సహచరులకు క్షమాపణలు చెప్పిన బెన్ స్టోక్స్..!
- Published By: techteam
- June 25, 2026 / 03:27 PM IST
న్యూజిలాండ్తో జరగబోయే కీలకమైన మూడో టెస్ట్ మ్యాచ్కు ముందు ఇంగ్లాండ్ కెప్టెన్ బెన్ స్టోక్స్(Ben Stokes) తన జట్టు సహచరులకు, సపోర్ట్ స్టాఫ్కు వ్యక్తిగతంగా క్షమాపణలు చెప్పాడు. ఇటీవల నైట్క్లబ్ వివాదం, కర్ఫ్యూ నిబంధనల ఉల్లంఘన కారణంగా జట్టు దృష్టి మళ్లినందుకు తానే పూర్తి బాధ్యత వహిస్తున్నట్లు ఆయన ప్రకటించారు. ట్రెంట్ బ్రిడ్జ్లో జరిగే సిరీస్ నిర్ణయాత్మక మ్యాచ్లో గెలిచి తీరడమే ఇప్పుడు తన ముందున్న ఏకైక లక్ష్యమని స్టోక్స్ స్పష్టం చేశారు. లార్డ్స్లో జరిగిన మొదటి టెస్టు విజయం తర్వాత నైట్క్లబ్ ఘటన చోటుచేసుకుంది.
టీమ్ కర్ఫ్యూను ఉల్లంఘించినందుకు గానూ బెన్ స్టోక్స్, ఫాస్ట్ బౌలర్ గస్ అట్కిన్సన్లను ఇంగ్లాండ్(England) అండ్ వేల్స్ క్రికెట్ బోర్డు (ECB) రెండో టెస్ట్ మ్యాచ్ నుండి తప్పించింది. వీరిద్దరూ లేకపోవడం ఇంగ్లాండ్కు భారీ నష్టాన్ని చేకూర్చింది. ది ఓవల్లో జరిగిన రెండో టెస్టులో ఇంగ్లాండ్ 253 పరుగుల తేడాతో ఘోర పరాజయాన్ని మూటగట్టుకుంది. దీంతో మూడు మ్యాచ్ల ఈ టెస్ట్ సిరీస్ ప్రస్తుతం 1-1తో సమమైంది. వరుసగా ఆరు టెస్టుల్లో ఓడిపోవడంతో కెప్టెన్ బెన్ స్టోక్స్, హెడ్ కోచ్ బ్రెండన్ మెకల్లమ్ మధ్య విభేదాలు వచ్చాయంటూ వస్తున్న వార్తలను స్టోక్స్ పూర్తిగా కొట్టిపారేశారు.
“మేమిద్దరం చాలా మంచి స్నేహితులం. క్రికెట్ విషయాల్లో కొన్నిసార్లు మా ఆలోచనలు కలవకపోవచ్చు, కానీ దాని అర్థం మా మధ్య విభేదాలు ఉన్నట్లు కాదు” అని ఆయన స్పష్టం చేశారు. అలాగే రెండో టెస్టులో కెప్టెన్సీ బాధ్యతలు మోసి, విమర్శలు ఎదుర్కొన్న జో రూట్కు స్టోక్స్ అండగా నిలిచారు. మూడో టెస్టులో స్టోక్స్, అట్కిన్సన్ ఇద్దరూ తిరిగి జట్టులోకి రావడంతో, వివాదాలను పక్కనపెట్టి సిరీస్ కైవసం చేసుకోవాలని ఇంగ్లాండ్ పట్టుదలతో ఉంది.
ఇవి కూడా చదవండి
