సినిమా హాల్స్‌లో ఈ కళ్లజోడుపై నిషేధం? అసలు భయం పైరసీనా.. ప్రైవసీనా?

— సూర్య ప్రకాష్ జోశ్యుల

సినిమా థియేటర్‌లోకి కెమెరా తీసుకెళ్లడమే పెద్ద నేరం. ఇప్పుడు ఆ కెమెరా బయటకు కనిపించకుండా కళ్లజోడులోనే ఉంటే? అదే ఇప్పుడు ప్రపంచ వ్యాప్తంగా సినిమా థియేటర్లను ఆలోచనలో పడేస్తోంది. చేతిలో ఫోన్ లేకుండా, రికార్డింగ్ చేస్తున్నట్టు బయటకు కనిపించకుండా సినిమా తెరను చిత్రీకరించగలిగే AI స్మార్ట్ గ్లాసెస్పై UKలోని కొన్ని సినిమా చైన్లు నిషేధం లేదా ఆంక్షల గురించి ఆలోచిస్తున్నాయి.

ఇక్కడ అసలు విషయం ఒక కళ్లజోడు గురించి కాదు. సినిమా థియేటర్‌లో పైరసీని అడ్డుకోవడానికి ఇప్పటివరకు ఉపయోగించిన పద్ధతులన్నింటినీ కొత్త టెక్నాలజీ ఎంత సులభంగా దాటేయగలదన్న విషయం గురించి. ముఖ్యంగా Metaకు చెందిన స్మార్ట్ గ్లాసెస్‌లో కెమెరా ఉండటంతో.. సినిమా చూస్తున్న వ్యక్తి ఒకేసారి ప్రేక్షకుడిగానూ, రికార్డర్‌గానూ మారిపోయే అవకాశం ఉందన్న భయం మొదలైంది.

ఫోన్ కనిపిస్తుంది.. ఈ కెమెరా కనిపించదు

బ్రిటన్‌లో ఈ చర్చకు కారణమైనవి Meta, Ray-Ban కలిసి రూపొందించిన స్మార్ట్ గ్లాసెస్. వీటి ధర సుమారు యాభై వేలు. సాధారణ కళ్లజోడులా కనిపించే వీటిలో కెమెరా, మైక్రోఫోన్, స్పీకర్లు, AI ఫీచర్లు ఉంటాయి. ఫొటోలు తీయడం, వీడియో రికార్డ్ చేయడం, కాల్స్ మాట్లాడటం, మ్యూజిక్ వినడం, లైవ్ ట్రాన్స్‌లేషన్ వంటి పనులను చేతులు ఉపయోగించకుండా చేయొచ్చు.

సినిమా థియేటర్లకు ఇక్కడే సమస్య మొదలవుతుంది. ఫోన్‌తో సినిమా రికార్డ్ చేస్తే.. చుట్టూ ఉన్నవాళ్లకు అనుమానం రావచ్చు. కానీ కళ్లజోడు పెట్టుకున్న వ్యక్తి స్క్రీన్ వైపు చూస్తూ కూర్చున్నంత మాత్రాన అతను సినిమా రికార్డ్ చేస్తున్నాడో లేదో వెంటనే గుర్తించడం అంత సులభం కాదు. ఒక పూర్తి సినిమా కాకపోయినా.. కొన్ని కీలక సన్నివేశాలు, కొత్త సినిమాల క్లైమాక్స్‌లు లేదా విడుదలకు ముందే లీక్ అయ్యే కంటెంట్‌ను రికార్డ్ చేసే అవకాశం పరిశ్రమను కలవరపెడుతోంది.

Meta మాత్రం దీనికి ఒక భద్రతా వ్యవస్థ ఉందని చెబుతోంది. కెమెరా పనిచేసేటప్పుడు కళ్లజోడుపై చిన్న LED లైట్ వెలుగుతుంది. దాన్ని కప్పిపుచ్చకుండా ఉండేలా tamper-detection టెక్నాలజీని కూడా కంపెనీ ఉపయోగిస్తోంది. అంటే, రికార్డింగ్ జరుగుతున్నప్పుడు అది పూర్తిగా రహస్యంగా ఉండదన్నది Meta వాదన.

