‘క్వీన్ 2’ పై రూ.250 కోట్ల కేసు… కానీ అసలు ట్విస్ట్ మాత్రం ఇదే!

– సూర్య ప్రకాష్ జోశ్యుల

ఒకప్పుడు అదే సినిమా కంగనా రనౌత్‌కు జాతీయ అవార్డు తెచ్చిపెట్టింది.
ఇప్పుడు అదే సినిమా… ఆమె కొత్త చిత్రాన్ని కోర్టు గుమ్మం వరకు తీసుకొచ్చింది.
ఒక కథ… ఇద్దరు నిర్మాతలు… రెండు వాదనలు.
మరి అసలు ‘క్వీన్’ ఎవరిది?
ఇప్పుడు బాలీవుడ్‌లో అందరూ మాట్లాడుకుంటున్న ప్రశ్న ఇదే.

వివాదం ఏమిటి?

కంగనా రనౌత్ ప్రధాన పాత్రలో తెరకెక్కుతున్న ‘క్వీన్ 2’ విడుదలకు ముందే భారీ లీగల్ వివాదంలో చిక్కుకుంది. 2014లో విడుదలై విమర్శకుల ప్రశంసలు అందుకున్న ‘క్వీన్’ చిత్ర మేధో సంపత్తి (IP) హక్కులను ఉల్లంఘిస్తూ ఈ సినిమా తెరకెక్కించారని ఆరోపిస్తూ ఫాంటమ్ స్టూడియోస్ బాంబే హైకోర్టును ఆశ్రయించింది. ఏకంగా రూ.250 కోట్ల నష్టపరిహారం కోరుతూ దావా వేయడంతో ఈ వ్యవహారం బాలీవుడ్‌లో హాట్ టాపిక్‌గా మారింది.

అయితే అసలు వివాదం పేరు గురించా… కథ గురించా?

ఇదే ఇప్పుడు అందరినీ కన్ఫ్యూజ్ చేస్తున్న ప్రశ్న.పైపైన చూస్తే ‘క్వీన్ 2’ అనే టైటిల్‌పైనే వివాదం అనిపిస్తుంది. కానీ ఫాంటమ్ స్టూడియోస్ వాదన మాత్రం అంతకంటే పెద్దది. తమ అనుమతి లేకుండా ఒరిజినల్ ‘క్వీన్’ చిత్రానికి సంబంధించిన మేధో సంపత్తిని ఉపయోగించి ఈ సినిమా రూపొందించారని సంస్థ ఆరోపిస్తోంది.

ఫాంటమ్ స్టూడియోస్ ప్రకారం… 2014లో వచ్చిన ‘క్వీన్’ చిత్ర ఐపీ హక్కుల్లో తమకు 50 శాతం వాటా ఉంది. అందువల్ల ఆ చిత్రానికి సంబంధించిన సీక్వెల్‌లు, స్పిన్-ఆఫ్‌లు లేదా ఇతర రూపాల్లో కొత్త సినిమాలు రూపొందించాలంటే తమ అనుమతి తప్పనిసరి అని కోర్టులో వాదిస్తోంది.

ఇక్కడే కథలో మరో ట్విస్ట్…

ఈ కొత్త సినిమాకు దర్శకత్వం వహించింది కూడా ‘క్వీన్’ దర్శకుడు వికాస్ బహల్. హీరోయిన్ కూడా కంగనా రనౌత్‌నే. అదే దర్శకుడు… అదే హీరోయిన్… ‘క్వీన్ 2’ అనే టైటిల్. ఈ మూడు అంశాలే ఇప్పుడు అనుమానాలకు కారణమయ్యాయి.

కానీ జియోస్టార్ కథ మరోలా చెబుతోంది…

ఫాంటమ్ ఆరోపణలను చిత్ర నిర్మాణ భాగస్వామి జియోస్టార్ పూర్తిగా ఖండించింది. తాము తెరకెక్కిస్తున్న సినిమా పూర్తిగా కొత్త కథతో రూపొందిందని, దీనికి 2014లో వచ్చిన ‘క్వీన్’ చిత్ర కథతో, పాత్రలతో, సన్నివేశాలతో లేదా ఇతర క్రియేటివ్ అంశాలతో ఎలాంటి సంబంధం లేదని స్పష్టం చేసింది.

“ఇది సీక్వెల్ కాదు… ప్రీక్వెల్ కాదు… పూర్తిగా ఒరిజినల్ సినిమా” అని జియోస్టార్ అధికారికంగా ప్రకటించింది. అంతేకాదు… ‘క్వీన్’ అనేది ఆంగ్ల భాషలో సాధారణ పదమని, అలాంటి పదంపై ఏ ఒక్క సంస్థ ప్రత్యేక హక్కులు క్లెయిమ్ చేయలేదని కూడా వాదిస్తోంది.

