మిడిల్ క్లాస్‌కు బిగ్ షాక్..! EMI కట్టగలం… కానీ కొనడానికి ఇల్లే లేదు!

—సూర్య ప్రకాష్ జోశ్యుల

ఒక్క ఫోన్…
ఒక మధ్యతరగతి కుటుంబాన్ని ఆకాశంలోకి ఎత్తేసింది.
ఇంకో ఫోన్…
అదే కుటుంబాన్ని ఒక్కసారిగా నేల మీదకు పడేసింది.
ఇంట్లో ఆనందం…
కొన్ని నిమిషాల్లోనే నిశ్శబ్దం.
కారణం?
ఉద్యోగం పోయిందా?
కాదు.
బ్యాంక్ లోన్ రాలేదా?

అదీ కాదు.

మరి… ఏం జరిగింది?
మొదటి ఫోన్ బ్యాంక్ నుంచి వచ్చింది.
“సర్… మీ హోమ్ లోన్ అప్రూవ్ అయింది.”

ఏళ్ల తరబడి ఎదురుచూసిన సొంతింటి కల ఇంకొన్ని అడుగుల దూరంలోకి వచ్చినట్టే అనిపించింది.

కానీ కొన్ని నిమిషాల తర్వాత బిల్డర్ నుంచి మరో ఫోన్.

“సర్… మీరు చూసిన ఫ్లాట్‌కు కొత్త రేట్లు వచ్చాయి. ధర మళ్లీ పెరిగింది.”

అంతే… ఒక్క ఫోన్ కలను దగ్గర చేస్తే… ఇంకో ఫోన్ అదే కలను మళ్లీ దూరం చేసింది.

ఇది సినిమా సీన్ కాదు.

ఒక్క కుటుంబం కథ కూడా కాదు.

దేశంలో నిశ్శబ్దంగా జరుగుతున్న ఒక పెద్ద మార్పుకు ఇది చిన్న ఉదాహరణ మాత్రమే. మధ్యతరగతి ఇప్పుడు డబ్బుతో కాదు… మార్కెట్‌తో ఓడిపోతోందా?. ఒకప్పుడు సొంతిల్లు కొనడంలో పెద్ద సవాల్ డబ్బు కూడబెట్టడం. ఇప్పుడు పరిస్థితి మారిపోయింది.

డబ్బు కూడబెట్టినా…
జీతం పెరిగినా…
బ్యాంక్ లోన్ వచ్చినా…

“మీ బడ్జెట్‌లో ఇల్లు లేదు” అనే మాట చాలామందికి కొత్త వాస్తవంగా మారుతోంది. ఇది కేవలం భావోద్వేగం కాదు.భారత రియల్ ఎస్టేట్ మార్కెట్‌పై విడుదలైన తాజా గణాంకాలు కూడా ఇదే దిశను చూపిస్తున్నాయి.

రిపోర్ట్ ఏమి చెబుతోంది?

నైట్ ఫ్రాంక్ ఇండియా విడుదల చేసిన ‘ఇండియా రియల్ ఎస్టేట్: 2026’ నివేదిక ప్రకారం…

2026 తొలి ఆరు నెలల్లో దేశంలోని ఎనిమిది ప్రధాన నగరాల్లో 1,71,471 ఇళ్లు అమ్ముడయ్యాయి.

అదే సమయంలో 1,87,350 కొత్త ఇళ్లు మార్కెట్లోకి వచ్చాయి.

మొదటి చూపుకు ఇది బలమైన మార్కెట్‌లా కనిపిస్తుంది.

కానీ అసలు ట్విస్ట్ ఇంకో చోట ఉంది.

ఇప్పుడు దేశంలో అమ్ముడవుతున్న ప్రతి రెండు ఇళ్లలో ఒకటి… రూ.1 కోటి కంటే ఎక్కువ విలువైనదే.

అంటే మొత్తం అమ్మకాలలో 54 శాతం ప్రీమియం హౌసింగ్‌దే.

మరోవైపు…

రూ.50 లక్షల లోపు ఇళ్ల అమ్మకాలు గత ఏడాదితో పోలిస్తే 15 శాతం తగ్గిపోయాయి. మార్కెట్ పెరుగుతోంది… కానీ ఆ పెరుగుదల మధ్యతరగతి బడ్జెట్‌లో కనిపించడం లేదు.

హైదరాబాద్‌లోనూ ఇదే ఫీలింగ్..!

