ఫ్యాక్టరీల్లోకి అడుగుపెడుతున్న రోబోలు.. వేలాది కార్మికుల స్ట్రైక్.. అసలు యుద్ధం మొదలైందా?

–సూర్య ప్రకాష్ జోశ్యుల

మీ ఉద్యోగం నుండి మిమ్మల్ని తీసేయడానికి మీ బాస్‌కు మీలాంటి ఒక మనిషి అవసరం లేకపోతే? కేవలం ఒక రోబో చాలు అనుకుంటే?

ఇదేదో హాలీవుడ్ సైన్స్ ఫిక్షన్ సినిమా కథ కాదు… భవిష్యత్తులో జరగబోయే విపత్తు అంతకన్నా కాదు. ప్రస్తుతం మొదలైన కథ. మరికొద్ది రోజుల్లో ప్రపంచం మొత్తం విస్తరించబోతున్న కథనం. ప్రపంచంలోని అతిపెద్ద కార్ల తయారీ దిగ్గజాల్లో ఒకటైన ‘హ్యుందాయ్’ (Hyundai) కంపెనీలో వేలాది మంది కార్మికులు ఇప్పుడు రోబోల భయంతో రోడ్లపైకి వచ్చి సమ్మె చేస్తున్నారు!

ఇప్పటివరకు AI (ఆర్టిఫిషియల్ ఇంటెలిజెన్స్) వల్ల ఉద్యోగాలు పోతాయనేది కేవలం సోషల్ మీడియా చర్చలకే పరిమితమైంది. కానీ ఇప్పుడు… చరిత్రలో మొదటిసారిగా, వేలాది మంది కార్మికులు అదే భయంతో నిజంగానే సమ్మెకు దిగటం ఆశ్చర్య పరుస్తోంది . కంగారుపెడుతోంది. “మమ్మల్ని కాదని రోబోలను ఫ్యాక్టరీలోకి తీసుకురావొద్దు… మా ఉద్యోగాలు పోకుండా ముందే లిఖితపూర్వక హామీ ఇవ్వండి!” అని డిమాండ్ చేస్తున్నారు.

ఇది కొరియా ముచ్చట కాదు… రేపు మన కథ కూడా!

ఈ వార్త వినగానే “ఇదేదో దక్షిణ కొరియాలో జరుగుతోంది కదా, మనకెందుకు?” అనుకుంటే పొరపాటే. ఒక్కసారి ఆలోచించండి… రేపు ఇదే పరిస్థితి చెన్నైలోని హ్యుందాయ్ ప్లాంట్‌లో వస్తే? లేదా భారతదేశంలోని టాటా, మహీంద్రా, మారుతి, కియా, అశోక్ లేలాండ్ వంటి ఆటోమొబైల్ హబ్‌లలో కూడా AI రోబోలను భారీగా దించితే?

ఒక్క తయారీ రంగమే కాదు… రేపు ఇదే మార్పు బ్యాంకులు, ఐటీ కంపెనీలు, గోదాములు, ఆసుపత్రులు, లాజిస్టిక్స్ వరకు విస్తరిస్తే పరిస్థితి ఎలా ఉంటుంది? అందుకే ఈ సమ్మె, ప్రపంచవ్యాప్తంగా ఉన్న ప్రతి ఉద్యోగిని, ప్రతి విద్యార్థిని, ప్రతి కుటుంబాన్ని ఆలోచింపజేస్తోంది. ఇది వారి భవిష్యత్తుకు సంబంధించిన కథ!

‘అట్లాస్’ రోబో… మనిషి చేసే పనుల్లోకి!

ఇప్పటివరకు ఆటోమేషన్ అంటే కేవలం పెద్ద పెద్ద మెషీన్లు మాత్రమే అనుకున్నాం. కానీ ఈసారి హ్యుందాయ్ కంపెనీ రంగంలోకి దించబోతున్నది ‘అట్లాస్’ (Atlas) అనే హ్యూమనాయిడ్ రోబోను! ఇది మనిషిలాగే నడుస్తుంది, మనిషిలాగే బరువైన వస్తువులను ఎత్తుతుంది, కార్ల విడిభాగాలను అమర్చడం (Assembly) వంటి సంక్లిష్టమైన పనులను కూడా ఈజీగా చేసేస్తుంది.

