సనత్నగర్ టిమ్స్తో రేవంత్ మార్క్ ‘చెక్మేట్’ పాలిటిక్స్!
- Published By: Vasishta
- August 17, 2026 / 10:06 AM IST
హైదరాబాద్ నగరంలో ప్రతిష్టాత్మకంగా నిర్మించిన సనత్నగర్ తెలంగాణ ఇన్స్టిట్యూట్ ఆఫ్ మెడికల్ సైన్సెస్ (టిమ్స్) సూపర్ స్పెషాలిటీ ఆసుపత్రి ప్రారంభోత్సవం తెలంగాణ రాజకీయాల్లో సరికొత్త చర్చకు తెరలేపింది. ఈ ఆధునిక వైద్య కేంద్రాన్ని నేడు ముఖ్యమంత్రి రేవంత్ రెడ్డి ప్రారంభించనుండగా, ఆసుపత్రికి ఉమ్మడి ఆంధ్రప్రదేశ్ మాజీ ముఖ్యమంత్రి, దివంగత డాక్టర్ మర్రి చెన్నారెడ్డి పేరు పెట్టడం రాజకీయ వర్గాల్లో తీవ్ర ఆసక్తిని రేకెత్తిస్తోంది. కేవలం ఒక ప్రజారోగ్య ప్రాజెక్టు ప్రారంభానికే పరిమితం కాకుండా, ఒకే దెబ్బతో అటు బీఆర్ఎస్, ఇటు బీజేపీలకు గట్టి రాజకీయ సందేశాన్ని ఇచ్చేలా కాంగ్రెస్ అధిష్ఠానం వ్యూహం రచించినట్లు స్పష్టమవుతోంది.
గత బీఆర్ఎస్ ప్రభుత్వ హయాంలో మాజీ ముఖ్యమంత్రి కేసీఆర్ తన మానస పుత్రికలుగా హైదరాబాద్ నలుమూలలా.. గచ్చిబౌలి, ఎల్బీనగర్, అల్వాల్, సనత్నగర్లలో నాలుగు టిమ్స్ సూపర్ స్పెషాలిటీ ఆసుపత్రుల నిర్మాణానికి శ్రీకారం చుట్టారు. పేద ప్రజలకు కార్పొరేట్ స్థాయి ఉచిత వైద్యం అందించాలన్న లక్ష్యంతో నాడు చేపట్టిన ప్రాజెక్టులలో సనత్నగర్ టిమ్స్ పనులు పూర్తికావడంతో, కాంగ్రెస్ ప్రభుత్వం దీనిని ప్రారంభించి క్రెడిట్ దక్కించుకునేందుకు సిద్ధమైంది. బీఆర్ఎస్ అభివృద్ధి ప్రతీకగా చెప్పుకునే ప్రాజెక్టును కాంగ్రెస్ తన ఖాతాలో వేసుకోవడమే కాకుండా, డాక్టర్ మర్రి చెన్నారెడ్డి పేరును జోడించడం ద్వారా రాజకీయ పైచేయి సాధించింది.
తెలంగాణ ప్రాంతంలో కాంగ్రెస్ పార్టీకి తిరుగులేని నాయకుడిగా, రెండుసార్లు ముఖ్యమంత్రిగా, ప్రత్యేక తెలంగాణ తొలితరం ఉద్యమ రథసారథిగా డాక్టర్ మర్రి చెన్నారెడ్డి ఒక వెలుగు వెలిగారు. సనత్నగర్ నియోజకవర్గం దశాబ్దాల పాటు మర్రి కుటుంబానికి రాజకీయ కంచుకోటగా నిలిచింది. చెన్నారెడ్డి రాజకీయ వారసుడిగా ఆయన కుమారుడు మర్రి శశిధర్ రెడ్డి కాంగ్రెస్ ప్రభుత్వాలలో మంత్రిగా, జాతీయ విపత్తు నిర్వహణ సంస్థ (NDMA) ఉపాధ్యక్షుడిగా చక్రం తిప్పి మంచి గుర్తింపు తెచ్చుకున్నారు. అయితే, కాంగ్రెస్ నాయకత్వంతో విభేదాల కారణంగా 2018 ఎన్నికల నేపథ్యంలో ఆయన పార్టీని వీడి భారతీయ జనతా పార్టీ (BJP) తీర్థం పుచ్చుకున్నారు.
ప్రస్తుతం మర్రి శశిధర్ రెడ్డి బీజేపీలో చేరినప్పటికీ, అక్కడ అంతగా యాక్టివ్ కాకపోవడం, క్రియాశీల రాజకీయాలకు కొంత దూరంగా ఉండటం గమనార్హం. ఈ తరుణంలో సనత్నగర్ టిమ్స్ కు చెన్నారెడ్డి పేరు పెట్టడం ద్వారా రేవంత్ రెడ్డి పక్కా పొలిటికల్ మైండ్ గేమ్ ఆడారు. సనత్నగర్ ప్రాంత ప్రజల్లో మర్రి కుటుంబంపై ఉన్న సెంటిమెంట్ను, కాంగ్రెస్ సంప్రదాయ ఓటు బ్యాంకును పునరుద్ధరించేందుకు ఇది అద్భుతమైన అవకాశంగా మారింది. తమ పార్టీ నేత తండ్రి పేరును కాంగ్రెస్ ప్రభుత్వం పెడితే బీజేపీ నేతలు విమర్శించలేని పరిస్థితి ఏర్పడింది. ఒకవేళ విమర్శిస్తే తెలంగాణ సీనియర్ నేతను వ్యతిరేకించినట్లు అవుతుంది, సమర్థిస్తే కాంగ్రెస్ తీసుకున్న నిర్ణయాన్ని బలపరిచినట్లు అవుతుంది. అటు కేసీఆర్ మానస పుత్రిక అయిన ప్రాజెక్టును తమ హయాంలో పూర్తి చేసి ప్రజలకు అంకితం చేయడం ద్వారా ‘మానస పుత్రిక మాది’ అని చెప్పుకునే అవకాశాన్ని బీఆర్ఎస్ నుంచి కాంగ్రెస్ లాగేసుకుంది.
మొత్తానికి, సనత్నగర్ టిమ్స్ ఆసుపత్రి ప్రారంభం ద్వారా అభివృద్ధి క్రెడిట్ను సొంతం చేసుకోవడమే కాకుండా, తెలంగాణ సెంటిమెంట్ను, పాత కాంగ్రెస్ వారసత్వాన్ని ఏకకాలంలో మేళవించి రేవంత్ రెడ్డి అటు కేసీఆర్ మార్క్ ప్రాజెక్టుకు, ఇటు బీజేపీకి ఒకేసారి చెక్ పెట్టారని రాజకీయ విశ్లేషకులు భావిస్తున్నారు.
