ఐసీసీ వన్డే ర్యాంకింగ్స్‌లో గిల్ సంచలనం..!

టీమిండియా వన్డే కెప్టెన్ శుభ్‌మన్ గిల్(Shubhman Gill) ఐసీసీ తాజాగా విడుదల చేసిన వన్డే బ్యాటింగ్ ర్యాంకింగ్స్‌లో సరికొత్త మైలురాయిని అందుకున్నాడు. నిలకడైన ప్రదర్శనతో దూసుకుపోతున్న గిల్, రన్ మెషిన్ విరాట్ కోహ్లీని వెనక్కి నెట్టి రెండో ర్యాంకుకు చేరుకున్నాడు. గాయం కారణంగా విరాట్ కోహ్లీ(Virat Kohli) ఆఫ్ఘనిస్తాన్ సిరీస్‌కు దూరం కావడంతో ఆయన మూడో స్థానానికి పడిపోగా, రోహిత్ శర్మ నాలుగో స్థానంలో కొనసాగుతున్నారు. ప్రస్తుతం ఐసీసీ టాప్-10 వన్డే ర్యాంకింగ్స్‌లో ముగ్గురు భారతీయ బ్యాటర్లు చోటు దక్కించుకోవడం విశేషం.

ఇటీవల స్వదేశంలో ఆఫ్ఘనిస్తాన్‌తో జరిగిన వన్డే సిరీస్‌ను భారత్ 3-0తో క్లీన్ స్వీప్ చేయడంలో కెప్టెన్ శుభ్‌మన్ గిల్ కీలక పాత్ర పోషించాడు. ఈ సిరీస్‌లో అత్యధికంగా 238 పరుగులు చేసిన గిల్, మొదటి వన్డేలో నాటౌట్‌గా 84 పరుగులు, లక్నో వేడిలో జరిగిన రెండో వన్డేలో 154 పరుగులతో భారీ సెంచరీ బాది జట్టుకు విజయాలను అందించాడు. ప్రస్తుతం గిల్ 26 ఏళ్ల వయస్సులోనే వరల్డ్ నెం.1 స్థానంలో ఉన్న డారిల్ మిచెల్ కంటే కేవలం 24 రేటింగ్ పాయింట్లు మాత్రమే వెనుకబడి ఉన్నాడు. వచ్చే నెలలో ఇంగ్లాండ్‌తో జరగబోయే వన్డే సిరీస్‌లో రాణిస్తే గిల్ నెం.1 స్థానానికి చేరుకునే అవకాశాలు పుష్కలంగా ఉన్నాయి.

మరోవైపు ఆఫ్ఘనిస్తాన్‌తో జరిగిన చివరి వన్డేలో మ్యాచ్ విన్నింగ్ సెంచరీ చేసిన యువ ఓపెనర్ యశస్వి జైస్వాల్ ఏకంగా 84 స్థానాలు ఎగబాకి తన ఉనికిని చాటుకున్నాడు. అలాగే రెండో వన్డేలో శతకంతో చెలరేగిన ఇషాన్ కిషన్ 21 స్థానాలు మెరుగుపరుచుకుని 43వ ర్యాంకుకు చేరుకున్నాడు. బౌలింగ్ విభాగంలో అర్ష్‌దీప్ సింగ్ 16 స్థానాలు ఎగబాకి 22వ ర్యాంకుకు, ప్రసిద్ధ్ కృష్ణ 34 స్థానాలు జంప్ చేసి 58వ స్థానానికి చేరుకున్నారు. టెస్ట్ క్రికెట్ విషయానికి వస్తే, న్యూజిలాండ్ పేసర్ మ్యాట్ హెన్రీ ఐసీసీ టెస్ట్ బౌలింగ్ ర్యాంకింగ్స్‌లో సంచలనం సృష్టించాడు. ఇంగ్లాండ్‌తో జరిగిన రెండో టెస్టులో రెండు ఇన్నింగ్స్‌ల్లోనూ ఐదు వికెట్ల చొప్పున మొత్తం 11 వికెట్లు తీసి అద్భుత ప్రదర్శన చేయడంతో అతను నెం.1 స్థానానికి చేరుకున్నాడు. నవంబర్ 2024 నుండి టెస్ట్ బౌలింగ్‌లో ఒంటరిగా నెం.1 స్థానంలో కొనసాగుతున్న టీమిండియా స్టార్ జస్ప్రీత్ బుమ్రాతో కలిసి మ్యాట్ హెన్రీ ఇప్పుడు సంయుక్తంగా నెం.1 స్థానాన్ని పంచుకుంటున్నాడు.