Insurance: ప్రజలందరికీ ఇన్సూరెన్స్.. రేవంత్ రెడ్డి సర్కార్ గేమ్ ఛేంజర్ స్కీమ్!

తెలంగాణ ప్రభుత్వం 2026 జూన్ 2 నుంచి అమలు చేయనున్న “ఇందిరమ్మ ఫ్యామిలీ లైఫ్ ఇన్సూరెన్స్ స్కీమ్” రాష్ట్ర సామాజిక భద్రతా ముఖచిత్రాన్నే మార్చేలా కనిపిస్తోంది. తాజా బడ్జెట్ లో తెలంగాణ ప్రభుత్వం ప్రకటించిన ఈ పథకం కేవలం ఒక సంక్షేమ పథకం మాత్రమే కాదు, ఇది ఒక విప్లవాత్మక సామాజిక భద్రతా అడుగు. దేశంలో ఎక్కడా లేని విధంగా 1.15 కోట్ల కుటుంబాలకు రూ. 5 లక్షల జీవిత బీమా కల్పించాలనే లక్ష్యం, ప్రభుత్వ పరిపాలనా దక్షతకు సవాలుగా నిలవనుంది.

డిప్యూటీ సీఎం భట్టి విక్రమార్క చెప్పినట్లుగా ఇది దేశంలోనే మొదటిది కాకపోయినా, దీని స్థాయి పరంగా చూస్తే అద్భుతమైనది. నాగాలాండ్ ఇప్పటికే Chief Minister’s Universal Life Insurance Scheme (CMLIS) ద్వారా 2.5 లక్షల కుటుంబాలకు రూ. 2 లక్షల కవరేజీని అందిస్తోంది. అయితే, తెలంగాణలో లబ్ధిదారుల సంఖ్య 1.15 కోట్లు అంటే నాగాలాండ్ కంటే దాదాపు 50 రెట్లు పెద్దది. పైగా రూ. 5 లక్షల కవరేజీ అనేది మధ్యతరగతి కుటుంబాలకు కూడా ఒక పెద్ద భరోసా.

ప్రధానమంత్రి జీవన్ జ్యోతి బీమా యోజన (PMJJBY) అనేది స్వచ్ఛందంగా చేరాల్సిన పథకం. దీనికి 18-50 ఏళ్ల వయస్సు పరిమితి ఉంది. ఏడాదికి రూ. 436 ప్రీమియం చెల్లించాలి. కానీ ఇందిరమ్మ పథకం యూనివర్శల్ స్కీమ్. వ్యక్తిగత బీమా కంటే కుటుంబ ఆధారిత బీమా కవరేజీ వల్ల ఇంటి పెద్దకు రక్షణ లభిస్తుంది. లబ్ధిదారులపై పైసా భారం పడకుండా ప్రభుత్వమే బాధ్యత తీసుకోవడం గొప్ప విషయం.

అయితే ఇంత పెద్ద పథకాన్ని ఎలా అమలు చేస్తారనేది ఆసక్తి రేపుతోంది. నిధుల సమీకరణ, అమలు పెద్ద సవాల్ తో కూడుకున్నది. నేరుగా ఎల్.ఐ.సి లేదా ఇతర సంస్థలతో ఒప్పందం కుదుర్చుకోవడం, లేదంటే కేంద్రం పీఎంజేజేబీవై ద్వారా ఇస్తున్న రూ. 2 లక్షలకు రాష్ట్రం మరో రూ. 3 లక్షలు చేర్చి రూ. 5 లక్షలు చేయడం మరో ఆప్షన్. అర్హులైన పేదలకు కేంద్ర పథకం ద్వారా, మిగిలిన వారికి రాష్ట్ర నిధులతో అమలు చేయడం మరో ఆలోచన.

ఏదైనా భారీ పథకం అమలులో విధివిధానాలే కీలకం. ఇక్కడ ప్రభుత్వం ఐదు అంశాలపై స్పష్టత ఇవ్వాల్సి ఉంది. ఉమ్మడి కుటుంబాలు, విడిపోయిన కుటుంబాల విషయంలో స్పష్టత అవసరం. కుటుంబంలో సంపాదించే వ్యక్తిని ఎలా గుర్తిస్తారు? మహిళలు ఇంటిని నడిపే చోట వారిని పోషకులుగా గుర్తిస్తారా? వృద్ధులు ఎక్కువగా ఉన్న కుటుంబాల్లో రిస్క్ శాతం ఎక్కువ ఉంటుంది, దానికి తగ్గట్టు ప్రీమియం భారాన్ని ఎలా సర్దుబాటు చేస్తారు? లాంటివి చాలా కీలకం. లబ్ధిదారుల వివరాల్లో తప్పులు ఉంటే క్లెయిమ్ సెటిల్‌మెంట్ ఆగిపోతుంది. మరణం సంభవించినప్పుడు ఆర్థిక సాయం సకాలంలో అందకపోతే పథకం ఉద్దేశ్యం దెబ్బతింటుంది.

గతంలో వైఎస్ రాజశేఖర్ రెడ్డికి ‘ఆరోగ్యశ్రీ’, కేసీఆర్‌కు ‘రైతు బీమా’ ఎలాగైతే రాజకీయ మైలేజీని ఇచ్చాయో, రేవంత్ రెడ్డి ప్రభుత్వానికి ఈ పథకం ఒక గేమ్ ఛేంజర్ కానుంది. ఇది కేవలం పేదలకే కాకుండా ధనిక, మధ్యతరగతి వర్గాలకు కూడా వర్తిస్తుందని చెప్పడం ద్వారా ఒక “యూనివర్సల్ వెల్ఫేర్ స్టేట్” వైపు తెలంగాణ అడుగులు వేస్తోంది. 2026 జూన్ 2న ప్రారంభమయ్యే ఈ పథకం సజావుగా అమలు కావాలంటే పటిష్టమైన టెక్నాలజీ, పారదర్శకమైన క్లెయిమ్ వ్యవస్థ అవసరం.