కానీ ఇక్కడే మరో ప్రశ్న వస్తోంది. ఆ చిన్న లైట్‌ను థియేటర్‌లో చీకట్లో కూర్చున్న ప్రతి ప్రేక్షకుడు గమనించగలడా? గమనించినా.. ఆ వ్యక్తి ఏం రికార్డ్ చేస్తున్నాడో తెలుసుకునే అవకాశం ఉందా? ఈ సందేహాలే సినిమా యాజమాన్యాలను జాగ్రత్త పడేలా చేస్తున్నాయి.

పైరసీతో మొదలైన భయం.. ప్రైవసీ వరకు వెళ్లింది

UK Cinema Association ప్రకారం, ఇప్పటివరకు తమ సభ్యుల్లో ఎవరూ ఈ గ్లాసెస్‌పై అధికారిక నిషేధం విధించినట్టు వార్తలు రాలేదు. కానీ కెమెరా ఉన్న స్మార్ట్ గ్లాసెస్‌పై కొన్ని సినిమా చైన్లు ఇప్పటికే నియమాలు పెట్టే దిశగా ఆలోచిస్తున్నాయి. కారణం కేవలం పైరసీ కాదు. ప్రైవసీ కూడా.

ఎందుకంటే ఈ సమస్య సినిమా హాల్‌తోనే మొదలై ఆగిపోవడం లేదు. ఇప్పటికే రెస్టారెంట్లు, థియేటర్లు, పబ్బులు, కోర్టు భవనాలు వంటి ప్రదేశాల్లో కూడా Meta స్మార్ట్ గ్లాసెస్‌పై ఆంక్షలు కనిపిస్తున్నాయి. ఎవరైనా తమను రికార్డ్ చేస్తున్నారని తెలియకపోవచ్చు. ఎదురుగా ఉన్న వ్యక్తి ఫోన్‌తో వీడియో తీస్తున్నాడంటే కనీసం అది కనిపిస్తుంది. కానీ కెమెరా కళ్లజోడులో దాగి ఉంటే.. మనం ఎప్పుడు రికార్డ్ అవుతున్నామో గుర్తించడం కష్టం.

అందుకే ఈ టెక్నాలజీపై విమర్శలు పెరుగుతున్నాయి. కొందరు వాటిని “spy glasses”గా, మరికొందరు మరింత ఘాటైన పేర్లతో పిలుస్తున్నారు. టెక్నాలజీ ఉపయోగకరంగా ఉండటం ఒక వైపు అయితే.. దాన్ని ఇతరుల అనుమతి లేకుండా ఉపయోగించే అవకాశం మరో వైపు నిలుస్తోంది.

కానీ ఇదే గ్లాసెస్ కొందరికి అవసరం కూడా

ఇక్కడ కథను పూర్తిగా ఒకే కోణంలో చూడటం కూడా సరికాదు. ఎందుకంటే ఇదే స్మార్ట్ గ్లాసెస్ కొందరికి వినోద పరికరం మాత్రమే కాదు.. అవసరమైన సహాయక టెక్నాలజీ కూడా.

ఉదాహరణకు చూపు సమస్యలు ఉన్నవారికి AI ఆధారంగా పరిసరాలను అర్థం చేసుకోవడంలో ఇవి సహాయపడవచ్చు. వినికిడి సమస్యలు ఉన్నవారికి ప్రత్యేక సబ్‌టైటిల్స్ అందించవచ్చు. సినిమా థియేటర్‌లో సాధారణ ప్రేక్షకుడికి కనిపించని విధంగా వ్యక్తిగత అవసరాలకు అనుగుణంగా సమాచారం అందించడం కూడా వీటి ద్వారా సాధ్యమవుతోంది.

అందుకే UK Cinema Association కూడా ఒక కీలకమైన విషయాన్ని చెబుతోంది. సినిమా థియేటర్లు పైరసీ, ప్రైవసీని అడ్డుకోవాలి. అదే సమయంలో accessibility అవసరాలు ఉన్న ప్రేక్షకులకు ఉపయోగపడే టెక్నాలజీని పూర్తిగా నిషేధించడం కూడా సరైన పరిష్కారం కాకపోవచ్చు. అంటే.. థియేటర్ల ముందున్న అసలు సమస్య “నిషేధించాలా వద్దా?” అనే ప్రశ్న కంటే.. “ఎలా నియంత్రించాలి?” అన్నదే.

