కృష్ణ‌వంశీ అందుకే సింధూరంలో న‌న్ను పెట్టాడు

తెలుగు సినీ పరిశ్రమలో నటుడు బ్రహ్మాజీ(brahmaji) మరియు డైరెక్ట‌ర్ కృష్ణవంశీ(Krishna vamsi) మధ్య ఉన్న అనుబంధం మరోసారి చర్చనీయాంశమైంది. ఒక ఇంటర్వ్యూలో బ్రహ్మాజీ తన కెరీర్ ప్రారంభ దశలో జరిగిన సంఘటనను గుర్తుచేసుకుంటూ, ఆ స్నేహం ఎలా జీవితాంత బంధంగా మారిందో వివరించారు. సినీ రంగంలో ఇద్దరూ పోరాడుతున్న రోజుల్లో, ఆర్థిక ఇబ్బందులతో రెండు రోజులుగా భోజనం చేయని కృష్ణవంశీకి బ్రహ్మాజీ తెలియకుండానే మెస్ పాస్‌తో భోజనం చేయించడం ఒక మలుపుగా మారింది. ఆ చిన్న సహాయం కృష్ణవంశీ జీవితంపై పెద్ద ప్రభావం చూపిందట‌.

తర్వాత దర్శకుడిగా ఎదిగిన కృష్ణవంశీ తన రుణాన్ని తీర్చుకున్నారు. కృష్ణ‌వంశీ కెరీర్‌లో మైలురాయిగా నిలిచిన నిన్నే పెళ్లాడతా(Ninne pelladatha) విజయం అనంతరం, బ్రహ్మాజీకి మంచి అవకాశాలు కల్పించారు. గులాబీ(Gulabi), సింధూరం(SIndhuram), చంద్రలేఖ(Chandralekha), ఖడ్గం(Khadgam) లాంటి సినిమాల్లో ఆయనకు ప్రత్యేక పాత్రలు ఇచ్చి గుర్తింపు తీసుకువచ్చారు. పాత్రకు తగిన న్యాయం జరిగేలా చూసే దర్శకుడిగా కృష్ణవంశీ ఉన్నారని బ్రహ్మాజీ పేర్కొన్నారు. ముఖ్యంగా సింధూరం సినిమాలో త‌న‌ను హీరోగా పెట్టి చేయ‌డానికి కూడా కార‌ణ‌మ‌దేన‌ని ఆయ‌న చెప్పారు.

ఇక తన కెరీర్ ప్రారంభాన్ని బ్రహ్మాజీ కష్టకాలంగా కాకుండా, ఒక అందమైన ప్రయాణంగా అభివర్ణించడం గమనార్హం. అవకాశాల కోసం తిరిగినా ఎప్పుడూ దాన్ని అవమానంగా భావించలేదని, ఇష్టమైన పనిలో ఉండటం వల్ల ప్రతి కష్టం సులభంగా అనిపించిందని అన్నారు. సహచరులు స్నేహితులే కావడంతో ప్రతికూల అనుభవాలు తక్కువగానే ఎదురయ్యాయని గుర్తుచేశారు. ఆకలి నుంచి ప్రారంభమైన ఈ స్నేహం, విజయాల దాకా కొనసాగడం నిజంగా అరుదైన ఉదాహరణగా నిలుస్తోంది.