అసలు ఈ IP హక్కులు అంటే ఏమిటి?

ఒక సినిమా కథ, పాత్రలు, స్క్రీన్‌ప్లే, బ్రాండ్ విలువ, అలాగే సీక్వెల్ రూపొందించే హక్కులు వంటి అంశాలను కలిపి ఇంటెలెక్ట్యువల్ ప్రాపర్టీ (IP) అంటారు.

ఈ హక్కులే ఇప్పుడు కోర్టులో అసలు పోరాటానికి కేంద్రబిందువయ్యాయి.

కంగనాకు ఎందుకు ఇది కీలకం?

ఇటీవలి కాలంలో కంగనా నటించిన సినిమాలు ఆశించిన విజయాలు అందుకోలేదు. అలాంటి సమయంలో ఆమె కెరీర్‌కు మరోసారి ఊపిరి పోస్తుందనే అంచనాలతో ‘క్వీన్ 2’ రూపొందుతోంది.

షూటింగ్ పూర్తయి ప్రస్తుతం పోస్ట్ ప్రొడక్షన్ దశలో ఉన్న ఈ చిత్రం విడుదలకు సిద్ధమవుతున్న సమయంలోనే ఈ కేసు రావడం నిర్మాతలకు కొత్త సవాలుగా మారింది.

ఇది ‘క్వీన్ 2’ కేసు మాత్రమే కాదు… భారతీయ సినిమా పరిశ్రమలో “ఒక హిట్ సినిమా అసలు యజమాని ఎవరు?” అనే పెద్ద ప్రశ్నను మళ్లీ తెరపైకి తీసుకొచ్చిన కేసు. కోర్టు తీర్పు భవిష్యత్తులో వచ్చే సీక్వెల్‌లు, రీమేక్‌లు, ఫ్రాంచైజీలపై కూడా ప్రభావం చూపే అవకాశం ఉంది.

“ఇది మొదటిసారి కాదు…”

అవును. ఇలాంటి IP (Intellectual Property), సీక్వెల్ హక్కులు, టైటిల్ హక్కులు చుట్టూ బాలీవుడ్‌లో గతంలో కూడా వివాదాలు జరిగాయి.

1. ‘ఆశికీ 3’ వివాదం

టి-సిరీస్, Vishesh Films మధ్య ‘ఆశికీ’ ఫ్రాంచైజీ హక్కులు వివాదానికి దారితీశాయి. దీంతో సినిమా టైటిల్‌పై మార్పులు చేయాల్సిన పరిస్థితి వచ్చింది.

2. ‘ఓ మై గాడ్’ (OMG) ఫ్రాంచైజీ

Akshay Kumar నటించిన ‘OMG’ సిరీస్‌లో కూడా కథ, ఫ్రాంచైజీ హక్కులపై చర్చలు జరిగాయి. అయితే అది కోర్టు స్థాయికి వెళ్లలేదు.

3. ‘హేరా ఫేరీ 3’

Paresh Rawal సినిమా నుంచి తప్పుకోవడం, ఒప్పందాలు, హక్కుల అంశాలు కోర్టు వరకు వెళ్లి పెద్ద చర్చకు దారితీశాయి. ఇది IP కంటే కాంట్రాక్ట్ వివాదం అయినప్పటికీ, సినిమా హక్కులపై ఎంత పెద్ద లీగల్ ఫైట్ జరుగుతుందో చూపించింది.

ఇప్పుడు కోర్టు తీర్పే కీలకం

ఫాంటమ్ స్టూడియోస్ చెబుతున్నది ఒకటే… “ఇది మా ఐపీ హక్కులకు సంబంధించిన విషయం.”

జియోస్టార్ చెబుతున్నది కూడా ఒక్కటే… “ఇది పూర్తిగా కొత్త సినిమా.”

ఈ రెండు వాదనల్లో ఏది నిజం?

ఒక సినిమా టైటిల్ మాత్రమే సరిపోతుందా వివాదానికి? అదే దర్శకుడు, అదే హీరోయిన్ ఉండటం సీక్వెల్‌కు నిదర్శనమా? లేక పూర్తిగా కొత్త కథ అయితే ‘క్వీన్ 2’ అనే పేరును ఉపయోగించే హక్కు నిర్మాతలకు ఉందా?

ఈ ప్రశ్నలన్నింటికీ సమాధానం ఇప్పుడు బాంబే హైకోర్టు తీర్పులోనే దాగి ఉంది. అప్పటి వరకు బాలీవుడ్‌లో వినిపించే పెద్ద ప్రశ్న మాత్రం ఒక్కటే…

అసలు ‘క్వీన్’ ఎవరిది?