శంకర నేత్రాలయ యూఎస్ఏ సలహా మండలి సభ్యుడిగా ప్రముఖ పారిశ్రామికవేత్త లక్ష్మీ నరసింహన్ వాసన్ నియామకం!
- Published By: Vishal
- July 12, 2026 / 12:33 PM IST
ప్రముఖ పారిశ్రామికవేత్త , దాత శ్రీ లక్ష్మీ నరసింహన్ వాసన్ను ‘శంకర నేత్రాలయ యూఎస్ఏ’ తన సలహా మండలి (అడ్వైజరీ బోర్డు) సభ్యుడిగా నియమిస్తున్నట్లు ప్రకటించింది. అమెరికాలోని కిచెన్ ఎక్విప్మెంట్ రంగంలో విజయవంతమైన పారిశ్రామికవేత్తగా రాణించడమే కాకుండా, సామాజిక సేవా కార్యక్రమాల్లో ఆయన చూపుతున్న చొరవను గుర్తించి ఈ పదవికి ఎంపిక చేసినట్లు సంస్థ అధ్యక్షులు బాల రెడ్డి ఇందుర్తి వెల్లడించారు.
లక్ష్మీ నరసింహన్ నేపథ్యం…
తమిళనాడులో జన్మించి, హైదరాబాద్లో పెరిగిన వాసన్ ఉస్మానియా యూనివర్సిటీలో ఇంజినీరింగ్ పూర్తి చేశారు. 1981లో అమెరికాకు వెళ్లి, అక్కడ ‘రాయల్ కిచెన్ ఎక్విప్మెంట్’ కంపెనీకి సీఈఓగా ఎదిగారు. వ్యాపార రంగంలోనే కాకుండా క్రీడారంగంలో కూడా ఆయనకు అద్భుతమైన చరిత్ర ఉంది. భారత్లో ఫస్ట్ క్లాస్ క్రికెటర్గా రాణించిన ఆయన, హైదరాబాద్ రంజీ జట్టుకు కెప్టెన్గా వ్యవహరించారు. సునీల్ గవాస్కర్, కపిల్ దేవ్, మహ్మద్ అజహరుద్దీన్ వంటి దిగ్గజ క్రీడాకారులతో కలిసి మైదానంలో పంచుకున్న జ్ఞాపకాలు ఆయన సొంతం.
సేవా కార్యక్రమాలు, దాతృత్వం…
శంకర నేత్రాలయ పట్ల వాసన్ గారికి ఉన్న అంకితభావం అనిర్వచనీయం. ఇటీవల ఆయన సంస్థకు 4.25 లక్షల డాలర్ల విరాళాన్ని ప్రకటించారు. ఈ నిధులతో మధ్యప్రదేశ్లోని గ్వాలియర్లో ‘మొబైల్ ఐ సర్జికల్ యూనిట్’ (MESU) ఏర్పాటుకు సంస్థ సన్నాహాలు చేస్తోంది. ఈ ప్రాజెక్టు ద్వారా మధ్యప్రదేశ్ , పరిసర ఐదు రాష్ట్రాల్లోని గ్రామీణ పేదలకు అత్యాధునిక నేత్ర వైద్య సేవలు అందుబాటులోకి రానున్నాయి.
ఈ నియామకంపై శంకర నేత్రాలయ ఇండియా అధ్యక్షులు డాక్టర్ గిరీష్ రావు, యూఎస్ఏ నాయకత్వ బృందం, పద్మభూషణ్ డాక్టర్ జగదీశ్ సేథ్ తదితరులు వాసన్ , ఆయన సతీమణి డాక్టర్ బృందా సుబ్రహ్మణ్యంలకు స్వాగతం పలికారు. సేవారంగంలో వాసన్ కుటుంబం అందిస్తున్న సహకారాన్ని వారు ప్రత్యేకంగా అభినందించారు.
వాసన్ నియామకం శంకర నేత్రాలయ లక్ష్యాలను మరింత బలోపేతం చేయడమే కాకుండా, గ్రామీణ ప్రజలకు కంటిచూపును అందించే దిశగా మరిన్ని సానుకూల ఫలితాలను ఇస్తుందని సంస్థ ఆశాభావం వ్యక్తం చేసింది.
