సవాళ్లు-ప్రతిసవాళ్ల మధ్య వేడెక్కిన కాళేశ్వరం రాజకీయం
- Published By: Vasishta
- July 11, 2026 / 03:50 PM IST
తెలంగాణ రాజకీయాల్లో ‘కాళేశ్వరం ప్రాజెక్టు’ మరోసారి హాట్ టాపిక్గా మారింది. ప్రాజెక్టు నుంచి నీటిని ఎత్తిపోయడంపై అధికార కాంగ్రెస్, ప్రతిపక్ష బీఆర్ఎస్ పార్టీల మధ్య మాటల యుద్ధం పీక్స్కు చేరింది. కాళేశ్వరం నుంచి నీళ్లు ఎత్తిపోయలేకపోతే ఈ ప్రభుత్వం తనకు కేవలం మూడు నెలలు మంత్రి పదవి అప్పగించాలని, తాను ఆ పని చేసి చూపిస్తానని బీఆర్ఎస్ అగ్రనేత, మాజీ మంత్రి హరీశ్ రావు విసిరిన సవాల్ రాష్ట్ర రాజకీయాల్లో తీవ్ర దుమారం రేపుతోంది.
హరీశ్ రావు సవాల్పై కాంగ్రెస్ మంత్రులు తీవ్రస్థాయిలో మండిపడుతున్నారు. కాళేశ్వరం ప్రాజెక్టును కేవలం కమీషన్ల కోసమే వాడుకుని, చివరకు దాన్ని కూల్చేశారని మంత్రి ఉత్తమ్ కుమార్ రెడ్డి ధ్వజమెత్తారు. ప్రాజెక్టును సర్వనాశనం చేసిన హరీశ్ రావు, ఇప్పుడు మళ్లీ సిగ్గులేకుండా మంత్రి పదవి ఎలా అడుగుతారని ఆయన ప్రశ్నించారు. మరోవైపు, మంత్రి గడ్డం వివేక్ వెంకటస్వామి కూడా హరీశ్ రావుపై నిప్పులు చెరిగారు. ప్రాజెక్టు పిల్లర్లు కుంగిపోవడానికి, డిజైన్ లోపాలకు సమాధానం చెప్పకుండా, తప్పును కప్పిపుచ్చుకోవడానికే ఇలాంటి సవాళ్లు విసురుతున్నారని మండిపడ్డారు. ప్రాజెక్టును ధ్వంసం చేసిన వారు మళ్లీ అధికారంలోకి రావాలని చూస్తున్నారా అంటూ నిలదీశారు.
ఇక ఖమ్మం జిల్లాలో జరిగిన బహిరంగ సభలో ముఖ్యమంత్రి రేవంత్ రెడ్డి కాళేశ్వరం వ్యవహారంపై అత్యంత ఘాటుగా స్పందించారు. ప్రాజెక్టు అవినీతిపై, వైఫల్యాలపై కాంగ్రెస్ ప్రభుత్వం దూకుడుగా ముందుకు వెళ్తుండటంతో బీఆర్ఎస్ ఒక్కసారిగా డిఫెన్స్లో పడినట్లు కనిపిస్తోంది. ఎలాగైనా కాళేశ్వరం మేడిగడ్డ లేదా ఇతర పంప్ హౌస్ల నుంచి నీటిని ఎత్తిపోయించి, ఆ ఘనతను తమ ఖాతాలో వేసుకోవాలని, తద్వారా ప్రాజెక్టు రీ-డిజైనింగ్ సరైనదేనని నిరూపించాలని బీఆర్ఎస్ వ్యూహాలు రచిస్తోంది.
బీఆర్ఎస్ ప్రయత్నాలకు చెక్ పెట్టేందుకు కాంగ్రెస్ ప్రభుత్వం వ్యూహాత్మకంగా వ్యవహరిస్తోంది. ప్రాజెక్టు భద్రతను, నిపుణుల కమిటీ నివేదికలను అడ్డం పెట్టుకుని, తప్పుడు డిజైన్ల వల్ల ప్రజల సొమ్ము ఎలా బూడిదలో పోసిన పన్నీరైందో జనాల్లోకి తీసుకెళ్తోంది. బీఆర్ఎస్కు ఎలాంటి మైలేజ్ రాకుండా కాంగ్రెస్ కట్టడి చేస్తుండటంతో, నీటి ఎత్తిపోతల క్రెడిట్ పాలిటిక్స్ ఇప్పుడు తెలంగాణలో అత్యంత ఆసక్తికరంగా మారాయి. మునుముందు ఈ కాళేశ్వరం రాజకీయం ఎలాంటి మలుపులు తిరుగుతుందో చూడాలి.
