బీజేపీలో సంస్థాగత మార్పులకు రంగం సిద్ధం!?
- Published By: Vasishta
- November 7, 2026 / 03:20 PM IST
తెలంగాణలో అధికారమే లక్ష్యంగా పావులు కదుపుతున్న బీజేపీ, తన సంస్థాగత నిర్మాణాన్ని మరింత పటిష్టం చేసే దిశగా అడుగులు వేస్తోంది. క్షేత్రస్థాయి నుంచి పార్టీ యంత్రాంగాన్ని చురుకుగా ఉంచేందుకు, గతంలో పదవులు దక్కక అసంతృప్తితో ఉన్న నాయకులను సముదాయించేందుకు హైకమాండ్ ప్రత్యేక కసరత్తు ప్రారంభించింది. ఇందులో భాగంగా రాష్ట్ర కమిటీని విస్తరించడంతో పాటు కీలక మార్పులకు శ్రీకారం చుడుతున్నట్లు పార్టీ వర్గాల్లో జోరుగా చర్చ సాగుతోంది.
ప్రస్తుతం రాష్ట్ర కమిటీలో ముగ్గురు జనరల్ సెక్రటరీలు, 8 మంది ఉపాధ్యక్షులు, 8 మంది కార్యదర్శులు కొనసాగుతున్నారు. అయితే, పార్టీ శ్రేణుల్లో ఉత్సాహం నింపేందుకు, మరింత మెరుగైన సమన్వయం సాధించేందుకు ఈ కమిటీ పరిధిని మరింత పెంచాలని అధిష్ఠానం భావిస్తోంది. అదనంగా మరో జనరల్ సెక్రటరీ, ఇద్దరు ఉపాధ్యక్షులు, ఇద్దరు కార్యదర్శుల పోస్టులను కొత్తగా చేర్చే అవకాశం ఉన్నట్లు తెలుస్తోంది. ఈ మేరకు మొత్తం ఐదు కొత్త పదవులు అందుబాటులోకి రానుండటంతో ఆశావహుల ప్రయత్నాలు ఒక్కసారిగా ఊపందుకున్నాయి.
కొత్త నియామకాల ప్రచారం తెరపైకి రావడంతో రాష్ట్రంలోని పలువురు సీనియర్ నాయకులు, ఆశావహులు తమ ప్రయత్నాలను ముమ్మరం చేశారు. తమకున్న రాజకీయానుభవం, సంస్థాగత పరిచయాలు, పార్టీ కోసం పనిచేసిన తీరును ఆధారంగా చేసుకుని పదవులను దక్కించుకునేందుకు పావులు కదుపుతున్నారు. కేవలం రాష్ట్ర స్థాయిలోనే కాకుండా, జాతీయ నాయకత్వం, కేంద్ర పెద్దల ఆశీస్సులు పొందేందుకు ఢిల్లీ స్థాయిలోనూ లాబీయింగ్ సాగిస్తున్నట్లు సమాచారం.
కేవలం కొత్త నియామకాలే కాకుండా, ప్రస్తుత కమిటీలో కొనసాగుతున్న వారి పనితీరుపై కూడా అంతర్గత సమీక్ష జరుగుతోంది. పార్టీ నిర్దేశించిన కార్యక్రమాల్లో చురుకుదనం, క్షేత్రస్థాయిలో క్రియాశీలత వంటి అంశాలను ప్రామాణికంగా తీసుకుంటున్నట్లు తెలుస్తోంది. ముఖ్యంగా ప్రస్తుత సెక్రటరీలలో ఒకరిద్దరి బాధ్యతల్లో మార్పులు ఉండే అవకాశం ఉందని, కొందరికి స్థానచలనం తప్పదనే చర్చ పార్టీ వర్గాల్లో నడుస్తోంది. విస్తరణ ప్రక్రియ పూర్తయిన వెంటనే నేతల మధ్య శాఖలు, బాధ్యతల పునర్విభజన జరగనుంది.
రాష్ట్రంలో అధికారంలో ఉన్న కాంగ్రెస్ ప్రభుత్వంపై వ్యతిరేకతను అనుకూలంగా మలుచుకోవాలని బీజేపీ వ్యూహాత్మకంగా ముందుకు వెళ్తోంది. ఇటీవలి కాలంలో కేంద్ర హోం మంత్రి అమిత్ షా వంటి అగ్రనేతలు రాష్ట్రంలో పర్యటించడం, పార్టీ శ్రేణుల్లో జోష్ నింపడం తెలిసిందే. దొరికిన ఏ ఒక్క అవకాశాన్ని కూడా చేజార్చుకోకూడదని భావిస్తున్న కమలనాథులు.. ప్రజా సమస్యలపై పోరాటాలు, వివిధ మోర్చాల సమన్వయం, జిల్లాల వారీగా సంస్థాగత విస్తరణపై ప్రత్యేక దృష్టి పెట్టాలని నిర్ణయించారు.
