ప్రశ్న రావణ్ రిమాండ్ రిపోర్టులో ‘బాంబు’ పేల్చిన పోలీసులు..!

గన్నవరం పోలీసులు న్యాయస్థానానికి సమర్పించిన యూట్యూబర్ ప్రశ్న రావణ్(Prashna Ravan) రిమాండ్ రిపోర్టులో అత్యంత సంచలన విషయాలు వెలుగులోకి వచ్చాయి. ఆయనపై కేవలం ఒకట్రెండు కావు, రాష్ట్రవ్యాప్తంగా ఏకంగా 9 కేసులు నమోదైనట్లు పోలీసులు అధికారికంగా కోర్టుకు నివేదించారు. కేవలం సోషల్ మీడియా పోస్టులే కాకుండా, అత్యంత ప్రమాదకరమైన దేశ వ్యతిరేక భావజాలాన్ని వ్యాప్తి చేస్తున్నారనే కోణంలో పోలీసులు సేకరించిన ఆధారాలు ఇప్పుడు చర్చనీయాంశంగా మారాయి.

రిమాండ్ రిపోర్టులో పోలీసులు పేర్కొన్న అత్యంత తీవ్రమైన అంశం ఏమిటంటే.. నిషేధిత మావోయిస్టు అగ్రనేత ‘హిడ్మా’ను కీర్తిస్తూ ప్రశ్న రావణ్ ప్రసంగాలు చేశారు. సామాన్య యువత, విద్యార్థులను రెచ్చగొట్టి, వారిని దేశ వ్యతిరేక శక్తుల వైపు.. ముఖ్యంగా నిషేధిత మావోయిస్టు సంస్థల వైపు ఆకర్షించేలా ఆయన వ్యాఖ్యలు చేశారని పోలీసులు సాక్ష్యాలతో సహా రిపోర్టులో పొందుపరిచారు. ఏలూరులో జరిగిన ‘దళిత క్రైస్తవ సమావేశం’లో కూడా ఆయన అత్యంత వ్యూహాత్మకంగా రెచ్చగొట్టే ప్రసంగాలు చేశారని పోలీసులు స్పష్టం చేశారు.

రాజ్యాంగబద్ధమైన అత్యున్నత పదవుల్లో ఉన్న వ్యక్తులపై (సీఎం, డిప్యూటీ సీఎం) అత్యంత అసభ్యకరమైన, అవమానకరమైన వ్యాఖ్యలు చేయడం ద్వారా.. ప్రభుత్వ వ్యవస్థలపై సామాన్య ప్రజల్లో తీవ్ర ద్వేషాన్ని, వైషమ్యాలను పెంచేలా రావణ్ వ్యవహరించారని పోలీసులు ఆరోపించారు. సమాజంలో అరాచకం సృష్టించేందుకే ఆయన ఈ తరహా వ్యాఖ్యలు చేశారని వివరించారు. ఈ బలమైన దేశ వ్యతిరేక అంశాల ఆధారంగానే ఆయనపై కఠినమైన ‘ఉపా’ (UAPA) చట్టం ప్రయోగించాల్సి వచ్చిందని పోలీసులు రిమాండ్ రిపోర్టులో తేల్చి చెప్పారు.