కేంద్ర కేబినెట్ విస్తరణలో తెలంగాణ నుంచి చోటెవరికి?

ప్రధానమంత్రి నరేంద్ర మోడీ నేతృత్వంలోని కేంద్ర మంత్రివర్గ విస్తరణపై జాతీయ రాజకీయాల్లో ఊహాగానాలు జోరందుకున్నాయి. వచ్చే నెల మొదటి వారంలోనే కేబినెట్ పునర్వ్యవస్థీకరణ అవకాశం ఉందన్న సంకేతాలు ఢిల్లీ వర్గాల నుంచి బలంగా వినిపిస్తున్నాయి. రానున్న రోజుల్లో జరగనున్న 5 రాష్ట్రాల శాసనసభ ఎన్నికలు, ఇటీవలి కాలంలో ఎన్డీయే కూటమిలోకి కొత్తగా చేరిన మిత్రపక్షాలకు చోటు కల్పించడమే లక్ష్యంగా ఈ భారీ కసరత్తు జరుగుతోంది. ఈ నేపథ్యంలో తెలంగాణ రాష్ట్రం నుంచి కేంద్ర మంత్రివర్గంలో స్థానం కోసం తీవ్రమైన పోటీ నెలకొంది.

దక్షిణాదిలో కర్ణాటక తర్వాత బీజేపీకి అత్యంత పట్టున్న రాష్ట్రంగా ఉన్న తెలంగాణలో పార్టీని మరింత బలోపేతం చేయడమే లక్ష్యంగా అధిష్టానం అడుగులు వేస్తోంది. ప్రస్తుతం రాష్ట్ర రాజకీయాల్లో సామాజిక సమీకరణాలు, ప్రాంతీయ ప్రాబల్యం అత్యంత కీలకంగా మారాయి. ఈ క్రమంలో కేంద్ర కేబినెట్‌లో రాష్ట్రానికి అదనపు బెర్తులు కేటాయించడం ద్వారా రాష్ట్రంలో పార్టీ కేడర్‌కు కొత్త ఊపునివ్వాలని అధిష్ఠానం భావిస్తోంది.

తెలంగాణ నుంచి పలువురు సీనియర్ నేతలు, కీలక ఎంపీలు కేంద్ర మంత్రి పదవుల రేసులో నిలిచారు. మల్కాజిగిరి ఎంపీ ఈటల రాజేందర్ తన బలమైన బీసీ నాయకత్వంతో పాటు రాష్ట్ర రాజకీయాల్లో తనకున్న పట్టుతో రేసులో ముందున్నారు. మెదక్ ఎంపీ రఘునందన్ రావు, నిజామాబాద్ ఎంపీ ధర్మపురి అర్వింద్ కూడా తీవ్రంగా ప్రయత్నాలు సాగిస్తున్నారు. ఆదిలాబాద్ ఎంపీ గోడం నగేష్ పేరును ఎస్టీ సామాజిక సమీకరణాల్లో భాగంగా పరిశీలిస్తున్నారు. ఉమ్మడి ఆదిలాబాద్‌తో పాటు ఉత్తర తెలంగాణ గిరిజన ప్రాంతాల్లో బీజేపీని తిరుగులేని శక్తిగా మార్చేందుకు ఆయనకు కేబినెట్ లేదా సహాయ మంత్రి హోదా కల్పించే యోచన ఉంది.

అయితే ఢిల్లీ వర్గాల సమాచారం ప్రకారం, మహబూబ్‌నగర్ ఎంపీ డీకే అరుణకు కేంద్ర కేబినెట్‌లో చోటు దాదాపు ఖాయమైనట్లు ప్రచారం జరుగుతోంది. మహిళా సాధికారతతో పాటు దక్షిణ తెలంగాణలో కాంగ్రెస్‌కు దీటుగా బలమైన మహిళా నాయకత్వాన్ని నిలబెట్టాలన్నది అధిష్టానం వ్యూహం. జాతీయ ఉపాధ్యక్షురాలిగా, ఎంపీగా ఆమె చేసిన సేవలను పరిగణనలోకి తీసుకుని మహిళా కోటా కింద ఆమెకు మంత్రి పదవి దక్కే అవకాశాలు స్పష్టంగా కనిపిస్తున్నాయి. మరోవైపు రాజ్యసభ సభ్యుడిగా కొనసాగుతున్న సీనియర్ నేత డాక్టర్ కె. లక్ష్మణ్ పేరు కూడా ప్రముఖంగా పరిశీలనలో ఉంది. ఒకవేళ ఎస్సీ,ఎస్టీ కోటాలో భర్తీ చేయాలనుకుంటే ఆదిలాబాద్ ఎంపీ నగేష్ కు చోటు దక్కే ఛాన్స్ ఉంది. జాతీయ కార్యవర్గ పునర్వ్యవస్థీకరణ నేపథ్యంలో, బలమైన బీసీ ఓటు బ్యాంకును ఆకర్షించేందుకు ఆయనకు మంత్రిమండలిలో చోటు కల్పించే అవకాశాలను తోసిపుచ్చలేమని పార్టీ శ్రేణులు భావిస్తున్నాయి.

ఈసారి విస్తరణ కేవలం రాజకీయ సర్దుబాటు కాకుండా పూర్తి స్థాయి వ్యూహాత్మక అడుగుగా మారనుంది. మహిళలు, బీసీ, ఎస్టీ వర్గాలకు కేబినెట్ ప్రాతినిధ్యం కల్పించి సామాజిక న్యాయం నినాదాన్ని ప్రజల్లోకి తీసుకెళ్లాలని బీజేపీ భావిస్తోంది. 5 రాష్ట్రాల అసెంబ్లీ ఎన్నికలతో పాటు భవిష్యత్ సార్వత్రిక ఎన్నికలకు బలమైన పునాది నిర్మించాలనుకుంటోంది. కూటమి విస్తరణలో భాగంగా కొత్త మిత్రులకు కేబినెట్ బెర్తులు కేటాయించడం ద్వారా భవిష్యత్తుకు బాటలు పరుచుకుంటోంది.

త్వరలో మోడీ కేబినెట్ ముఖచిత్రం మారనున్న వేళ, తెలంగాణకు చెందిన ఏయే నేతలకు మంత్రి పదవులు దక్కుతాయనేది సర్వత్రా ఆసక్తి రేపుతోంది. అధిష్ఠానం తీసుకునే తుది నిర్ణయం రాష్ట్ర రాజకీయాల్లో పెను మార్పులకు నాంది పలికే అవకాశం ఉంది.