కోహ్లీ రీ-ఎంట్రీ.. కోహ్లీ ముందు అరుదైన రికార్డులు..!
- Published By: techteam
- July 13, 2026 / 10:50 AM IST
సుమారు ఆరు నెలల సుదీర్ఘ విరామం తర్వాత టీమిండియా స్టార్ బ్యాటర్, రన్ మెషిన్ విరాట్ కోహ్లీ(Virat Kohli) మళ్లీ అంతర్జాతీయ క్రికెట్ పిచ్పై అడుగుపెట్టేందుకు సిద్ధమయ్యాడు. ఇంగ్లాండ్తో(England) జరగనున్న వన్డే సిరీస్ ద్వారా అతను బరిలోకి దిగబోతున్నాడు. గాయం కారణంగా గతంలో ఆఫ్ఘనిస్తాన్ సిరీస్కు దూరమైన కోహ్లీ, చాలా కాలం తర్వాత వన్డేల్లో భారత్ బ్యాటింగ్ విభాగాన్ని ముందుండి నడిపించనున్నాడు. ఈ పునరాగమనంలో కోహ్లీని ఒక ప్రపంచ రికార్డుతో పాటు రెండు భారీ కెరీర్ మైలురాళ్లు ఊరిస్తున్నాయి.
వన్డే క్రికెట్ చరిత్రలో విరాట్ కోహ్లీ మరో అద్భుతమైన మైలురాయికి కేవలం 203 పరుగుల దూరంలో ఉన్నాడు. ఈ సిరీస్లో గనుక అతను ఈ పరుగులు సాధిస్తే, వన్డేల్లో 15,000 పరుగుల మార్కును అందుకున్న ప్రపంచంలోనే రెండో బ్యాటర్గా చరిత్ర సృష్టిస్తాడు. ప్రస్తుతం భారత క్రికెట్ లెజెండ్ సచిన్ టెండూల్కర్ (18,426 పరుగులు) మాత్రమే ఈ ఎలైట్ క్లబ్లో అగ్రస్థానంలో కొనసాగుతున్నాడు. కోహ్లీ ఈ మైలురాయిని చేరితే సచిన్ సరసన నిలిచిన ఏకైక ఆటగాడిగా రికార్డుకెక్కుతాడు.
ఈ వన్డే సిరీస్లోనే కోహ్లీ 15 వేల పరుగుల మార్కును దాటితే, ప్రపంచంలోనే అత్యంత వేగంగా ఈ ఘనత సాధించిన బ్యాటర్గా సరికొత్త ప్రపంచ రికార్డును తన పేరిట లిఖించుకుంటాడు. మాస్టర్ బ్లాస్టర్ సచిన్ టెండూల్కర్ 359 ఇన్నింగ్స్ల్లో ఈ మైలురాయిని అందుకోగా, కోహ్లీ ఇప్పటివరకు కేవలం 299 వన్డే ఇన్నింగ్స్లు మాత్రమే ఆడాడు. దీంతో సచిన్ కంటే చాలా తక్కువ ఇన్నింగ్స్ల్లోనే ఈ రికార్డును బద్దలు కొట్టే సువర్ణావకాశం కోహ్లీకి ఉంది. రికార్డులతో పాటు ఈ సిరీస్లో కోహ్లీ బ్యాటింగ్కు దిగిన వెంటనే వన్డే కెరీర్లో తన 300వ ఇన్నింగ్స్ మైలురాయిని కూడా పూర్తి చేసుకోబోతున్నాడు. దాదాపు 60కి దగ్గరగా సగటు, 90కి పైగా స్ట్రైక్ రేట్తో వన్డే క్రికెట్ను శాసించిన కోహ్లీ.. ప్రస్తుతం టెస్టులు, టీ20లకు దూరంగా ఉంటూ పూర్తి దృష్టిని వన్డేలపైనే కేంద్రీకరించాడు. వచ్చే ఏడాది జరగబోయే ఐసీసీ వన్డే వరల్డ్ కప్పై కన్నేసిన కోహ్లీకి, ఈ ఇంగ్లాండ్ సిరీస్ అత్యంత కీలకం కానుంది.
