ఓటీటీలోకి వచ్చి 4 రోజుల్లోనే మాయం! దిల్జిత్ సినిమాకు ఏమైంది?
- Published By: Sravani
- July 6, 2026 / 08:00 PM IST
దిల్జిత్ దోసాంజ్(Diljith Dosanjh) ప్రధాన పాత్రలో తెరకెక్కిన సట్లుజ్(Satluj) సినిమా రిలీజ్ జర్నీ మరోసారి అనూహ్య మలుపు తిరిగింది. థియేటర్లలో రిలీజ్ కు దాదాపు రెండేళ్ల పాటు ఎదురైన అవరోధాల తర్వాత ఈ సినిమా ఇటీవల ఓటీటీలో ప్రేక్షకుల ముందుకు వచ్చింది. అయితే స్ట్రీమింగ్ ప్రారంభమైన కొద్ది రోజులకే ప్లాట్ఫామ్ నుంచి సినిమా తొలగించబడటం చర్చనీయాంశంగా మారింది. ఈ పరిణామంపై స్పందించిన ఓటీటీ సంస్థ, ప్రస్తుతం లీగల్ ప్రాసెస్ కొనసాగుతోందని, సమస్యలు పరిష్కారమైన వెంటనే సినిమాను మళ్లీ అందుబాటులోకి తీసుకురావడానికి ప్రయత్నిస్తున్నట్లు వెల్లడించింది. దీంతో ఇప్పటికే సినిమా చూడలేకపోయిన ప్రేక్షకులు మరోసారి నిరాశకు గురయ్యారు.
ఈ సినిమా పంజాబ్లో జరిగిన అత్యంత సున్నితమైన చారిత్రక పరిణామాల నేపథ్యంలో రూపొందింది. మానవ హక్కుల కార్యకర్త జస్వంత్ సింగ్ ఖల్రా(Jaswanth Singh Khalra) వెలుగులోకి తీసుకొచ్చిన అంశాలను కథగా తీసుకుని డైరెక్టర్ హనీ త్రేహాన్(Honey Trehan) ఈ సినిమాను రూపొందించారు. ఆ కాలంలో జరిగిన ఘటనలను వాస్తవికంగా చూపించే ప్రయత్నం చేసిన ఈ సినిమాలో అర్జున్ రాంపాల్(Arjun Rampal) కూడా కీలక పాత్ర పోషించారు. ముఖ్యంగా దిల్జిత్ దోసాంజ్ నటనకు సోషల్ మీడియాలో మంచి రెస్పాన్స్ రావడంతో సినిమా మరింత చర్చకు వచ్చింది.
అయితే ఓటీటీ నుంచి సినిమా తొలగించబడిన తర్వాత కొన్ని కీలక సన్నివేశాలు సోషల్ మీడియాలో లీక్ కావడం మరో వివాదానికి దారితీసింది. ముఖ్యంగా ఖలిస్తాన్ ఉద్యమానికి సంబంధించిన భాగాలు వైరల్ అవుతుండటంతో ఈ అంశంపై చర్చ మరింత వేడెక్కింది. అయితే దీనిపై ఇప్పటివరకు డైరెక్టర్ గానీ, ప్రధాన నటీనటులు గానీ బహిరంగంగా స్పందించలేదు. ప్రస్తుతం న్యాయపరమైన వివాదం ఎలా ముగుస్తుంది, సినిమా మళ్లీ ఎప్పుడు స్ట్రీమింగ్లోకి వస్తుందనే అంశాలపై సినీ వర్గాలతో పాటు ప్రేక్షకుల్లో కూడా ఆసక్తి నెలకొంది.
