మీరు ఎక్కడికి వెళ్లారో ప్రభుత్వానికి తెలిసిపోతుందా..? కొత్త టోల్ టెక్నాలజీ

–సూర్య ప్రకాష్ జోశ్యుల

బ్యాంక్ అకౌంట్ హ్యాక్ అయితే డబ్బులు పోతాయి… మీ లొకేషన్ డేటా లీక్ అయితే..? ప్రపంచాన్ని ఆలోచింపజేస్తున్న కొత్త టోల్ వ్యవస్థ!

బ్యాంక్ అకౌంట్‌లో ఉన్న డబ్బు పోతే… మళ్లీ సంపాదించవచ్చు.

కానీ… మీరు ఎక్కడికి వెళ్లారు… ఎప్పుడు వెళ్లారు… ఏ ప్రాంతాల్లో తిరిగారు… అనే లొకేషన్ డేటా ఒకసారి బయటకు వెళ్తే?

మీ రోజువారీ అలవాట్లు…

మీ ప్రయాణ మార్గాలు…

మీ కదలికల తీరు…

ఒకవేళ ఇవన్నీ ఒక వ్యవస్థలో నమోదైతే? అది ఎంత సురక్షితం? ఇదేదో సైన్స్ ఫిక్షన్ సినిమా కాదు. ప్రపంచవ్యాప్తంగా ఇప్పుడు ఇదే చర్చ జరుగుతోంది.

టోల్ గేట్లను పూర్తిగా తొలగించి, శాటిలైట్ ఆధారంగా టోల్ వసూలు చేసే ERP 2.0 వ్యవస్థను సింగపూర్ దేశవ్యాప్తంగా అమలు చేస్తోంది. కానీ ప్రపంచం మాట్లాడుకుంటోంది మాత్రం టోల్ గురించి కాదు… ప్రైవసీ గురించి.

టోల్ గేట్ లేదు… కానీ టోల్ మాత్రం పడుతుంది!

మన దేశంలో FASTag ద్వారా టోల్ ప్లాజా దాటినప్పుడు మాత్రమే డబ్బు కట్ అవుతుంది. కానీ సింగపూర్‌లో ప్రతి కారులో On-Board Unit (OBU) అనే డివైజ్‌ను అమర్చుతున్నారు. ఇది శాటిలైట్ లొకేషన్ సమాచారాన్ని ఉపయోగించి టోల్ చెల్లింపును నిర్వహిస్తుంది.

ఈ డివైజ్‌తో టోల్ మాత్రమే కాదు…

పార్కింగ్ ఫీజులు కూడా ఆటోమేటిక్‌గా చెల్లించవచ్చు. రోడ్డుపై ప్రమాదం జరిగినా, రోడ్డు మూసివేసినా కారులోనే అలర్ట్ వస్తుంది. ఇప్పటికే అక్కడ 95% కంటే ఎక్కువ కార్లలో ఈ డివైజ్‌లను అమర్చేశారు. 2027 జనవరి నుంచి పాత టోల్ గేట్లను పూర్తిగా నిలిపివేయాలని సింగపూర్ లక్ష్యంగా పెట్టుకుంది.

అసలు భయం… డబ్బు కాదు, డేటా!

ఈ వ్యవస్థపై వస్తున్న అతిపెద్ద ప్రశ్న…”ఇలాంటి లొకేషన్ డేటా ఎంత భద్రంగా ఉంటుంది?” ఒకవేళ ప్రయాణానికి సంబంధించిన సమాచారం దుర్వినియోగం అయితే? ఒకవేళ డేటా లీక్ అయితే? మీరు ఏ ప్రాంతాలకు వెళ్లారు… ఎప్పుడు వెళ్లారు… ఎంతసేపు అక్కడ ఉన్నారు…వంటి సమాచారం తప్పుడు వ్యక్తుల చేతుల్లో పడితే ఏమవుతుందనే ఆందోళన ప్రైవసీ నిపుణుల్లో కనిపిస్తోంది.

అయితే సింగపూర్ ప్రభుత్వం మాత్రం ఈ డేటాను ట్రాఫిక్ మేనేజ్‌మెంట్ కోసమే ఉపయోగిస్తున్నామని, టోల్ లావాదేవీలకు సంబంధించిన సమాచారాన్ని కొద్ది రోజుల్లోనే తొలగిస్తామని చెబుతోంది.

సింగపూర్ ఎందుకు ఇలా చేస్తోంది?

ఈ వ్యవస్థ లక్ష్యం ఆదాయం పెంచడం కాదు…

ట్రాఫిక్ తగ్గించడం. రద్దీ ఎక్కువగా ఉన్న సమయాల్లో ఎక్కువ ఛార్జ్ విధించడం ద్వారా అవసరం లేని ప్రయాణాలను తగ్గించాలని ప్రభుత్వం భావిస్తోంది. భవిష్యత్తులో దూరాన్ని బట్టి టోల్ వసూలు చేసే అవకాశం కూడా ఈ టెక్నాలజీకి ఉంది. అయితే ప్రస్తుతం సింగపూర్ కూడా ఆ విధానాన్ని పూర్తిగా అమలు చేయలేదు.

ఈ విధానం వల్ల…

రద్దీ సమయాల్లో ట్రాఫిక్‌ను నియంత్రించవచ్చు. పెట్రోల్, డీజిల్ పన్నుల కంటే రోడ్డును ఎంత వాడితే అంత చెల్లించే విధానం అమలు చేయవచ్చు.కొత్త టోల్ గేట్లు నిర్మించే భారీ ఖర్చు తగ్గుతుంది.

భారత్‌లో కూడా వస్తుందా?

GPS ఆధారిత టోల్ విధానం గురించి భారత్‌లో కూడా గతంలో చర్చ జరిగింది. అయితే సింగపూర్ తరహా వ్యవస్థను భారతదేశం లాంటి భారీ దేశంలో అమలు చేయడం అంత తేలిక కాదు. నిపుణుల అభిప్రాయం ప్రకారం… భవిష్యత్తులో ఇలాంటి టెక్నాలజీ వచ్చినా, దాన్ని దశలవారీగా లేదా ఆప్షనల్‌గా ప్రవేశపెట్టే అవకాశమే ఎక్కువ.

చివరగా…

ఈరోజు ప్రపంచంలో అత్యంత విలువైనది బంగారం కాదు… చమురు కాదు… డేటా. అందుకే సింగపూర్ కొత్త టోల్ వ్యవస్థపై అసలు చర్చ టోల్ గురించి కాదు… లొకేషన్ డేటా గురించి.

రోడ్లపై టోల్ గేట్లు మాయమవుతాయి…

కానీ మీ ప్రతి ప్రయాణానికి ఒక డిజిటల్ జాడ మిగిలిపోతే? ఆ జాడ ఎప్పటికీ ట్రాఫిక్ కోసమే పరిమితమవుతుందా… లేక ఇంకేదైనా ఉపయోగానికి మారుతుందా?

అదే ఇప్పుడు ప్రపంచాన్ని ఆలోచింపజేస్తున్న అసలు ప్రశ్న.