టిక్ టాక్ వల్లే గెలిచా.. ట్రంప్ అకౌంట్స్ పథకం ప్రారంభించిన ట్రంప్…!

అమెరికా అధ్యక్షుడు ట్రంప్.. సోషల్ మీడియా ఫ్లాట్ ఫామ్ టిక్ టాక్ కు.. మద్దతుగా నిలిచారు. ఈ ప్లాట్‌ఫామ్‌ను అమెరికా సంస్థల యాజమాన్యంలోకి తీసుకువచ్చే ప్రయత్నాలకు తాను మద్దతు ఇస్తున్నట్లు చెప్పారు. “నేను చైనా అధ్యక్షుడు జిన్‌పింగ్‌కు ఫోన్ చేసి మాట్లాడాను. టిక్‌టాక్‌కు కూడా ఇది మంచిదేనని, అమెరికాకు చెందిన అగ్రశ్రేణి కంపెనీలు దీనిని సొంతం చేసుకోవడం మాకూ మంచిదని చెప్పాను” అని ట్రంప్ వివరించారు. చైనా ఎప్పుడూ తమకు గట్టి పోటీదారే అయినప్పటికీ, అమెరికా వినియోగదారుల్లో ఈ యాప్‌కు ఉన్న విపరీతమైన ప్రజాదరణను దృష్టిలో ఉంచుకుని ఈ వివాదాన్ని చూడాలని, కేవలం నిషేధించాలనే వాదన సరికాదని ట్రంప్ అభిప్రాయపడ్డారు.

అమెరికా అధ్యక్ష ఎన్నికల్లో తన ఘనవిజయానికి సోషల్ మీడియా ప్లాట్‌ఫామ్ ‘టిక్‌టాక్’ ఎంతగానో దోహదపడిందని అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. చైనా యాజమాన్యంలోని ఈ యాప్ వల్ల జాతీయ భద్రతకు ముప్పు ఉందంటూ వాషింగ్టన్ రాజకీయ వర్గాల్లో ఆందోళనలు వ్యక్తమవుతున్నప్పటికీ, ఈ ప్లాట్‌ఫామ్‌లో తనకు ఉన్న ఆదరణే దాని ప్రభావానికి నిదర్శనమని ఆయన పేర్కొన్నారు. వైట్‌హౌస్‌లో పిల్లల కోసం ‘ట్రంప్ అకౌంట్స్’ పథకాన్ని ప్రారంభించిన అనంతరం మీడియాతో మాట్లాడిన ట్రంప్.. టిక్‌టాక్‌లో అత్యధిక ఫాలోవర్లు ఉన్న ఏకైక రాజకీయ నాయకుడిని తానేనని చెప్పుకొచ్చారు.

అమెరికాలో టిక్‌టాక్ భవిష్యత్తు ఎలా ఉండబోతోంది? దీనిని అమెరికన్ ఇన్వెస్టర్లు కొనుగోలు చేయాలా? అని విలేకరులు అడిగిన ప్రశ్నలకు ట్రంప్ స్పందించారు. “టిక్‌టాక్‌లో నేనే అందరికంటే చాలా ముందున్నాను. నిజం చెప్పాలంటే.. ఈ యాప్ వల్లే నేను ఎన్నికల్లో ఏకపక్షంగా ఘనవిజయం సాధించానని భావిస్తున్నాను” అని ట్రంప్ వ్యాఖ్యానించారు. చైనా యాజమాన్యం కారణంగా ఈ యాప్ వల్ల గూఢచర్య ముప్పు పొంచి ఉందంటూ ఒక టీవీ షోలో చర్చించడాన్ని తాను చూశానని చెప్పారు. పాలసీ మేకర్లు దీనిపై ఆందోళన వ్యక్తం చేస్తున్న విషయాన్ని ఆయన అంగీకరించారు. అయితే, ఆ వాదనను తోసిపుచ్చుతూ.. “ఒకవేళ ఈ యాప్ అంతగా ప్రభావితం చేయగలిగితే.. నేను దేశాన్ని ప్రేమిస్తున్నానని, దేశం కోసం ఎన్నో పనులు చేయబోతున్నానని ఇందులో చెబుతున్నాను కదా” అని ట్రంప్ పేర్కొన్నారు.

ఇటీవల విడుదలైన ఆడియన్స్ ర్యాంకింగ్స్‌లో ప్రముఖ సెలబ్రిటీల కంటే తానే ముందున్నానని ట్రంప్ ఈ సందర్భంగా వెల్లడించారు. “తాజా గణాంకాల ప్రకారం ప్రముఖ సింగర్ టేలర్ స్విఫ్ట్ 11వ స్థానంలో ఉంటే, నేనే నంబర్ వన్ స్థానంలో ఉన్నాను” అని చెప్పారు. ఇదే సమయంలో టిక్‌టాక్ వ్యవహారంపై తాను చైనా అధ్యక్షుడు జిన్‌పింగ్‌తో మాట్లాడినట్లు ట్రంప్ బహిర్గతం చేశారు.