ఎథిక్స్ కమిటీకి ట్విస్ట్ ఇచ్చిన కౌశిక్ రెడ్డి!

తెలంగాణ అసెంబ్లీ వేదికగా అధికార కాంగ్రెస్, ప్రధాన ప్రతిపక్ష బీఆర్ఎస్ మధ్య సాగుతున్న రాజకీయ యుద్ధం ఎథిక్స్ కమిటీ విచారణతో మరింత తీవ్రరూపం దాల్చింది. హుజూరాబాద్ బీఆర్ఎస్ ఎమ్మెల్యే పాడి కౌశిక్ రెడ్డి ఎథిక్స్ కమిటీకి రాసిన లేఖ రాష్ట్ర రాజకీయ వర్గాల్లో తీవ్ర చర్చనీయాంశంగా మారింది. తనపై వచ్చిన అభియోగాలకు సంబంధించి వివరణ ఇచ్చేందుకు తనకు 6 వారాల సమయం కావాలని, లేనిపక్షంలో త్వరలో జరగబోయే అసెంబ్లీ సమావేశాలు ముగిసిన అనంతరమైనా గడువు పొడిగించాలని ఆయన కోరారు.

మార్చి 29న జరిగిన అసెంబ్లీ బడ్జెట్ సమావేశాల సందర్భంగా సభలో గనుల తవ్వకాల అవకతవకలపై తీవ్రస్థాయిలో వాదోపవాదాలు చోటుచేసుకున్నాయి. ఆ సమయంలో బీఆర్ఎస్ నుంచి కాంగ్రెస్‌లోకి ఫిరాయించిన స్టేషన్ ఘన్‌పూర్ ఎమ్మెల్యే కడియం శ్రీహరి ప్రసంగిస్తుండగా, కౌశిక్ రెడ్డి జోక్యం చేసుకున్నారు. గత ప్రభుత్వంలో డిప్యూటీ సీఎంగా, మంత్రిగా పనిచేసిన విషయాన్ని ప్రస్తావిస్తూ ఆయన చేసిన వ్యాఖ్యలు, చేతుల సైగలతో కూడిన శరీర భాష తీవ్ర అభ్యంతరకరంగా ఉన్నాయంటూ అధికార పక్షం ఆరోపించింది. సభా మర్యాదలను, శాసనసభ హుందాతనాన్ని ఉల్లంఘించారంటూ అధికార పక్ష సభ్యులు తీవ్ర ఆగ్రహం వ్యక్తం చేయడంతో స్పీకర్ ఈ అంశాన్ని ఎథిక్స్ కమిటీకి నివేదించారు. ఆగస్టు 29న సమావేశమైన ఎథిక్స్ కమిటీ, సెప్టెంబర్ 5వ తేదీలోగా లిఖితపూర్వక వివరణ ఇవ్వాల్సిందిగా ఆదేశిస్తూ కౌశిక్ రెడ్డికి నోటీసులు జారీ చేసింది.

