Kalyan Chaubey: ఏఐఎఫ్ఎఫ్ చీఫ్ కల్యాణ్ చౌబేపై సంచలన వేధింపుల ఆరోపణలు!
- Published By: Phanindra
- April 2, 2026 / 06:50 AM IST
భారత ఫుట్బాల్ క్రీడాలోకంలో సంచలనం రేగింది. ఆలిండియా ఫుట్బాల్ ఫెడరేషన్ (AIFF) బాస్, అధ్యక్షుడు కల్యాణ్ చౌబే (Kalyan Chaubey) తీవ్ర వివాదంలో చిక్కుకున్నారు. ఏఐఎఫ్ఎఫ్ మహిళల ఫుట్బాల్ కమిటీ ఛైర్పర్సన్, గోవాకు చెందిన క్రీడా నిర్వాహకురాలు వాలంకా అలెమావో (Valanka Alemao) స్వయంగా చౌబేతో పాటు ఇతర సీనియర్ అధికారులపై వేధింపుల ఆరోపణలు చేశారు.
ఢిల్లీలో జరిగిన మీటింగ్లో టార్గెట్
తాజాగా మార్చి 29వ తేదీన ఢిల్లీలోని ‘ఫుట్బాల్ హౌస్’లో (Football House) జరిగిన ఎగ్జిక్యూటివ్ కమిటీ సమావేశంలో ఈ దురదృష్టకర పరిణామం చోటుచేసుకున్నట్లు తెలుస్తోంది. భారత మహిళల ఆసియా కప్ (AFC Women’s Asian Cup) క్యాంపెయిన్లో జరిగిన పలు పాలనాపరమైన లోపాలను, అవకతవకలను ఆమె ఇటీవల ధైర్యంగా ఎత్తిచూపారు. ఆ కక్షతోనే సీనియర్ అధికారులు (Kalyan Chaubey) కావాలనే తనను లక్ష్యంగా చేసుకుని మీటింగ్లో దారుణంగా హేళన చేశారని, మానసికంగా వేధించారని వాలంకా అలెమావో ఆరోపిస్తున్నారు.
ఇవి కూడా చదవండి
ఎగ్జిక్యూటివ్ మెంబర్స్కు ఘాటు లేఖ
తనకు ఎదురైన పరాభవం గురించి వాలంకా అలెమావో ఏఐఎఫ్ఎఫ్ ఎగ్జిక్యూటివ్ కమిటీ (Executive Committee) సభ్యులందరికీ ఒక ఘాటు లేఖ రాశారు. “అధ్యక్షుడు కల్యాణ్ చౌబే (Kalyan Chaubey), ఉపాధ్యక్షుడు ఎన్.ఏ. హారిస్, అలాగే డిప్యూటీ సెక్రటరీ జనరల్ ఎం. సత్యనారాయణ్.. ఆ సమావేశంలో ప్రవర్తించిన తీరును మీ అందరి దృష్టికి తీసుకురావాలనుకుంటున్నాను. సమావేశంలో మాట్లాడకుండా నా గొంతును అణచివేయడానికి తీవ్ర ప్రయత్నాలు జరిగాయి. ఏఐఎఫ్ఎఫ్ చీఫ్ చౌబే నాతో అత్యంత అగౌరవంగా, దురుసుగా ప్రవర్తించారు. ఆయనకు వత్తాసు పలుకుతూ మిగిలిన అధికారులు కూడా స్వరం పెంచి, నన్ను భయభ్రాంతులకు గురిచేసేలా బెదిరింపు ధోరణితో మాట్లాడారు. సమావేశం జరిగినంత సేపూ ముగ్గురూ నన్నే టార్గెట్ చేశారు” అని ఆ లేఖలో అలెమావో తన ఆవేదన వ్యక్తం చేశారు.
