ఆగ‌స్ట్ పై క‌న్నేసిన రవితేజ

మాస్ మహారాజ ర‌వితేజ‌(Ravi Teja) కెరీర్‌లో మరో కీలక ప్రాజెక్ట్‌గా మారుతున్న సినిమా ఇరుముడి(Irumudi). ఇటీవల విడుదలైన భర్త మహాశయులకు విజ్ఞప్తి(BMW) సినిమా బాక్సాఫీస్ వద్ద ఓ మోస్తరు విజయాన్ని అందుకున్నప్పటికీ, అభిమానులు ఆశించిన స్థాయి హిట్ మాత్రం కాలేకపోయింది. దీంతో ఇప్పుడు రవితేజ పూర్తి ఫోకస్‌ను ఇరుముడిపై పెట్టినట్టుగా ఇండస్ట్రీ వర్గాల్లో చర్చ నడుస్తోంది. సినిమా అనౌన్స్ అయిన దగ్గర నుంచే టైటిల్, కాన్సెప్ట్ లాంటి అంశాలు ప్రేక్షకుల్లో ఆసక్తిని పెంచాయి. ముఖ్యంగా రవితేజను మరోసారి ఇంటెన్స్ మాస్ పాత్రలో చూపించబోతున్నారని వినిపిస్తుండటంతో ఫ్యాన్స్‌లో అంచనాలు మరింత పెరిగాయి.

ఈ సినిమాను డైరెక్ట‌ర్ శివ నిర్వాణ‌(Shiva Nirvana) తెరకెక్కిస్తుండగా, ప్రస్తుతం షూటింగ్ వేగంగా కొనసాగుతున్నట్టు సమాచారం. ఎమోష‌న్స్‌ను మాస్ కమర్షియల్ ఎలిమెంట్స్‌తో మిళితం చేయడంలో శివ నిర్వాణకు ఉన్న ప్రత్యేకమైన స్టైల్ ఈ సినిమాపై మంచి హైప్ తీసుకొచ్చింది. తాజా టాలీవుడ్ వర్గాల సమాచారం ప్రకారం, చిత్రబృందం ఈ సినిమాను ఆగస్టు నెలలో ప్రేక్షకుల ముందుకు తీసుకురావాలని ప్రణాళికలు సిద్ధం చేస్తున్నట్టు టాక్ వినిపిస్తోంది. షూటింగ్‌తో పాటు పోస్ట్ ప్రొడక్షన్ పనులు కూడా సమాంతరంగా జరుగుతున్నాయని తెలుస్తోంది. అన్నీ అనుకున్నట్టుగా సాగితే త్వరలోనే అఫీషియ‌ల్ రిలీజ్ డేట్ అనౌన్స్‌మెంట్ వచ్చే అవకాశం ఉంది.

ఇక మ్యూజిక్ డైరెక్ట‌ర్ జీవీ ప్ర‌కాష్ కుమార్(G. V. Prakash Kumar) ఈ సినిమాకు సంగీతం అందిస్తుండగా, ఇటీవలే ఓ ప్రత్యేక రీమిక్స్ సాంగ్ షూట్ పూర్తయినట్టు సినీ వర్గాల్లో ప్రచారం జరుగుతోంది. ముఖ్యంగా బంగారు పల్లకి(Bangaru Pallaki) సాంగ్ ను సినిమాలో కొత్త తరహాలో ప్రెజెంట్ చేయబోతున్నారనే వార్తలు ఆసక్తిని పెంచుతున్నాయి. భారీ నిర్మాణ విలువలతో రూపొందుతున్న ఈ సినిమాను ఎస్ఎల్‌వీ సినిమాస్(SLV Cinemas) నిర్మిస్తోంది. సరైన రిలీజ్ టైమ్ దొరికితే ఇరుముడి రవితేజకు మళ్లీ బలమైన కమర్షియల్ కంబ్యాక్ ఇవ్వొచ్చనే అభిప్రాయాలు వ్యక్తమవుతున్నాయి.