అమెరికా అధ్యక్షుడి కారు, విమానం లోపల ఏముంటాయి? ఊహించని షాకింగ్ ఫీచర్స్!
అమెరికా అధ్యక్షుడు ప్రయాణించే కారును ఎప్పుడైనా దగ్గరగా చూశారా? నల్లటి రంగులో, భారీ ఆకారంతో, చుట్టూ భద్రతా సిబ్బందితో కనిపించే ఆ కారును చూస్తేనే ఏదో ప్రత్యేకంగా అనిపిస్తుంది. కానీ దాని అసలు కథ బయట కనిపించేదానికంటే లోపలే ఎక్కువ ఆసక్తికరంగా ఉంటుంది. బయటకు స్టైలిష్ లగ్జరీ కారులా కనిపించే దీనికి బుల్లెట్లను తట్టుకునే బాడీ, హైటెక్ కమ్యూనికేషన్ సిస్టమ్స్, ఎన్నో సీక్రెట్ ఫీచర్లు! అందుకే దానికి ‘ది బీస్ట్’ అనే పేరు వచ్చింది.
ఇక అధ్యక్షుడు ప్రయాణించే విమానం గురించి చెప్పాలంటే అదొక చిన్న వైట్హౌస్లాంటిదే! ఆఫీస్, కాన్ఫరెన్స్ రూమ్, బెడ్రూమ్, హాస్పిటల్ తరహా మెడికల్ సదుపాయాలు కూడా ఉంటాయి. చిన్న కిచెన్ కూడా ఉంటుంది.ఒక్కమాటలో చెప్పాలంటే అదొక ఫ్లయింగ్ వైట్హౌస్! ఇవన్నీ వింటూంటే… అసలు ఒక దేశాధ్యక్షుడి ప్రయాణం ఎంత ప్రత్యేకంగా ఉంటుందో అనిపిస్తోంది కదా. అవేంటో తెలుసుకోవాలంటే ఈ రెండు వాహనాల లోపలికి తొంగిచూడాల్సిందే!
‘ది బీస్ట్’.. బయట కాడిలాక్, లోపల మాత్రం రక్షణ కోట!
అమెరికా అధ్యక్షుడి ప్రత్యేక కారును చూస్తే అది కాడిలాక్ కంపెనీ తయారుచేసిన లగ్జరీ కారులా కనిపిస్తుంది. కానీ నిజానికి అది సాధారణ కారు కాదు. అధ్యక్షుడి భద్రతను దృష్టిలో పెట్టుకుని ప్రత్యేకంగా రూపొందించిన భారీ రక్షణ వాహనం. దీనికి ‘ది బీస్ట్’ అనే పేరు ఎలా వచ్చిందో చూస్తే దాని ప్రత్యేకత అర్థమవుతుంది. సాధారణ కార్లతో పోలిస్తే దీని బరువు, నిర్మాణం, భద్రతా ఏర్పాట్లు అన్నీ చాలా భిన్నంగా ఉంటాయి. బయట నుంచి ఎంత అందంగా కనిపించినా, లోపల మాత్రం అధ్యక్షుడిని ప్రమాదాల నుంచి కాపాడేందుకు అనేక పొరల రక్షణ ఉంటుంది.
ఈ కారు అద్దాలు కూడా సాధారణమైనవి కావు. బుల్లెట్లను తట్టుకునేలా ప్రత్యేకంగా రూపొందించిన మందపాటి రక్షణ అద్దాలు, భారీ ఆర్మర్తో కూడిన బాడీ ఇందులో ఉంటాయి. రోడ్డుపై ప్రయాణిస్తున్నప్పుడు టైర్లకు ఏదైనా నష్టం జరిగినా వెంటనే కారు ఆగిపోకుండా ఉండేందుకు రన్-ఫ్లాట్ టైర్లను ఉపయోగిస్తారు. అంటే టైర్లు దెబ్బతిన్నా కొంత దూరం ప్రయాణాన్ని కొనసాగించే అవకాశం ఉంటుంది. బయట నుంచి చూస్తే లగ్జరీ కారు అనిపించినా, లోపల మాత్రం భద్రతకు సంబంధించిన ఎన్నో ఏర్పాట్లు ఉంటాయి.
ఇవి కూడా చదవండి
కారు లోపలే ఇంత టెక్నాలజీ ఉంటుందా?
