ఓటమిపై గౌతమ్ గంభీర్ ఫైర్..!

ఇంగ్లాండ్(England) పర్యటనలో ఉన్న భారత యువ క్రికెట్ జట్టు వరుస ఓటములతో ఇబ్బందులు పడుతోంది. ట్రెంట్ బ్రిడ్జ్ వేదికగా జరిగిన మూడో టీ20 మ్యాచ్‌లో శ్రేయస్ అయ్యర్(Shreyas Iyer) నేతృత్వంలోని టీమిండియా 125 పరుగుల భారీ తేడాతో ఇంగ్లాండ్ చేతిలో ఘోర పరాజయాన్ని మూటగట్టుకుంది. ఈ ఘోర ఓటమి తర్వాత టీమిండియా హెడ్ కోచ్ గౌతమ్ గంభీర్(Gambhir) నిర్వహించిన ప్రెస్ కాన్ఫరెన్స్ ఉత్కంఠకు దారితీసింది. విలేకరులు అడిగిన సూటిపోటి ప్రశ్నలకు గంభీర్ తనదైన శైలిలో నిర్మొహమాటంగా, అత్యంత ఘాటుగా సమాధానాలిచ్చాడు.

ప్రెస్ కాన్ఫరెన్స్ ప్రారంభంలోనే ఒక భారత జర్నలిస్ట్ “కోచ్.. వరుసగా ఐదు ఓటముల తర్వాత..” అంటూ ప్రశ్న అడగబోగా, గంభీర్ వెంటనే జోక్యం చేసుకుని అతని తప్పును సరిదిద్దాడు. “ఐదు కాదు.. నాలుగు ఓటములు. మ్యాచ్‌ను కాస్త బాగా చూస్తే బాగుంటుంది” అని నవ్వుతూనే గట్టి కౌంటర్ ఇచ్చాడు. మూడు మ్యాచ్‌ల క్రితం వరకు వరల్డ్ ఛాంపియన్లుగా ఉన్న భారత్, ఐర్లాండ్ చేతిలో క్లీన్ స్వీప్ అవ్వడంతో పాటు ఇక్కడ ఇంగ్లాండ్‌లో కూడా రెండు మ్యాచ్‌లు ఓడిపోవడంపై విలేకరులు ప్రశ్నించగా.. “మేము బాగా ఆడలేదు, అంతే.. అంతకంటే చెప్పడానికి ఏమీ లేదు” అని గంభీర్ ఒప్పుకున్నాడు.

కేవలం నాలుగు మ్యాచ్‌లు ఓడిపోయినంత మాత్రాన ఒక జట్టు చెడ్డ జట్టుగా మారిపోదని ఆయన స్పష్టం చేశాడు. ఈ సిరీస్‌లో వికెట్ కీపర్ బ్యాటర్ సంజూ శాంసన్‌ను పక్కన పెట్టడంపై వస్తున్న విమర్శలకు గంభీర్ స్పందించాడు. వరల్డ్ కప్‌లో సంజూ శాంసన్ ప్రదర్శన అద్భుతంగా ఉందని కొనియాడిన గంభీర్, ఈ సిరీస్‌లో తదుపరి మ్యాచ్‌లలో సంజూ తిరిగి జట్టులోకి రాకూడదనే కఠినమైన నియమమేమీ లేదంటూ హింట్ ఇచ్చాడు. భారత ఇన్నింగ్స్‌ లో ఏకైక సానుకూల అంశంగా నిలిచిన యువ బౌలర్ ప్రిన్స్ యాదవ్ ప్రదర్శనను ఒక జర్నలిస్ట్ ప్రస్తావిస్తూ.. అతను అంతర్జాతీయ క్రికెట్‌ లోకి బాతు నీటిలోకి వెళ్ళినట్లు అలవాటు పడిపోయాడని అనగా, గంభీర్ అతన్ని మధ్యలోనే అడ్డుకున్నాడు. “ఆగండి.. అతను ఆడింది కేవలం రెండు మ్యాచ్‌లు మాత్రమే. అంత త్వరగా ఒక అంచనాకు వచ్చేయకండి” అని హితవు పలికాడు.