బే ఏరియాలో అదరగొట్టిన రాక్స్టార్ దేవిశ్రీ ప్రసాద్.. బాటా ఆధ్వర్యంలో ఘనంగా సంగీత విభావరి
- Published By: Vishal
- June 28, 2026 / 11:33 AM IST
BATA: జూన్ 26, శుక్రవారం రోజు శాన్ జోస్ సివిక్ సెంటర్లో జరిగిన సంగీత విభావరిలో ప్రముఖ సంగీత దర్శకుడు, రాక్స్టార్ దేవిశ్రీ ప్రసాద్ (DSP) తన అద్భుతమైన ప్రదర్శనతో అభిమానులను ఉర్రూతలూగించారు. బే ఏరియా తెలుగు అసోసియేషన్ (BATA) నిర్వహించిన ఈ కార్యక్రమం ‘హౌస్ఫుల్’ విజయంతో వేల సంఖ్యలో తరలివచ్చిన అభిమానులతో కళకళలాడింది.
అలుపెరగని ఉత్సాహం..
తన అనంతమైన శక్తితో ప్రేక్షకులను మూడు గంటల పాటు ఉర్రూతలూగించిన DSP, తన “రాక్స్టార్” ఇమేజ్ను మరోసారి నిలబెట్టుకున్నారు. 120 సినిమాల్లోని 800కు పైగా పాటల నుండి, పాత క్లాసిక్స్తో పాటు ఇటీవలి చార్ట్బస్టర్లను ఎంచుకుని, అన్ని వయసుల వారికి నచ్చేలా ఈ సంగీత విభావరిని తీర్చిదిద్దారు.
బాటా (BATA)తో సుదీర్ఘ అనుబంధం..
DSP , BATA మధ్య ఉన్న బలమైన అనుబంధాన్ని ఈ కార్యక్రమం మరోసారి చాటిచెప్పింది. 2008 నుండి DSP అమెరికా పర్యటనలలో శాన్ జోస్ ఒక ముఖ్యమైన కేంద్రంగా ఉందనీ, దీనిని ప్రతిసారీ BATA టీమ్ ఎంతో విజయవంతంగా నిర్వహిస్తుందని పేర్కొన్నారు. ముఖ్యంగా విజయ ఆసూరి, వీరు ఉప్పల, ప్రసాద్ మంగిన వంటి BATA నాయకత్వ బృందం ఈ ఈవెంట్ను దిగ్విజయం చేయడంలో చేసిన కృషిని అందరూ ప్రశంసించారు.
కొత్త చిత్రం ప్రకటన..
ఈ కార్యక్రమం సందర్భంగా DSP ఒక ఆసక్తికరమైన విషయాన్ని పంచుకున్నారు. ప్రముఖ నిర్మాత దిల్ రాజు నిర్మాణంలో, వేణు దర్శకత్వంలో రాబోతున్న ‘ఎల్లమ్మ’ సినిమాతో తాను హీరోగా పరిచయం అవుతున్నట్లు అధికారికంగా ప్రకటించారు. తన సంగీత దర్శకుడిగా మొదటి సినిమా ‘దేవి’ (1999) అని, ఇప్పుడు నటుడిగా తన మొదటి సినిమా ‘ఎల్లమ్మ’ అని, ఈ రెండు పేర్లు అమ్మవారికి సంబంధించినవి కావడం తనకు ఎంతో సంతోషాన్ని, శుభసూచికాన్ని ఇస్తుందని ఆయన భావోద్వేగంతో చెప్పారు.
మొత్తానికి ఈ కన్సర్ట్ ప్రేక్షకులకు పూర్తి “పైసా వసూల్” అనుభూతిని అందించింది. తనదైన శైలిలో డ్యాన్స్, గానం , వేదికపై తనదైన చరిష్మాతో, తెలుగు సంగీత పరిశ్రమలో దేవిశ్రీ ప్రసాద్ ఎందుకు అత్యంత ప్రజాదరణ పొందిన కళాకారుడో మరోసారి నిరూపించుకున్నారు.