ఈ కారులో మరో ఆసక్తికరమైన విషయం కమ్యూనికేషన్ వ్యవస్థ. అధ్యక్షుడు ప్రయాణిస్తున్న సమయంలోనూ తన భద్రతా బృందంతో, అధికారులతో సంప్రదింపులు జరపగలిగేలా ప్రత్యేక వ్యవస్థలు ఉంటాయి. అత్యవసర పరిస్థితుల్లో ఉపయోగపడే ఆక్సిజన్ సరఫరా వంటి రక్షణ ఏర్పాట్లు ఉన్నాయి. అంతేకాదు, అధ్యక్షుడి కారులో ఉపయోగించే ఇంధన వ్యవస్థ కూడా ప్రత్యేకంగా రూపొందించబడింది. కారు ఇంధన సరఫరాలో సమస్యలు ఎదురైనా ప్రయాణాన్ని కొనసాగించేందుకు అదనపు ఏర్పాట్లు ఉన్నట్లు సీక్రెట్ సర్వీస్ అధికారులు వెల్లడించారు.
ఇంకో విషయం ఏమిటంటే ఈ కారులోని ప్రతి సదుపాయం గురించి మనకు పూర్తిగా తెలియదు. ఎందుకంటే అధ్యక్షుడి భద్రతకు సంబంధించిన చాలా వివరాలను అమెరికా సీక్రెట్ సర్వీస్ బయటపెట్టదు. మీడియాకు కూడా కారు లోపలి భాగాన్ని పూర్తిగా చూపించరు. అప్పుడప్పుడు కొన్ని వివరాలు మాత్రమే బయటకు వస్తుంటాయి. అందుకే ‘ది బీస్ట్’ గురించి ఎంత తెలుసుకున్నా ఇంకా ఏదో తెలియని విషయం మిగిలే ఉంటుంది.
అధ్యక్షుడి విమానం అంటే ఆకాశంలో ఎగిరే వైట్హౌస్!
ఇక అధ్యక్షుడి విమానం విషయానికి వస్తే ఆసక్తి ఇంకా పెరుగుతుంది. ‘ఎయిర్ ఫోర్స్ వన్’ అనే పేరు వినగానే మనకు ఒక ప్రత్యేకమైన బోయింగ్ 747 విమానం గుర్తుకొస్తుంది. అయితే ఇందులో ఒక చిన్నమెలిక ఉంది. ఎయిర్ ఫోర్స్ వన్ అనేది ఒక విమానం అసలు పేరు కాదు. అమెరికా అధ్యక్షుడు ప్రయాణిస్తున్న ఎయిర్ ఫోర్స్ విమానానికి ఉపయోగించే ప్రత్యేక కాల్సైన్. ప్రస్తుతం అధ్యక్షుడి ప్రయాణాలకు ఉపయోగించే రెండు ప్రత్యేకంగా మార్పులు చేసిన VC-25A బోయింగ్ 747 విమానాలు ఉన్నాయి.
సాధారణంగా మనం విమానంలోకి వెళ్తే వరుసగా సీట్లు, చిన్న గ్యాలీ, బాత్రూమ్ కనిపిస్తాయి. కానీ ఎయిర్ ఫోర్స్ వన్లోకి వెళ్తే మాత్రం సీట్ల కంటే ముందుగా దాని ప్రత్యేక విభాగాల గురించి తెలుసుకోవాలనిపిస్తుంది. ఎందుకంటే అది కేవలం ప్రయాణం కోసం తయారుచేసిన విమానం కాదు. అధ్యక్షుడు వేల అడుగుల ఎత్తులో ఉన్నప్పటికీ తన విధులను కొనసాగించడానికి వీలుగా రూపొందించిన ప్రత్యేక కార్యాలయం.
విమానంలో అధ్యక్షుడికి ప్రత్యేక ఆఫీస్.. సమావేశాల గది కూడా!
ఈ విమానంలోనే ప్రత్యేక కార్యాలయం ఉంటుంది. అధ్యక్షుడు అక్కడ కూర్చుని తన అధికారిక పనులు చేసుకోవచ్చు. అవసరమైతే సమావేశాల గదిలో సలహాదారులతో చర్చలు జరపవచ్చు. విమానం గాల్లో ఉన్నా ప్రభుత్వ కార్యకలాపాలు మాత్రం ఆగిపోవాల్సిన అవసరం లేదు.
