ఆటా 19వ మహాసభలకు హాజరుకావాలని నటుడు మురళీధర్ గౌడ్ పిలుపు

బాల్టిమోర్: అమెరికన్ తెలుగు సంఘం (ఆటా) ప్రతిష్టాత్మకంగా నిర్వహించబోయే 19వ మహాసభలకు సర్వం సిద్ధమైంది. ఈ వేడుకల గురించి ప్రముఖ నటుడు మురళీధర్ గౌడ్ అమెరికాలోని తెలుగు వారందరికీ ఒక ముఖ్యమైన సందేశాన్ని అందించారు. ఈ మహాసభలు జులై 31, ఆగస్టు 1 , 2 తేదీలలో బాల్టిమోర్ నగరంలో వైభవంగా జరగనున్నాయని ఆయన వెల్లడించారు.

ఈ మూడు రోజుల మహాసభలకు తాను కూడా హాజరవుతున్నానని మురళీధర్ గౌడ్ తెలిపారు. ఈ సందర్భంగా అమెరికాలో నివసిస్తున్న తెలుగు వారందరూ తప్పకుండా ఈ వేడుకలకు రావాలని ఆయన కోరారు. ఇంట్లోనే ఉండి వీడియోలు, ఫోటోలు చూస్తూ గడిపేయకుండా, అందరూ నేరుగా మహాసభలకు వస్తే పాత మిత్రులను కలుసుకోవచ్చని, కొత్త పరిచయాలు పెంచుకోవచ్చని పేర్కొన్నారు. అందరితో కలిసి ఎంతో సరదాగా గడిపే అవకాశం ఈ వేదిక ద్వారా లభిస్తుందని ఆయన అభిప్రాయపడ్డారు.

ఈ మహాసభలలో తెలంగాణ వంటకాలు ప్రత్యేక ఆకర్షణగా నిలవనున్నాయని, కడుపునిండా ఆ రుచులను ఆస్వాదిస్తూ ఎంతో మజా చేయవచ్చని చెప్పారు. పిల్లలు, పెద్దలు అందరూ కుటుంబ సమేతంగా పాల్గొని ఈ మహాసభలను ఆనందించాలని ఆయన పిలుపునిచ్చారు. ఇప్పటివరకు టికెట్లు బుక్ చేసుకోని వారు వెంటనే బుక్ చేసుకోవాలని మురళీధర్ గౌడ్ కోరారు.