బీసీసీఐకి గౌతమ్ గంభీర్ సంచలన వార్నింగ్..!

క్రికెట్‌లో బ్యాటర్లకు విపరీతంగా అనుకూలిస్తూ, బౌలర్లను బలిపీఠం ఎక్కిస్తున్న ఫ్లాట్ పిచ్‌ల సంస్కృతిపై టీమిండియా హెడ్ కోచ్ గౌతమ్ గంభీర్(Gautam Gambhir) తీవ్ర ఆందోళన వ్యక్తం చేశాడు. ఆధునిక క్రికెట్‌లో బౌలర్ల మనుగడ ప్రశ్నార్థకంగా మారుతోందని, ఈ విషయంలో భారత క్రికెట్ నియంత్రణ మండలి (BCCI) తక్షణమే స్పందించకపోతే భవిష్యత్తులో భారత క్రికెట్ భారీ మూల్యం చెల్లించుకోవాల్సి వస్తుందని అతను చేసిన హెచ్చరిక ఇప్పుడు సంచలనంగా మారింది. పిచ్‌ల తయారీ విధానంలో మార్పులు రావాల్సిన అత్యవసర పరిస్థితి ఏర్పడిందని గంభీర్ స్పష్టం చేశాడు.

క్రికెట్ అనేది బ్యాట్, బాల్ మధ్య సమానమైన పోరాటంగా ఉండాలని, కానీ ప్రస్తుత పరిస్థితులు దానికి విరుద్ధంగా ఉన్నాయని గంభీర్ మండిపడ్డారు. కేవలం పరుగుల వరద పారించడమే లక్ష్యంగా, స్టేడియంలోకి వచ్చే ప్రేక్షకులను అలరించడం కోసమే పిచ్‌లను తయారు చేస్తే బౌలర్ల కెరీర్లు నాశనమవుతాయని ఆవేదన వ్యక్తం చేశాడు. “బౌలర్లకు ఎలాంటి సహకారం అందించని ఫ్లాట్ ట్రాక్‌ల వల్ల ఫాస్ట్ బౌలర్లు తీవ్రమైన ఒత్తిడికి, గాయాల బారిన పడుతున్నారు. బౌలర్లను కేవలం బంతులు విసిరే యంత్రాలుగా మార్చడం సరికాదు” అని గంభీర్ అభిప్రాయపడ్డాడు.

దేశీవాళీ క్రికెట్ (Ranji Trophy) నుంచి అంతర్జాతీయ మ్యాచ్‌ల వరకు పిచ్ లలో వైవిధ్యం లోపిస్తోందని గంభీర్ విశ్లేషించాడు. స్పిన్నర్లకు టర్న్, ఫాస్ట్ బౌలర్లకు స్వింగ్, బౌన్స్ లభించే సంప్రదాయ పిచ్‌లను కాపాడుకోవాల్సిన బాధ్యత బోర్డుపై ఉందన్నాడు. ఫ్లాట్ పిచ్‌లపై ఆడి అలవాటు పడటం వల్ల భారత బ్యాటర్లు విదేశీ పర్యటనల్లో స్వింగ్ మరియు బౌన్స్ పిచ్‌లపై ఆడటానికి తీవ్రంగా ఇబ్బంది పడుతున్నారని, ఇది మన బ్యాటింగ్ నాణ్యతను కూడా దెబ్బతీస్తోందని గుర్తుచేశాడు. గౌతమ్ గంభీర్ చేసిన ఈ హెచ్చరికలను బీసీసీఐ ఏమాత్రం నిర్లక్ష్యం చేయకూడదని క్రికెట్ నిపుణులు అభిప్రాయపడుతున్నారు. క్యూరేటర్లకు స్పష్టమైన మార్గదర్శకాలు జారీ చేసి, బౌలింగ్‌కు కూడా సమానంగా అనుకూలించే వికెట్లను తయారు చేయించడమే దీనికి ఏకైక పరిష్కారమని గంభీర్ సూచించాడు.