సియోన్ లో ప్ర‌ముఖ క‌న్న‌డ న‌టుడు

శివకార్తికేయన్(Siva Karthikeyan) హీరోగా తెరకెక్కుతున్న సియోన్(Seyon) సినిమా షూటింగ్ ప్రస్తుతం వేగంగా కొనసాగుతోంది. డైరెక్ట‌ర్ శివ‌కుమార్ మురుగేశన్(Sivakumar murugesan) రూపొందిస్తున్న ఈ సినిమా ప్రారంభం నుంచే సినీ వర్గాల్లో మంచి ఆసక్తిని రేకెత్తిస్తోంది. ఈసారి శివ కార్తికేయ‌న్ గ్రామీణ‌ నేపథ్యంతో, భావోద్వేగాలకు ప్రాధాన్యం ఉన్న కథను ఎంచుకున్నట్లు ప్రచారం జరుగుతుండటంతో అభిమానుల్లో అంచనాలు మరింత పెరిగాయి. హీరోయిన్‌గా భాగ్యశ్రీ బోర్సే(Bhagyasri Borse) నటిస్తుండగా, సంగీతాన్ని సంతోష్ నారాయణన్(Santhosh Narayanan) అందిస్తున్నారు. తాజాగా ఈ ప్రాజెక్ట్‌కు సంబంధించిన మరో కీలక ప్రకటన ప్రేక్షకుల దృష్టిని ఆకర్షించింది.

మేక‌ర్స్ అఫీషియ‌ల్ గా రిలీజ్ చేసిన స్పెష‌ల్ పోస్టర్ ద్వారా ప్రముఖ కన్నడ నటుడు రాజ్ బి శెట్టి(Raj B Shetty) ఈ సినిమాలో కీలక పాత్ర పోషిస్తున్నట్లు వెల్లడించింది. కన్నడ చిత్రసీమలో తన సహజ నటనతో పాటు విభిన్న కథలను ఎంచుకునే నటుడిగా గుర్తింపు పొందిన రాజ్ బి శెట్టి, ఈ సినిమాతో కోలీవుడ్‌లో అడుగుపెడుతున్నారు. ఆయన ఎంట్రీతో ఈ సినిమాకు మరింత బలం చేకూరిందనే అభిప్రాయం వ్యక్తమవుతోంది. సోషల్ మీడియాలో కూడా ఈ పోస్టర్ వేగంగా వైరల్ అవుతూ అభిమానుల నుంచి మంచి స్పందన అందుకుంటోంది.

రాజ్ బి శెట్టి సాధారణంగా కథకు ప్రాధాన్యం ఉన్న సినిమాల‌కే ప్రాధాన్యత ఇస్తారనే అభిప్రాయం ప్రేక్షకుల్లో ఉంది. అందుకే ఆయన ఈ ప్రాజెక్ట్‌లో భాగమవ్వడం సియోన్ కథపై మరింత ఆసక్తిని పెంచింది. శివకార్తికేయన్‌కు ఇది మరో కీలక సినిమా కావడంతో పాటు, డైరెక్ట‌ర్ శివకుమార్ మురుగేశన్ నుంచి మరో బలమైన కథనాన్ని ఆశిస్తున్నవారి సంఖ్య కూడా పెరుగుతోంది. షూటింగ్ పూర్తయ్యే కొద్దీ ఈ సినిమాపై మరిన్ని అప్‌డేట్స్ కోసం అభిమానులు ఆసక్తిగా ఎదురుచూస్తున్నారు.