హైదరాబాద్‌తో పాటు తెలుగు రాష్ట్రాల్లోని పలు పట్టణాల్లో కూడా గత కొన్నేళ్లుగా భూమి, అపార్ట్‌మెంట్ ధరలు పెరిగిన విషయాన్ని కొనుగోలుదారులు తరచూ చెబుతున్నారు.

ఒకప్పుడు మధ్యతరగతి బడ్జెట్‌లో ఆలోచించగలిగిన ప్రాంతాలు… ఇప్పుడు చాలామందికి అందుబాటుకు దూరమవుతున్నాయని మార్కెట్‌ను గమనిస్తున్నవారు అంటున్నారు.

అందుకే ఇప్పుడు ఒక మాట ఎక్కువగా వినిపిస్తోంది.

“EMI కట్టగలం… కానీ కొనడానికి బడ్జెట్‌లో ఇల్లే లేదు.”

At a Glance

✅ దేశవ్యాప్తంగా ఇళ్ల అమ్మకాలు స్ట్రాంగ్ గానే ఉన్నాయి.

✅ రూ.1 కోటి పైబడిన ఇళ్లే మొత్తం అమ్మకాలలో 54% వాటా దక్కించుకున్నాయి.

✅ రూ.50 లక్షల లోపు ఇళ్ల అమ్మకాలు 15% తగ్గాయి.

✅ డెవలపర్లు ప్రీమియం ప్రాజెక్టులపై ఎక్కువ దృష్టి పెడుతున్నారు.

✅ కొత్త లాంచ్‌లు అమ్మకాల కంటే ఎక్కువగా వస్తున్నాయి.

✅ ఆఫర్లు రావచ్చు… కానీ ధరలు తగ్గుతాయని ఎలాంటి హామీ లేదు.

ఎందుకు ఇలా జరుగుతోంది?

దీనికి ఒక్క కారణం లేదు. భూమి ధరలు పెరిగాయి. నిర్మాణ వ్యయం పెరిగింది. ప్రీమియం ప్రాజెక్టుల్లో లాభాలు ఎక్కువగా ఉన్నాయి. అందుకే అనేక డెవలపర్లు తక్కువ ధర ఇళ్ల కంటే లగ్జరీ ప్రాజెక్టుల వైపు మొగ్గు చూపుతున్నారు. ఫలితంగా మధ్యతరగతి కొనుగోలుదారులకు ఎంపికలు తగ్గుతున్నాయి.

ఇప్పుడు కొనాలా… వేచి చూడాలా?

కొత్త ప్రాజెక్టులు మార్కెట్లోకి ఎక్కువగా వస్తున్నాయి. దీంతో భవిష్యత్తులో బిల్డర్లు ఫ్లెక్సిబుల్ పేమెంట్ ప్లాన్లు, ఇతర ప్రోత్సాహక ఆఫర్లు ప్రకటించే అవకాశం ఉందని నివేదిక సూచిస్తోంది. అయితే ఒక విషయం మాత్రం స్పష్టం.

ఆఫర్లు రావచ్చు…కానీ ఇళ్ల ధరలు తగ్గుతాయని ఈ నివేదిక ఎక్కడా చెప్పడం లేదు.

ఏదైమైనా…

రియల్ ఎస్టేట్ మార్కెట్ బలపడుతోంది.

దేశ ఆర్థిక వ్యవస్థ ముందుకు వెళ్తోంది. కానీ మధ్యతరగతి మనసులో మాత్రం ఇంకా అదే ఫోన్ మోగుతోంది.

“సర్… మీ హోమ్ లోన్ అప్రూవ్ అయింది.”

వెంటనే మరో స్వరం…

“సర్… మీరు చూసిన ఫ్లాట్ ధర మళ్లీ పెరిగింది.”

ఒక్క ఫోన్ ఆశను ఇస్తోంది… ఇంకో ఫోన్ ఆ ఆశను తీసుకెళ్తోంది.

బహుశా… భారత రియల్ ఎస్టేట్ మార్కెట్‌పై వచ్చిన తాజా నివేదికలోని అతి పెద్ద గణాంకం ఇదేమో కాదు.

అతి పెద్ద ప్రశ్న మాత్రం ఇదే…

మధ్యతరగతి జీవితంలో ఆ రెండో ఫోన్ ఎప్పుడు ఆగుతుంది?