ఇక అధ్యక్షుడి విశ్రాంతి కోసం ప్రత్యేక గది, బాత్రూమ్, షవర్ వంటి సదుపాయాలు కూడా ఉంటాయి. అధ్యక్షుడితో పాటు ప్రయాణించే సీనియర్ అధికారులు, భద్రతా సిబ్బంది, ఇతర సిబ్బందికి కూడా వేర్వేరు ఏర్పాట్లు ఉంటాయి. అంటే బయటకు చూస్తే మామూలు విమానం అయినా, లోపలికి వెళ్తే ఒక చిన్న కార్యాలయ సముదాయంలా కనిపిస్తుంది.
విమానంలోనే 100 మందికి భోజనం తయారు చేస్తారా?
ఇది వింటే చాలామందికి ఆశ్చర్యం కలగొచ్చు. మనం విమానంలో ప్రయాణించేటప్పుడు ఇచ్చే చిన్న భోజన ప్యాకెట్ గుర్తొస్తుంది. కానీ అధ్యక్షుడి విమానంలో అలాంటి పరిస్థితి ఉండదు. ఇందులో రెండు ప్రత్యేక వంటశాలలు ఉంటాయి. ఒకేసారి సుమారు 100 మందికి ఆహారం సిద్ధం చేయగల సామర్థ్యం వీటికి ఉంది. అధ్యక్షుడితో పాటు ప్రయాణించే అధికారులు, సలహాదారులు, సిబ్బంది ఇలా చాలామందికి భోజనం అందించాల్సి ఉంటుంది కాబట్టి ఈ ఏర్పాట్లు చేశారు.
అంతేకాదు, విమానంలో ప్రత్యేక వైద్య విభాగం కూడా ఉంటుంది. ప్రయాణ సమయంలో ఎవరికైనా అనారోగ్యం వచ్చినా, అత్యవసర చికిత్స అవసరమైనా ఉపయోగపడేలా వైద్య సదుపాయాలను ఏర్పాటు చేశారు. అవసరాన్ని బట్టి ఆ విభాగాన్ని ఆపరేషన్ థియేటర్ స్థాయిలో ఉపయోగించగలిగే ఏర్పాట్లు ఉన్నాయని అమెరికా వైమానిక దళం వెల్లడించింది. అంటే వేల అడుగుల ఎత్తులో ఉన్నప్పటికీ వైద్య సాయం అందుబాటులో ఉంటుంది.
గాల్లో ఉన్నా ప్రపంచంతో సంబంధాలు కొనసాగుతూనే ఉంటాయి!
ఎయిర్ ఫోర్స్ వన్లో అత్యంత కీలకమైనది దాని కమ్యూనికేషన్ వ్యవస్థ. అధ్యక్షుడు విమానంలో ఉన్నాడని ప్రపంచంతో సంబంధాలు తెగిపోవు. అమెరికా అధికారులతో, ఇతర దేశాల నాయకులతో మాట్లాడేందుకు ప్రత్యేక సురక్షిత కమ్యూనికేషన్ సదుపాయాలు ఉంటాయి. ముఖ్యంగా ఏదైనా అంతర్జాతీయ సంక్షోభం వచ్చినప్పుడు అధ్యక్షుడు విమానంలో ఉన్నప్పటికీ పరిస్థితిని సమీక్షించవచ్చు, అధికారులతో మాట్లాడవచ్చు, కీలక నిర్ణయాలు తీసుకోవచ్చు.
ఈ విమానం సాధారణ ప్రయాణికుల విమానంలా మాత్రమే పనిచేయదు. అవసరమైన సందర్భాల్లో ఇది ఒక మొబైల్ కమాండ్ సెంటర్లా కూడా ఉపయోగపడుతుంది. ఎలక్ట్రోమాగ్నెటిక్ పల్స్ వంటి కొన్ని ప్రత్యేక ముప్పులను దృష్టిలో పెట్టుకుని ఎలక్ట్రానిక్ వ్యవస్థలకు రక్షణ కల్పించే ఏర్పాట్లు కూడా ఉన్నాయి. అయితే ఈ భద్రతా వ్యవస్థల పూర్తి వివరాలు మాత్రం రహస్యంగానే ఉంటాయి.
విమానంలో ఇంధనం అయిపోతే ఏం చేస్తారు?
