకుని రూపొందుతున్న ఈ సినిమాలో వివిధ భాషలకు చెందిన నటీనటులను ఎంపిక చేయడం వ్యూహాత్మక నిర్ణయంగా భావిస్తున్నారు. అనిల్ కపూర్ ద్వారా హిందీ మార్కెట్‌లో, దర్శన రాజేంద్రన్ ద్వారా కేరళ ప్రేక్షకుల్లో సినిమాపై ఆసక్తి మరింత పెరిగే అవకాశం ఉందని ట్రేడ్ వర్గాలు అంచనా వేస్తున్నాయి. మైత్రీ మూవీ మేకర్స్(Mythri movie Makers), ఎన్టీఆర్ ఆర్ట్స్(NTR Arts) సంయుక్తంగా నిర్మిస్తున్న ఈ సినిమాకు రవి బస్రూర్(Ravi Basrur) సంగీతం అందిస్తున్నారు. ప్రస్తుతం బయటకు వస్తున్న సమాచారం ప్రకారం చూస్తే, డ్రాగన్ కేవలం భారీ యాక్షన్ సినిమాగా మాత్రమే కాకుండా బలమైన భావోద్వేగాలతో కూడిన కథగా కూడా ప్రేక్షకుల ముందుకు రానున్నట్లు సంకేతాలు కనిపిస్తున్నాయి.