సినిమా థియేటర్ మాత్రమే కాదు.. పబ్లిక్ స్పేస్ మొత్తం మారుతోంది

పబ్ చైన్ Wetherspoons కూడా ఇదే తరహా ఆందోళన వ్యక్తం చేసింది. ఇతర కస్టమర్లు లేదా సిబ్బందిని వారి అనుమతి లేకుండా రికార్డ్ చేయడం తమ పబ్బుల్లో అనుమతించబడదని సంస్థ చెబుతోంది. Meta గ్లాసెస్ ఈ నియమాన్ని ఉల్లంఘించే అవకాశం ఉందన్నది వారి అభిప్రాయం.

ఇది చూస్తే ఒక విషయం స్పష్టమవుతోంది. స్మార్ట్ గ్లాసెస్‌పై జరుగుతున్న చర్చ కేవలం ఒక కొత్త గాడ్జెట్ గురించి కాదు. మన చుట్టూ ఉన్న “ప్రైవేట్” మరియు “పబ్లిక్” అనే గీతలు ఎక్కడ ముగుస్తాయన్న ప్రశ్న గురించి.

ఇప్పటివరకు కెమెరా అంటే మన చేతిలో ఉండే ఫోన్. ఇకపై కెమెరా మన కళ్ల ముందే ఉండొచ్చు. మనం ఎవరి వైపు చూస్తున్నామో.. ఆ దృశ్యమే రికార్డ్ అవుతుందేమో అన్న అనుమానం కూడా రావచ్చు.

టెక్నాలజీని ఆపడం సులభం.. దాని ఉపయోగాన్ని నియంత్రించడం కష్టం

Meta మాత్రం పూర్తిగా నిషేధించడం సరైన మార్గం కాదని చెబుతోంది. తమ గ్లాసెస్ సంగీతం వినడం నుంచి లైవ్ ట్రాన్స్‌లేషన్ వరకు ఎన్నో ఉపయోగాలను అందిస్తున్నాయని, చూపు సమస్యలు ఉన్నవారికి కూడా అవి కీలకమైన కొత్త టెక్నాలజీగా మారుతున్నాయని కంపెనీ అంటోంది. అంతేకాదు.. స్మార్ట్‌ఫోన్‌లు, ఇతర కెమెరాల కంటే తమ గ్లాసెస్‌లో రికార్డింగ్ జరుగుతున్నప్పుడు కనిపించే ప్రత్యేక లైట్ ఉందని కూడా Meta వాదిస్తోంది.

కానీ సినిమా పరిశ్రమకు మరో లెక్క ఉంది. ఒక సినిమా తయారవ్వడానికి కోట్ల రూపాయలు ఖర్చవుతాయి. థియేటర్‌లో విడుదలైన కొన్ని గంటల్లోనే ఆ సినిమా నుంచి రికార్డ్ చేసిన కంటెంట్ ఆన్‌లైన్‌లోకి వెళ్తే.. అది కేవలం ఒక ప్రేక్షకుడి చిన్న తప్పిదంగా మిగలదు. మొత్తం సినిమా వ్యాపారాన్ని ప్రభావితం చేసే పైరసీ గొలుసులో భాగమవుతుంది.

అందుకే రేపటి థియేటర్‌లో టికెట్‌తో పాటు మరో నియమం కూడా ఉండొచ్చు — “కెమెరా ఉన్న స్మార్ట్ గ్లాసెస్‌కు అనుమతి లేదు.” కానీ అప్పుడు మరో ప్రశ్న తప్పదు. చూపు లేని వ్యక్తికి అదే గ్లాసెస్ సినిమా అర్థం చేసుకోవడానికి అవసరమైతే? పైరసీని ఆపే నిబంధన వల్ల అతని టెక్నాలజీ హక్కును కూడా ఆపాలా?

ఇదే భవిష్యత్తు టెక్నాలజీ తీసుకొచ్చే అసలు చిక్కు. ఒకే పరికరం ఒకరికి పైరసీ ఆయుధం కావచ్చు. ఇంకొకరికి ప్రపంచాన్ని చూడటానికి కొత్త కళ్లజోడు కావచ్చు. ఇకపై సమస్య టెక్నాలజీని నిషేధించడంలో ఉండకపోవచ్చు. దాన్ని ఎక్కడ, ఎలా, ఎవరి అనుమతితో ఉపయోగించాలో నిర్ణయించడంలో ఉండొచ్చు.

సినిమా హాల్‌లో మొదలైన ఈ చిన్న నిషేధ చర్చ.. చివరికి మనం ఒకరినొకరు చూస్తున్నామా, లేక ఒకరినొకరు రికార్డ్ చేస్తున్నామా అనే పెద్ద ప్రశ్నగా మారబోతోంది.