అమృతాంజన్ వెనుక మన తెలుగువాడు! రూ. 2,278 కోట్ల బ్రాండ్ కథ ఇప్పుడు సినిమాగా!

–సూర్య ప్రకాష్ జోశ్యుల

మీ ఇంట్లో అమృతాంజనం ఉందా?

అయితే…

మీ ఇంట్లో ఒక మరచిపోయిన తెలుగు చరిత్ర కూడా ఉంది.

తలనొప్పి వచ్చినప్పుడు… కండరాలు నొప్పించినప్పుడు… మనలో చాలామంది ఆ చిన్న పచ్చ బాటిల్ కోసం వెతుకుతాం. కానీ… ఆ బాటిల్ వెనుక ఉన్న మనిషి గురించి మాత్రం చాలా మందికి తెలియదు.

ఇది కేవలం ఒక పెయిన్ బామ్ కథ కాదు.

ఒక కంపెనీ కథ కాదు.

ఒక తెలుగు వ్యక్తి… తన వ్యాపారాన్ని సమాజం కోసం ఎలా ఉపయోగించాడో చెప్పే అసాధారణ కథ.

ఈరోజు సుమారు రూ. 2,278 కోట్ల మార్కెట్ విలువ ఉన్న అమృతాంజన్ బ్రాండ్‌కు పునాది వేసిన వ్యక్తి… కాశీనాధుని నాగేశ్వరరావు పంతులు. ఇప్పుడు ఆయన జీవితమే ‘విశ్వదాత’ పేరుతో పాన్ ఇండియా సినిమాగా రాబోతోంది.

బామ్‌లో బలం… బ్రాండ్‌లో బంధం

కాశీనాధుని నాగేశ్వరరావు పంతులు పేరు చాలామందికి వెంటనే గుర్తుకురాకపోవచ్చు. కానీ ఆయన స్థాపించిన అమృతాంజనం మాత్రం దాదాపు ప్రతి భారతీయ కుటుంబానికి సుపరిచితమే. 1893లో బాంబేలో ప్రారంభమైన ఈ చిన్న పెయిన్ బామ్, కాలక్రమేణా దేశంలోనే అత్యంత విశ్వసనీయమైన బ్రాండ్లలో ఒకటిగా ఎదిగింది. నేడు సుమారు రూ. 2,278 కోట్ల మార్కెట్ విలువ కలిగిన కంపెనీగా నిలిచిన అమృతాంజన్ వెనుక, కేవలం ఒక విజయవంతమైన వ్యాపారవేత్త కథ మాత్రమే లేదు. సమాజాన్ని మార్చాలనే సంకల్పంతో వ్యాపారాన్ని సాధనంగా మార్చుకున్న ఒక తెలుగు మహానుభావుడి దూరదృష్టి ఉంది.

లాభంలో లక్ష్యం… సంపాదనలో సందేశం

వ్యాపార విజయం సాధించిన తర్వాత చాలామంది వ్యక్తిగత సంపదను పెంచుకోవడంపై దృష్టి పెడతారు. కానీ కాశీనాధుని నాగేశ్వరరావు పంతులు మాత్రం భిన్నమైన మార్గాన్ని ఎంచుకున్నారు. అమృతాంజనం ద్వారా వచ్చిన ఆదాయాన్ని కేవలం వ్యాపార విస్తరణకే పరిమితం చేయకుండా, తెలుగు సమాజంలో చైతన్యం తీసుకురావడానికి వినియోగించారు. ఆ ఆలోచన నుంచే 1909లో బాంబేలో ‘ఆంధ్రపత్రిక’ జన్మించింది. తర్వాత మద్రాసుకు మారిన ఈ పత్రిక తెలుగు ప్రజల్లో జాతీయ చైతన్యం, భాషాభిమానాన్ని పెంపొందించడంలో కీలక పాత్ర పోషించింది.

వ్యాపారంలో విజయం… ఉద్యమంలో విజన్

కాశీనాధుని నాగేశ్వరరావు పంతులు కేవలం వ్యాపారవేత్త మాత్రమే కాదు. స్వాతంత్ర్య ఉద్యమంలోనూ చురుకుగా పాల్గొన్నారు. మహాత్మా గాంధీ పిలుపునిచ్చిన పలు జాతీయోద్యమాలకు మద్దతు ఇవ్వడమే కాకుండా, కాంగ్రెస్ కార్యకలాపాలకు ఆర్థికంగా కూడా అండగా నిలిచారు. ఆయనకు వ్యాపారం అంటే లాభాల సాధనం మాత్రమే కాదు; సమాజానికి ఉపయోగపడే శక్తి. అందుకే ప్రజలు ఆయనను “దేశబంధు”, “విశ్వదాత” వంటి బిరుదులతో గౌరవించారు.

బ్రాండ్‌కు పేరు… భావాలకు వెలుగు

అమృతాంజనం గురించి చాలామందికి తెలుసు. కానీ ఆ బ్రాండ్‌ను నిర్మించిన వ్యక్తే తెలుగు జర్నలిజంలో కొత్త అధ్యాయానికి శ్రీకారం చుట్టారని మాత్రం చాలామందికి తెలియదు. ఒకవైపు ప్రజలకు ఉపశమనం అందించిన బ్రాండ్‌ను నిర్మిస్తూనే, మరోవైపు ప్రజల్లో ఆలోచన రగిలించే పత్రికను నిర్మించడం కాశీనాధుని దూరదృష్టికి నిదర్శనం. వ్యాపారం, జర్నలిజం, జాతీయోద్యమం… ఈ మూడు రంగాలను ఒకే జీవితంలో సమన్వయం చేసిన అరుదైన తెలుగు మహానుభావుల్లో ఆయన ఒకరు.

చరిత్రకు చిత్రం… తరానికి తారకం

కాశీనాధుని నాగేశ్వరరావు పంతులు 160వ జయంతి సందర్భంగా ఆయన జీవితాన్ని ‘విశ్వదాత’ పేరుతో పాన్ ఇండియా చిత్రంగా ప్రేక్షకుల ముందుకు తీసుకురానున్నారు. శ్రీముఖి మూవీస్ బ్యానర్‌పై శివలెంక పవని ప్రసాద్ నిర్మిస్తున్న ఈ చిత్రానికి మూడు జాతీయ అవార్డులు అందుకున్న ప్రముఖ సినిమాటోగ్రాఫర్ మధు అంబట్ దర్శకత్వం వహిస్తున్నారు. ప్రస్తుతం పరిశోధన, స్క్రీన్‌ప్లే పనులు జరుగుతున్న ఈ చిత్రం, ఒక మహానుభావుడి జీవితాన్ని మాత్రమే కాదు… వ్యాపారం సమాజానికి ఎలా సేవ చేయగలదో చెప్పే ఒక స్ఫూర్తిదాయక గాథను కూడా కొత్త తరానికి పరిచయం చేయబోతోంది.