సంజూ శాంసన్‌కు మళ్లీ అదే అన్యాయం..!

భారత క్రికెట్‌లో అత్యంత ప్రతిభావంతుడైన ఆటగాడు ఎవరంటే తడుముకోకుండా వినిపించే పేరు సంజూ శాంసన్(Sanju Samson). కానీ, అదే సమయంలో అత్యంత దురదృష్టవంతుడైన క్రికెటర్ ఎవరన్నా కూడా సంజూ పేరే వినిపిస్తుంది. అంతర్జాతీయ క్రికెట్‌లో అడుగుపెట్టి ఇన్నేళ్లవుతున్నా.. సంజూ శాంసన్‌కు ఇప్పటికీ భారత జట్టులో ఒక స్థిరమైన స్థానం లభించకపోవడంపై క్రికెట్ అభిమానులు తీవ్ర ఆగ్రహం వ్యక్తం చేస్తున్నారు. ఇంగ్లాండ్‌తో జరుగుతున్న ప్రస్తుత టీ20 సిరీస్‌లో భాగంగా రెండో మ్యాచ్‌ నుంచి సంజూను హఠాత్తుగా తుది జట్టు (Playing XI) నుంచి పక్కన పెట్టడం ఈ వివాదాన్ని మళ్లీ మొదటికి తెచ్చింది.

టీ20 ప్రపంచకప్‌ సాధించిన భారత జట్టులో సభ్యుడిగా ఉన్న సంజూ శాంసన్, యూకే (UK) పర్యటనలో ఆశించిన స్థాయిలో రాణించలేకపోయాడు. ఐర్లాండ్‌తో జరిగిన మ్యాచ్‌ల్లో వరుసగా 0, 5 పరుగులకే అవుట్ కాగా, ఇంగ్లాండ్‌తో జరిగిన మొదటి టీ20లో కేవలం ఒకే ఒక్క పరుగు చేసి పెవిలియన్ చేరాడు. అయితే, కేవలం మూడు ఇన్నింగ్స్‌లలో తక్కువ స్కోర్లకే అవుట్ అయ్యాడనే సాకుతో జట్టు నుంచి పక్కన పెట్టడం ఎంతవరకు న్యాయమనేది అభిమానుల ప్రశ్న. జట్టులోని ఇతర ఆటగాళ్లు వరుసగా వైఫల్యాలు ఎదుర్కొంటున్నా వారికీ ఇచ్చే సుదీర్ఘ అవకాశాలు, మద్దతు.. కేవలం సంజూ విషయంలో ఎందుకు లోపిస్తోందని సోషల్ మీడియా వేదికగా ఫ్యాన్స్ నిలదీస్తున్నారు.

సంజూను పక్కన పెట్టే సెలెక్షన్ కాల్ తర్వాత హెడ్ కోచ్ గౌతమ్ గంభీర్ మైదానంలో సంజూ చేతులు పట్టుకుని సుదీర్ఘంగా మాట్లాడటం, అతడిని ఓదార్చడం వంటి విజువల్స్ వైరల్ అయ్యాయి. శాంసన్‌కు కేవలం విశ్రాంతి మాత్రమే ఇచ్చామని మేనేజ్‌మెంట్ సంకేతాలు పంపే ప్రయత్నం చేసినప్పటికీ, అతని స్థానంలో 15 ఏళ్ల యువ సంచలనం వైభవ్ సూర్యవంశీని నేరుగా అరంగేట్రం చేయించడం చూస్తుంటే భవిష్యత్తు ప్రణాళికల్లో సంజూ ప్రాధాన్యత తగ్గుతోందా అనే అనుమానాలు బలపడుతున్నాయి.

సంజూ శాంసన్ కెరీర్‌ను గమనిస్తే.. అతను ఎప్పుడూ కత్తి మీద సాము చేసినట్టే ఆడాల్సి వస్తోంది. ఇతర టాప్ ఆర్డర్ బ్యాటర్లలాగా ఫెయిల్ అయినా సరే తదుపరి మ్యాచ్‌లలో చోటుంటుందనే భరోసా సంజూకు ఎప్పుడూ లభించలేదు. ప్రతి మ్యాచ్‌నూ అతను తన కెరీర్‌ను కాపాడుకునే ఒత్తిడితోనే ఆడాల్సి వస్తోంది. ఈ తీవ్రమైన మానసిక ఒత్తిడి కారణంగానే అతను కొన్నిసార్లు త్వరగా వికెట్ పారేసుకుంటున్నాడని, మేనేజ్‌మెంట్ అతనికి పక్కా భరోసా ఇస్తే నిలకడగా రాణిస్తాడని మాజీ క్రికెటర్లు సైతం అభిప్రాయపడుతున్నారు. సెలెక్టర్లు ఇప్పటికైనా పక్షపాత వైఖరి వీడి, సంజూ శాంసన్ లాంటి మ్యాచ్ విన్నర్‌కు పూర్తి స్థాయి అవకాశాలు ఇవ్వాలని ఫ్యాన్స్ డిమాండ్ చేస్తున్నారు.