అజిత్ కొత్త సినిమాపై క్లారిటీ.. షూటింగ్‌కు గ్రీన్ సిగ్నల్

అజిత్ కుమార్(Ajith Kumar) తర్వాతి సినిమా కోసం నెలలుగా ఎదురుచూస్తున్న ఫ్యాన్స్ కు ఎట్టకేలకు స్పష్టమైన సంకేతాలు కనిపిస్తున్నాయి. గత కొంతకాలంగా ఈ ప్రాజెక్ట్‌పై అనేక ఊహాగానాలు వినిపించినప్పటికీ, ఇప్పుడు డైరెక్ట‌ర్ అధిక్ రవిచంద్రన్(Adhik Ravichandran) చేసిన తాజా కామెంట్స్ సినిమాపై కొత్త ఉత్సాహాన్ని తీసుకొచ్చాయి. ఇప్పటికే ప్రీప్రొడక్షన్ పనులన్నీ పూర్తయ్యాయని, ఆగస్టులో అఫీషియ‌ల్ అనౌన్స్‌మెంట్ వ‌చ్చే అవకాశాలున్నాయని ఆయన వెల్లడించడంతో ప్రాజెక్ట్ మళ్లీ వేగం అందుకున్నట్లు సినీ వర్గాలు భావిస్తున్నాయి. అనౌన్స్‌మెంట్ వచ్చిన వెంటనే రెగ్యులర్ షూటింగ్ ప్రారంభమయ్యే అవకాశం ఉందనే సమాచారం అభిమానుల్లో ఆసక్తిని మరింత పెంచుతోంది.

గుడ్ బ్యాడ్ అగ్లీ(Good Bad Ugly) తర్వాత అజిత్- అధిక్ కాంబినేషన్ మళ్లీ రిపీట్ అవుతుండటంతో ఈ సినిమాపై మొదటి నుంచే భారీ అంచనాలు ఏర్పడ్డాయి. అయితే మధ్యలో నిర్మాణ సంస్థ మార్పు, షూటింగ్ ఆలస్యం, డైరెక్ట‌ర్ ఛేంజ్ లాంటి అనేక ప్రచారాలు సోషల్ మీడియాలో చక్కర్లు కొట్టాయి. దీంతో ప్రాజెక్ట్ భవితవ్యంపై సందేహాలు వ్యక్తమయ్యాయి. కానీ అఫీషియ‌ల్ వర్గాలు అప్పుడే ఆ ప్రచారాలను ఖండించగా, ఇప్పుడు డైరెక్ట‌ర్ తాజా అనౌన్స్‌మెంట్ తో అన్ని సందేహాలకు దాదాపు తెరపడినట్లైంది. దీంతో ఈ సినిమా ప్లాన్ ప్రకారమే ముందుకు సాగుతోందనే నమ్మకం అభిమానుల్లో బలపడుతోంది.

మరోవైపు అజిత్ గత కొంతకాలంగా ఇంట‌ర్నేష‌న‌ల్ మోటార్‌స్పోర్ట్స్‌పై ఎక్కువ ఫోక‌స్ పెట్ట‌డంతో కొత్త సినిమా మొద‌ల‌వ‌డం లేటైంది. అయినప్పటికీ ఇప్పుడు అన్ని ఏర్పాట్లు పూర్తికావడంతో ఆయన పూర్తిగా సినిమా షూటింగ్‌పై ఫోకస్ పెట్టనున్నట్లు తెలుస్తోంది. దీంతో 2026లో అత్యంత ఆసక్తిగా ఎదురుచూస్తున్న కోలీవుడ్ సినిమాల్లో ఈ ప్రాజెక్ట్ ఒకటిగా నిలిచే సూచనలు కనిపిస్తున్నాయి.