న్యూయార్క్లో విషాదం.. రోడ్డు ప్రమాదంలో ఏపీ విద్యార్థిని అట్లూరి ప్రసన్న దుర్మరణం!
- Published By: Vishal
- July 8, 2026 / 10:28 AM IST
అమరావతి: అమెరికాలోని న్యూయార్క్లో జరిగిన ఒక దురదృష్టకర రోడ్డు ప్రమాదంలో ఆంధ్రప్రదేశ్కు చెందిన అట్లూరి ప్రసన్న (25) అనే యువతి ప్రాణాలు కోల్పోయింది. ఎన్టీఆర్ జిల్లా, ఇబ్రహీంపట్నం మండలం, మూలపాడు గ్రామానికి చెందిన ప్రసన్న, జులై 5న తెల్లవారుజామున ఈ ప్రమాదానికి గురైంది.
న్యూయార్క్ స్టేట్ పోలీసుల కథనం ప్రకారం, ప్రయాణిస్తున్న కారు స్టేట్ రూట్స్ 224 , 13 కూడలి వద్ద ఉన్న ట్రాఫిక్ సిగ్నల్ వద్ద ఆపకుండా ముందుకు వెళ్లడంతో ఈ ప్రమాదం జరిగింది. ఆ సమయంలో గ్రీన్ సిగ్నల్తో వస్తున్న బ్రయాన్ జె. వుడ్వర్త్ అనే వ్యక్తి నడుపుతున్న మరో వాహనం ప్రయాణిస్తున్న కారును బలంగా ఢీకొట్టింది. ఈ ఘోర ప్రమాదంలో కారు వెనుక సీటులో కూర్చున్న ప్రసన్న అక్కడికక్కడే మరణించింది. రాబర్ట్ ప్యాకర్ ఆసుపత్రిలో చికిత్స పొందుతూ ఆమె మృతి చెందినట్లు వైద్యులు ధృవీకరించారు. కారులోని డ్రైవర్ , మరో ఇద్దరు ప్రయాణికులు గాయపడగా, వారిని ఆసుపత్రికి తరలించారు.
అయితే, ప్రసన్న కుటుంబ సభ్యులు , ఆమె బంధువు రవికుమార్ ఏర్పాటు చేసిన ‘గోఫండ్మీ’ (GoFundMe) పేజీలో పేర్కొన్న వివరాల ప్రకారం, ఎదురుగా వస్తున్న కారు రెడ్ లైట్ జంప్ చేయడం వల్లే ఈ ప్రమాదం జరిగిందని వారు తెలిపారు. ప్రసన్న ఇటీవలే న్యూయార్క్లోని పేస్ యూనివర్సిటీ నుంచి తన గ్రాడ్యుయేషన్ పూర్తి చేసుకుని, ఉద్యోగ వేటలో ఉన్న తరుణంలో ఈ విషాదం చోటుచేసుకోవడం ఆమె కుటుంబ సభ్యులను శోకసంద్రంలో ముంచెత్తింది. ప్రస్తుతం ప్రసన్న పార్థివ దేహాన్ని స్వగ్రామానికి తరలించేందుకు కుటుంబ సభ్యులు ప్రయత్నాలు చేస్తున్నారు. ఈ ఘటనపై పోలీసులు దర్యాప్తు కొనసాగిస్తున్నారు.
ఇవి కూడా చదవండి