ఒకప్పుడు రోబోలు మనిషికి సహాయం చేస్తాయని చెప్పారు… కానీ ఇప్పుడు మనిషి ఉద్యోగాన్నే రోబో పూర్తిగా రీప్లేస్ చేయబోతుందనే భయం కార్మికులను రోడ్డు ఎక్కించింది.

అసలు యుద్ధం రోబోలతో కాదు… లాభాలతో!

చాలామంది “రోబోలు ఉద్యోగాలు తీసేస్తున్నాయి” అని మాత్రమే పైపైన చూస్తున్నారు. కానీ హ్యుందాయ్ కార్మికులు అడుగుతున్న అసలు ప్రశ్న వేరే ఉంది.

ఇటీవలే శామ్‌సంగ్, ఎస్‌కే హైనిక్స్ వంటి టెక్ కంపెనీలు AI బూమ్ వల్ల వేల కోట్ల రూపాయల అదనపు లాభాలను ఆర్జించాయి. ఆ లాభాలను తమ ఉద్యోగులకు భారీ బోనస్‌ల రూపంలో పంచాయి. ఇప్పుడు హ్యుందాయ్ కార్మికులు కూడా, “AI వల్ల కంపెనీకి కోట్ల లాభాలు వస్తే… ఆ లాభాల్లో ఉద్యోగులకు కూడా వాటా ఉండాలి కదా!” అని అడుగుతున్నారు. AI తెచ్చే సంపదను ఎవరు పంచుకోవాలి? కంపెనీ యజమానులా? షేర్ హోల్డర్లా? లేక శ్రమ దోపిడీకి గురవుతున్న కార్మికులా? ఇదే ఇప్పుడు ప్రపంచవ్యాప్తంగా మొదలవుతున్న కొత్త బిజినెస్ డిబేట్.

ATM నుంచి AI దాకా… అదే ప్రశ్న!

ఒకప్పుడు బ్యాంకింగ్ రంగంలో ATM మెషీన్లు వచ్చినప్పుడు ఇలాగే బ్యాంక్ ఉద్యోగాలు పోతాయని భయపడ్డారు. ఆ తర్వాత సూపర్ మార్కెట్లలో స్వయం సేవా బిల్లింగ్ (Self Checkout) వచ్చినప్పుడు క్యాషియర్ ఉద్యోగాలపై చర్చ జరిగింది. టెక్నాలజీ మారిన ప్రతిసారీ “మా ఉద్యోగాలు ఉంటాయా?” అనే ప్రశ్న కార్మికులను వెంటాడుతూనే ఉంది. కానీ ఈసారి రాబోతున్న మార్పు మునుపటి కంటే చాలా వేగంగా, చాలా పెద్దగా ఉండబోతోందనేది నిజం.

గంటకు వందల కోట్ల నష్టం!

హ్యుందాయ్ లాంటి గ్లోబల్ బ్రాండ్‌లో ఒక్క గంట సమ్మె జరిగినా ఉత్పత్తి తలకిందులవుతుంది. గతేడాది జరిగిన కేవలం 16 గంటల పాక్షిక సమ్మె వల్లే దాదాపు 7,000 కార్ల ఉత్పత్తి నిలిచిపోయి, కంపెనీకి 300 బిలియన్ వాన్ల (వేల కోట్ల రూపాయల) నష్టం వచ్చింది. ఈసారి ఏకంగా 3 రోజులు సమ్మె అంటే ప్రపంచవ్యాప్తంగా కార్ల సరఫరాపై పడే ప్రభావం సామాన్యంగా ఉండదు.

ముగింపు:

చరిత్రను ఒక్కసారి వెనక్కి తిరిగి చూసుకుంటే…
ఒకప్పుడు మనిషి తన అవసరం కోసం రోబోను తయారు చేశాడు.
కానీ ఇప్పుడు… అదే రోబో మీద భయంతో మనిషి వీధిలో యుద్దానికి దిగుతున్నాడు!

AI యుగంలో ఉద్యోగాలపై, మానవ మనుగడపై జరగబోయే అతిపెద్ద పోరాటం బహుశా ఇక్కడి నుంచే అధికారికంగా ప్రారంభమై ఉండొచ్చు!