టీ20ల్లోకి కేఎల్ రాహుల్ రీ-ఎంట్రీ..?
- Published By: techteam
- July 9, 2026 / 11:28 AM IST
ప్రస్తుత యూకే(UK) పర్యటనలో భారత టీ20 జట్టు ప్రదర్శన తీవ్ర నిరాశాజనకంగా సాగుతోంది. ఐర్లాండ్తో జరిగిన రెండు మ్యాచ్ల సిరీస్లోనూ విజయం సాధించలేకపోయిన మెన్ ఇన్ బ్లూ, ఆ తర్వాత ఇంగ్లండ్తో జరుగుతున్న టీ20 సిరీస్లోనూ వరుసగా రెండు మ్యాచ్ల్లో ఓటమి చవిచూసింది. వర్షం కారణంగా మొదటి మ్యాచ్ రద్దు కాగా, ఆ తర్వాతి మ్యాచ్లో 4 వికెట్ల తేడాతో, మూడో మ్యాచ్లో ఏకంగా 125 పరుగుల భారీ తేడాతో భారత్ ఘోర పరాజయాన్ని మూటగట్టుకుంది. ఈ వరుస ఓటముల నేపథ్యంలో భారత బ్యాటింగ్ లైనప్కు అనుభవజ్ఞుడైన ఆటగాడి అవసరం ఉందనే చర్చ మళ్లీ తెరపైకి వచ్చింది.
భారత జట్టు తడబడుతున్న వేళ, సీనియర్ ఓపెనర్ కేఎల్ రాహుల్ను(KL Rahul) మళ్లీ టీ20 జట్టులోకి తీసుకోవాలనే డిమాండ్ గట్టిగా వినిపిస్తోంది. భారత మాజీ ఓపెనర్ ఎస్. రమేష్ ఇన్స్టాగ్రామ్ వేదికగా స్పందిస్తూ రాహుల్కు గట్టిగా మద్దతు పలికారు. రాబోయే టీ20 ప్రపంచకప్ ఆస్ట్రేలియా, న్యూజిలాండ్ లాంటి పిచ్లపై జరగనుందని, అక్కడ నాణ్యమైన ఫాస్ట్ బౌలింగ్ను ఎదుర్కొని జట్టును నిలబెట్టగల సత్తా కేఎల్ రాహుల్కే ఉందంటూ ఆయన అభిప్రాయపడ్డారు. కేవలం ఫోర్లు, సిక్సర్లు బాదాలనే తొందరలో జట్టు తక్కువ పరుగులకే ఆలౌట్ అయ్యే ప్రమాదం ఉందని, అందుకే ఇన్నింగ్స్ను చక్కదిద్దే రాహుల్ లాంటి ఆటగాడు ఎంతో కీలకమని ఆయన స్పష్టం చేశారు.
2022 టీ20 ప్రపంచకప్ సెమీఫైనల్ తర్వాత కేఎల్ రాహుల్ను సెలక్టర్లు టీ20 జట్టు నుంచి పక్కన పెట్టారు. గతంలో ఆయన స్ట్రైక్ రేట్పై విమర్శలు వచ్చినప్పటికీ, తాజా ఐపీఎల్ సీజన్ లో రాహుల్ అద్భుతమైన ఫామ్ను ప్రదర్శించారు. ఏకంగా 174.41 స్ట్రైక్ రేట్తో 593 పరుగులు సాధించి విమర్శకులకు బ్యాట్తోనే సమాధానమిచ్చారు. అంతర్జాతీయ టీ20ల్లో 72 మ్యాచ్లు ఆడి 140 స్ట్రైక్ రేట్తో 2,265 పరుగులు చేసిన ట్రాక్ రికార్డ్ రాహుల్ సొంతం. కేఎల్ రాహుల్ ప్రస్తుతం భారత టెస్ట్ మరియు వన్డే జట్లలో అత్యంత కీలక సభ్యుడిగా కొనసాగుతున్నాడు. ఇటీవలే అతనిని టెస్టు జట్టుకు వైస్ కెప్టెన్గా కూడా నియమించి లీడర్షిప్ గ్రూప్లోకి తిరిగి తీసుకువచ్చారు. అయినప్పటికీ, టీ20 ఫార్మాట్లో అతని కెరీర్ ముగిసిపోయిందని చాలా మంది భావిస్తున్న తరుణంలో.. ప్రస్తుత జట్టు వైఫల్యాల వల్ల రాహుల్ రీ-ఎంట్రీకి మళ్లీ అవకాశాలు మెరుగవుతున్నాయా అనే సస్పెన్స్ నెలకొంది.
