YS Vijayamma : జగన్‌కు విజయమ్మ షాకింగ్ కౌంటర్

సరస్వతి పవర్ షేర్ల వివాదం ప్రస్తుతం తెలుగు రాష్ట్రాల రాజకీయాల్లోనే కాకుండా, న్యాయవర్గాల్లోనూ హాట్ టాపిక్‌గా మారింది. దివంగత ముఖ్యమంత్రి వైఎస్ రాజశేఖర రెడ్డి కుటుంబ సభ్యుల మధ్య ఆస్తుల పంపిణీకి సంబంధించి తలెత్తిన ఈ వివాదం ఏ ములుపు తీసుకుంటుందోనని అందరూ ఉత్కంఠగా ఎదురు చూస్తున్నారు.

సరస్వతి పవర్ అండ్ ఇండస్ట్రీస్ ప్రైవేట్ లిమిటెడ్ అనే కంపెనీలో షేర్ల బదలాయింపు ఈ వివాదానికి మూలబిందువు. జగన్ మోహన్ రెడ్డి తన సోదరి షర్మిలకు గతంలో ఇచ్చిన హామీ ప్రకారం ఆస్తులను పంపిణీ చేసే క్రమంలో కొన్ని షేర్లను తన తల్లి విజయమ్మ పేరిట బదిలీ చేశారు. అయితే, ఆ తర్వాత జగన్ ఈ బదిలీని సవాలు చేస్తూ నేషనల్ కంపెనీ లా ట్రైబ్యునల్ (NCLT)ను ఆశ్రయించడంతో వివాదం మొదలైంది.

ఈ వివాదంలో వైఎస్ విజయమ్మ అత్యంత కీలక పాత్ర పోషిస్తున్నారు. చెన్నైలోని నేషనల్ కంపెనీ లా అప్పిలేట్ ట్రైబ్యునల్ లో ఆమె దాఖలు చేసిన కౌంటర్ ఈ కేసులో కొత్త మలుపులను వెల్లడించింది. తన కుమార్తె షర్మిలకు తాను ‘బినామీ’ని కాదని, స్వతంత్రంగానే నిర్ణయాలు తీసుకుంటున్నానని ఆమె స్పష్టం చేశారు. 2019 నాటి ఒప్పందం ప్రకారం సరస్వతి పవర్ షర్మిలకే చెందాలని, ఆమెకు దక్కాల్సిన వాటాను తన నియంత్రణలో ఉంచుకుని భర్త వైఎస్సార్ ఆశయాలను నెరవేరుస్తున్నానని ఆమె పేర్కొన్నారు.

జగన్ మోహన్ రెడ్డి, ఆయన భార్య భారతి రెడ్డిల ప్రధాన వాదన మాత్రం వేరుగా ఉంది. సరస్వతి పవర్ షేర్లు ప్రస్తుతం ఈడీ (ED) జప్తులో ఉన్నాయని, అటాచ్‌మెంట్ ఉన్న ఆస్తులను బదిలీ చేయడం చట్టవిరుద్ధమని వాళ్లు చెప్తున్నారు. అయితే విజయమ్మ దీనిని కొట్టిపారేశారు. సండూర్ పవర్, క్లాసిక్ రియాల్టీలో షేర్ల బదిలీని అభ్యంతరపెట్టని జగన్, కేవలం సరస్వతి పవర్ విషయంలోనే ఎందుకు అభ్యంతరం చెబుతున్నారని ఆమె ప్రశ్నించారు. ఇది కుటుంబ ఒప్పందాలను రద్దు చేయడానికి జగన్ వేసిన ఎత్తుగడ అని ఆమె ఆరోపించారు.

వైఎస్ షర్మిల కూడా ఈ వివాదంపై ఘాటుగా స్పందించారు. కేవలం తనను ఇబ్బంది పెట్టడానికి, రాజకీయ కక్ష తీర్చుకోవడానికే ఈ కేసులో తన పేరును చేర్చారని ఆమె ఆవేదన వ్యక్తం చేశారు. తండ్రి వీలునామాను గౌరవించాల్సిన బాధ్యత అందరిపై ఉందని, కానీ జగన్ దీనికి రాజకీయ రంగు పులుముతున్నారని ఆమె పేర్కొన్నారు.

ఈ వివాదాన్ని కేవలం ఆస్తి తగాదాగా మాత్రమే చూడలేం. దీని వెనుక బలమైన రాజకీయ, నైతిక అంశాలు ఉన్నాయి. వైఎస్సార్ మరణం తర్వాత ఐక్యంగా ఉన్న ఈ కుటుంబం, ఇప్పుడు బహిరంగంగా కోర్టు మెట్లెక్కడం వైఎస్సార్ అభిమానులను విస్మయానికి గురిచేస్తోంది. విజయమ్మ తన కుమారుడికి వ్యతిరేకంగా కోర్టులో అఫిడవిట్ దాఖలు చేయడం ఈ వివాదం ఏ స్థాయికి చేరిందో సూచిస్తోంది. ఒకవైపు ఈడీ కేసుల భయం, మరోవైపు కుటుంబ సభ్యుల మధ్య కుదిరిన గిఫ్ట్ డీడ్ల రద్దు. ఒకవేళ కోర్టు షేర్ల బదిలీ సరైనదేనని చెబితే జగన్ కు చట్టపరంగా ఇబ్బందులు రావచ్చు. అందుకే ఆయన ఆ షేర్లను తిరిగి తన పేరు మీదకు తెచ్చుకోవాలని ప్రయత్నిస్తున్నట్లు కనిపిస్తోంది. ఆంధ్రప్రదేశ్ రాజకీయాల్లో షర్మిల యాక్టివ్ అయిన తర్వాత ఈ వివాదం మరింత ముదిరింది.

సరస్వతి పవర్ వివాదం ప్రస్తుతం న్యాయస్థానం పరిధిలో ఉంది. ఎన్‌సీఎల్‌ఏటీ తదుపరి విచారణను ఏప్రిల్ 29కి వాయిదా వేసింది. అప్పటి వరకు ఈ ఆరోపణలు, ప్రత్యారోపణలు కొనసాగే అవకాశం ఉంది. ఈ కేసులో వెలువడే తీర్పు కేవలం ఆస్తులకే పరిమితం కాకుండా, వైఎస్సార్ కుటుంబంలోని రాజకీయ, వ్యక్తిగత సమీకరణాలను శాశ్వతంగా మార్చే అవకాశం ఉంది.