క్రెడిట్ కార్డు హోల్డర్ చనిపోతే ఆ బిల్లు ఎవరు కట్టాలి? కుటుంబ సభ్యులా?

—సూర్య ప్రకాష్ జోశ్యుల

ఇంట్లో ఒక కీలక వ్యక్తి అకస్మాత్తుగా మరణిస్తే …ఆ తర్వాత కుటుంబ సభ్యులు ఎదుర్కొనే సమస్యలు ఎన్నో ఉంటాయి.ఆస్దులు, బ్యాంకు ఖాతాలు, అప్పులు, బీమా పాలసీలు, ఆస్తులు… ఒక్కొక్కటిగా చూసుకోవాల్సి వస్తుంది. పరిష్కరించుకోవాల్సి వస్తుంది. ఇలాంటి సమయంలో చాలామందిని వెంటాడే మరో ప్రశ్న ఉంది. ఆ వ్యక్తి దగ్గర క్రెడిట్ కార్డు ఉంటే, దానిపై ఉన్న బకాయి సంగతి ఏమిటి? ఆ బిల్లు భారాన్ని కుటుంబ సభ్యులు భరించాల్సి వస్తుందా?

ఈ సందేహం రావడానికి కారణం కూడా ఉంది. క్రెడిట్ కార్డు అంటే ముందుగా ఖర్చు చేసి, తర్వాత డబ్బు చెల్లించే వ్యవస్థ. ఒకవేళ కార్డు హోల్డర్ బిల్లు చెల్లించేలోపే మరణిస్తే, బ్యాంకుకు రావాల్సిన ఆ డబ్బును ఎవరి నుంచి వసూలు చేస్తారు? భార్య, పిల్లలు లేదా ఇతర కుటుంబ సభ్యులు ఇలా ఎవరిపై బ్యాంకు ఆ బాధ్యతను వేస్తుంది?

బకాయి వసూలు ఎలా జరుగుతుంది?

క్రెడిట్ కార్డు హోల్డర్ మరణించిన తర్వాత, బ్యాంకు సాధారణంగా ఆ వ్యక్తి ఎస్టేట్ లేదా ఆయన పేరు మీద మిగిలిన ఆస్తుల నుంచి బకాయిని రికవరీ చేసే ప్రక్రియను చేపడుతుంది. పెట్టుబడులు, బ్యాంకు డిపాజిట్లు లేదా ఇతర ఆర్థిక ఆస్తులు ఉంటే, చట్టపరమైన నిబంధనలకు అనుగుణంగా వాటి నుంచి బకాయిని సర్దుబాటు చేసే అవకాశం కోసం వెతుకుతుంది.

ఒకవేళ మరణించిన వ్యక్తి పేరు మీద ఉన్న ఆస్తుల విలువ మొత్తం క్రెడిట్ కార్డు బకాయి కంటే తక్కువగా ఉంటే, మిగిలిన మొత్తాన్ని బ్యాంకు పూర్తిగా రికవర్ చేయలేకపోవచ్చు. అటువంటి సందర్భాల్లో ఆ మొత్తాన్ని నష్టంగా పరిగణించే అవకాశం ఉంటుంది.

అయితే ఇక్కడ ఒక విషయం గుర్తుంచుకోవాలి. జాయింట్ కార్డు హోల్డర్, కో-బారోయర్, గ్యారంటీ లేదా ఇతర ప్రత్యేక ఒప్పందాలు ఉన్నట్లయితే పరిస్థితి మారవచ్చు. అందువల్ల ప్రతి కేసును దాని ఒప్పందాలు, చట్టపరమైన పరిస్థితుల ఆధారంగా పరిశీలించాల్సి ఉంటుంది.

అంతేకానీ కేవలం కుటుంబ సభ్యులు అయినందుకు మాత్రమే మరణించిన వ్యక్తి క్రెడిట్ కార్డు బకాయిని తమ సొంత డబ్బుతో చెల్లించాల్సిన బాధ్యత వారికి ఉండదు. అయితే, మరణించిన వ్యక్తి వదిలి వెళ్లిన ఆస్తులు, పెట్టుబడులు మరియు ఇతర ఆర్థిక ఆస్తుల విషయంలో పరిస్థితి వేరుగా ఉండవచ్చు.

అసలు క్రెడిట్ కార్డు లిమిట్‌ను బ్యాంకులు ఎలా నిర్ణయిస్తాయి?

అలాగే క్రెడిట్ కార్డు ఇచ్చే సమయంలో బ్యాంకులు కూడా వ్యక్తి ఆర్థిక సామర్థ్యాన్ని పూర్తిగా పరిశీలిస్తాయి. నెలవారీ జీతం ఎంత, ఉద్యోగం ఎంత స్థిరంగా ఉంది, గతంలో తీసుకున్న రుణాలు లేదా క్రెడిట్ కార్డు బిల్లులను సకాలంలో చెల్లించారా వంటి అంశాలను చూస్తాయి.

వ్యక్తి క్రెడిట్ స్కోర్ కూడా ఇందులో కీలక పాత్ర పోషిస్తుంది. గతంలో రుణాలను, బిల్లులను సకాలంలో చెల్లించిన మంచి రికార్డు ఉంటే క్రెడిట్ స్కోర్ మెరుగ్గా ఉంటుంది. అలాంటి వారికి ఎక్కువ క్రెడిట్ లిమిట్ వచ్చే అవకాశం ఉంటుంది.

అంతేకాకుండా, వ్యక్తి ఖర్చు చేసే విధానం, క్రెడిట్‌ను ఎంత బాధ్యతగా ఉపయోగిస్తున్నారనే అంశాలను కూడా ఆర్థిక సంస్థలు పరిగణనలోకి తీసుకుంటాయి. సకాలంలో బిల్లులు చెల్లిస్తూ మంచి ఆర్థిక క్రమశిక్షణ చూపిస్తే, భవిష్యత్తులో మెరుగైన క్రెడిట్ లిమిట్ పొందే అవకాశం ఉంటుంది.

ఏదైమైనా…

క్రెడిట్ కార్డు హోల్డర్ మరణించిన తర్వాత బకాయి విషయంలో కుటుంబ సభ్యులు భయపడాల్సిన అవసరం లేదనే భావన ఉన్నప్పటికీ, ఆ వ్యక్తి వదిలి వెళ్లిన ఆస్తులు, వారసత్వం, జాయింట్ బాధ్యతలు వంటి అంశాలను బట్టి నిబంధనలు మారవచ్చు. అందువల్ల ఇలాంటి పరిస్థితి ఎదురైతే సంబంధిత బ్యాంకును సంప్రదించి, ఖాతా , క్రెడిట్ కార్డు ఒప్పందానికి సంబంధించిన పూర్తి వివరాలు తెలుసుకోవడం మంచిది.

గమనిక: ఈ సమాచారం సాధారణ నిబంధనల ఆధారంగా ఇవ్వబడింది. వారసత్వ చట్టాలు, జాయింట్ కార్డు హోల్డర్లు, బీమా లేదా బ్యాంకుతో ఉన్న ప్రత్యేక ఒప్పందాల ఆధారంగా పరిస్థితులు మారవచ్చు.