అంతా బాగుంది.. బీసీసీఐ కవరింగ్..!
- Published By: techteam
- July 20, 2026 / 12:35 PM IST
ఇంగ్లండ్తో లార్డ్స్ మైదానంలో జరిగిన ఉత్కంఠభరిత మూడో వన్డే మ్యాచ్లో టీమిండియా 27 పరుగుల తేడాతో ఓటమిపాలైంది. దీంతో మూడు మ్యాచ్ల వన్డే సిరీస్ను భారత్ 1-2 తేడాతో ఇంగ్లండ్కు చేజార్చుకుంది. అయితే, సిరీస్ ఓడిపోయినప్పటికీ జట్టు కాంబినేషన్ అద్భుతంగా ఉందని, ఆందోళన చెందాల్సిన పనిలేదని బీసీసీఐ(BCCI) వైస్ ప్రెసిడెంట్ రాజీవ్ శుక్లా కీలక వ్యాఖ్యలు చేశారు. ఈ మ్యాచ్లో ఇంగ్లండ్ భారీ స్కోరు సాధించినప్పటికీ, భారత బ్యాటర్లు అద్భుతంగా పోరాడారని రాజీవ్ శుక్లా కొనియాడారు.
ముఖ్యంగా సీనియర్లు రోహిత్ శర్మ(Rohit Sharma), విరాట్ కోహ్లీలు(Virat Kohli) తమ క్లాస్ ఆటతీరుతో జట్టును విజయతీరాలకు చేర్చేందుకు శ్రమించారని ప్రశంసించారు. రోహిత్ శర్మ శతకంతో కదం తొక్కగా, విరాట్ కోహ్లీ, శుభ్మన్ గిల్లు కీలక ఇన్నింగ్స్లతో రాణించారని ఆయన గుర్తుచేశారు. టాస్ ఓడి మొదట బ్యాటింగ్ చేసిన ఇంగ్లండ్ జట్టు.. బెన్ డకెట్, జాకబ్ బెథెల్, జో రూట్ లతో పాటు చివర్లో జోస్ బట్లర్ మెరుపు ఇన్నింగ్స్ ఆడటంతో లార్డ్స్లో రికార్డు స్థాయిలో 387/3 పరుగుల భారీ స్కోరు చేసింది. భారత బౌలర్లు చివరి 3 ఓవర్లలోనే ఏకంగా 62 పరుగులు సమర్పించుకున్నారని, అదే మ్యాచ్ ఫలితాన్ని శాసించిందని శుక్లా విశ్లేషించారు.
ఆ లోపాన్ని పక్కన పెడితే భారత జట్టు ఆటతీరు, టీమ్ కాంబినేషన్ అన్నీ బాగున్నాయని ఆయన స్పష్టం చేశారు. భారీ లక్ష్య ఛేదనలో రోహిత్ శర్మ (138 పరుగులు) అద్భుతమైన ఇన్నింగ్స్తో ఆకట్టుకుని, లార్డ్స్ మైదానంలో వన్డే సెంచరీ చేసిన మొదటి భారతీయ బ్యాటర్గా రికార్డు సృష్టించాడు. విరాట్ కోహ్లీ (74), శుభ్మన్ గిల్ (77)లు రాణించడంతో ఒక దశలో భారత్ 304/2తో బలమైన స్థితిలో నిలిచింది. కానీ చివరలో ఇంగ్లండ్ బౌలర్ సామ్ కరన్ 4 వికెట్లతో చెలరేగడంతో మిడిలార్డర్ కుప్పకూలి, భారత్ నిర్ణీత 50 ఓవర్లలో 360/7 పరుగులకే పరిమితమై ఓటమిని చవిచూడాల్సి వచ్చింది.
ఇవి కూడా చదవండి