ఎథిక్స్ కమిటీ విధించిన డెడ్‌లైన్ నేపథ్యంలో కౌశిక్ రెడ్డి పంపిన లేఖలో పలు అంశాలను లేవనెత్తారు. ఎథిక్స్ కమిటీ నోటీసు తనకు ఆగస్టు 31వ తేదీనే అందిందన్నారు. కమిటీ అందజేసిన మెటీరియల్ వాల్యూమ్ చాలా పెద్దదిగా ఉండటంతో, ప్రతి అంశాన్ని కూలంకషంగా చదివి విశ్లేషించేందుకు తగిన సమయం దొరకలేదన్నారు. సెప్టెంబర్ 7 నుంచి తెలంగాణ అసెంబ్లీ సమావేశాలు ప్రారంభం కానున్నందున, శాసనసభ్యుడిగా ఆ సభా బాధ్యతల్లో నిమగ్నం కావాల్సి ఉంటుందని, మార్చి 29 నాటి సంఘటనకు సంబంధించిన పూర్తి వీడియో క్లిప్‌ను కమిటీ జతచేయలేదని కౌశిక్ రెడ్డి లేఖలో పేర్కొన్నారు. కేవలం ఒకవైపు మాత్రమే చూపించేలా కాకుండా, ఆ రోజు అసెంబ్లీ మొత్తం ప్రొసీడింగ్స్ వీడియో ఫుటేజీని ఇవ్వాలని కోరారు. అధికార, ప్రతిపక్ష సభ్యుల మధ్య జరిగిన మొత్తం సంభాషణతో పాటు, ప్రతిపక్షం వైపు నుంచి అధికార పక్షం వైపు చిత్రీకరించిన పూర్తి వీడియోను కూడా ఇవ్వాలని కోరారు. ఈ సమగ్ర సమాచారాన్ని పరిశీలించిన తర్వాతే పూర్తిస్థాయి రాతపూర్వక వివరణ ఇవ్వగలనని, ఇందుకు ఆరు వారాల గడువు లేదా ప్రస్తుత సమావేశాలు ముగిసిన తర్వాత తగిన సమయం ఇవ్వాలని అభ్యర్థించారు.

పాడి కౌశిక్ రెడ్డి వ్యవహారం వెనుక ఉద్దేశపూర్వక రాజకీయ వ్యూహాలు స్పష్టంగా కనిపిస్తున్నాయి. సెప్టెంబర్ 7న ప్రారంభం కానున్న అసెంబ్లీ సమావేశాల వేళ కౌశిక్ రెడ్డిపై ఎథిక్స్ కమిటీ ద్వారా క్రమశిక్షణా చర్యలు లేదా సస్పెన్షన్ వేటు వేయించి, ప్రతిపక్ష బీఆర్ఎస్‌ను ఆత్మరక్షణలోకి నెట్టాలని కాంగ్రెస్ భావిస్తున్నట్లు రాజకీయ విశ్లేషకులు భావిస్తున్నారు. కడియం శ్రీహరి ఫిరాయింపు అంశాన్ని నిరంతరం ఎత్తిచూపుతూ అధికార పక్షాన్ని ఇరుకున పెడుతున్న కౌశిక్ రెడ్డి స్వరాన్ని అసెంబ్లీలో కట్టడి చేయాలన్నది కాంగ్రెస్ ఆలోచనగా ప్రతిపక్షం ఆరోపిస్తోంది.

మరోవైపు, కౌశిక్ రెడ్డి కూడా కమిటీకి లేఖ రాయడం ద్వారా సమర్థవంతమైన కౌంటర్ ప్లాన్‌ను సిద్ధం చేసుకున్నారు. పూర్తి వీడియో ఇవ్వలేదని, మెటీరియల్ భారీగా ఉందని చెప్పడం ద్వారా అధికార పక్షం కక్షపూరితంగా వ్యవహరిస్తోందన్న వాదనను ప్రజల్లోకి తీసుకెళ్లడంతో పాటు న్యాయపరంగానూ కమిటీ ఏకపక్షంగా వ్యవహరించకుండా ముందస్తు రక్షణ కవచాన్ని ఏర్పాటు చేసుకున్నారు. అధికారపక్షం వైపు నుంచి వచ్చిన వ్యాఖ్యలు కూడా రికార్డుల్లోకి రావాలన్న ఆయన డిమాండ్ అధికార పక్షానికి ఇబ్బందికరంగా మారే అవకాశం ఉంది. ఈ పరిణామాల నేపథ్యంలో, సెప్టెంబర్ 7 నుంచి ప్రారంభమయ్యే అసెంబ్లీ సమావేశాలు కౌశిక్ రెడ్డి ఎపిసోడ్‌తో మరింత వేడెక్కడం ఖాయంగా కనిపిస్తోంది.