సాధారణ విమానం అయితే ఇంధనం తగ్గినప్పుడు మరో విమానాశ్రయంలో దిగాల్సిందే. కానీ ప్రస్తుత VC-25A విమానానికి ఒక ప్రత్యేక సామర్థ్యం ఉంది. గాల్లో ఉండగానే మరో విమానం ద్వారా ఇంధనం నింపుకునే సదుపాయం దీనికి ఉంది. దీనివల్ల ప్రయాణ సామర్థ్యం పెరుగుతుంది. అయితే కొత్తగా రూపొందిస్తున్న VC-25B విమానాల్లో ఈ సదుపాయం ఉండదు. అంటే పాత, కొత్త అధ్యక్ష విమానాల మధ్య కూడా సాంకేతికంగా కొన్ని తేడాలు ఉన్నాయి.
2026లో మరో ఆసక్తికరమైన మలుపు.. ఖతార్ విమానం!
అధ్యక్ష విమానాల కథలో మరో ఆసక్తికరమైన అంశం ఖతార్ నుంచి వచ్చిన బోయింగ్ 747-8 విమానం. అమెరికా కొత్త VC-25B విమానాల తయారీ, డెలివరీ ఆలస్యం కావడంతో తాత్కాలికంగా ఉపయోగించేందుకు ఖతార్ అందించిన విమానాన్ని అమెరికా ప్రత్యేకంగా మార్పులు చేసింది. 2026లో ఈ విమానం చుట్టూ అంతర్జాతీయంగా కూడా పెద్ద చర్చ జరిగింది.
ఈ విమానం మొదటినుంచే విలాసవంతమైన ఇంటీరియర్తో ఉండటంతో అందులోని కొన్ని సదుపాయాలను అలాగే కొనసాగించారు. ఇందులో 10 బాత్రూమ్లు ఉన్నట్లు విమానాన్ని మార్పులు చేసిన సంస్థ ప్రతినిధులు వెల్లడించారు. అయితే అధ్యక్షుడి విమానంగా ఉపయోగించాలంటే విలాసవంతమైన ఇంటీరియర్ ఒక్కటే సరిపోదు. సురక్షిత కమ్యూనికేషన్, భద్రతా వ్యవస్థలు, ఇతర ప్రత్యేక మార్పులు కూడా అవసరం. అందుకే ఈ విమానాన్ని అధ్యక్షుడి అవసరాలకు తగ్గట్టుగా మార్చారు. ఇది పూర్తిస్థాయి కొత్త ఎయిర్ ఫోర్స్ వన్కు ప్రత్యామ్నాయం కాదు; మధ్యంతర ఏర్పాటుగా చూడాలి.
అసలు వీటి గురించి మనకు తెలియనివి ఏమిటి?
‘ది బీస్ట్’ అయినా, ఎయిర్ ఫోర్స్ వన్ అయినా వాటి గురించి బయటకు వచ్చిన విషయాలు చాలా ఆసక్తికరంగా ఉంటాయి. కానీ వాటి పూర్తి సామర్థ్యం గురించి మాత్రం ఎవరికీ పూర్తిగా తెలియదు. కారు దాడిని ఎదుర్కొన్నప్పుడు లోపల ఉన్న వ్యవస్థలు ఎలా స్పందిస్తాయి? విమానంలో అత్యవసర పరిస్థితి వస్తే అధ్యక్షుడి భద్రతను ఎలా నిర్ధారిస్తారు? కమ్యూనికేషన్ వ్యవస్థలకు ఎలాంటి ప్రత్యేక రక్షణ ఉంటుంది? ఇలాంటి ప్రశ్నలకు సంబంధించిన పూర్తి సమాధానాలు బహిరంగంగా ఉండవు. ఎందుకంటే అవి కేవలం టెక్నాలజీ వివరాలు కాదు.. ఒక దేశ అధ్యక్షుడి భద్రతకు సంబంధించిన అత్యంత కీలకమైన అంశాలు.
చివరికి చూస్తే ‘ది బీస్ట్’, ‘ఎయిర్ ఫోర్స్ వన్’ రెండూ కేవలం విలాసవంతమైన వాహనాలు కావు. ఒకటి కదిలే కోట.. మరొకటి ఎగిరే వైట్హౌస్. అమెరికా అధ్యక్షుడి ప్రయాణం వెనుక ఉన్న అసలు కథ ఇదే!
—సూర్య ప్రకాష్ జోశ్యుల







