భార్య కేసు పెడితే వెంటనే ఏం చేయాలి? ఏం చేయకూడదు?

రాత్రి 10 గంటలు. ఇంట్లో అందరూ నిద్రకు సిద్ధమవుతున్నారు. అప్పుడే మీ ఫోన్ మోగుతుంది. అవతలి వ్యక్తి పోలీస్ అధికారి. “మీ మీద కేసు నమోదైంది. రేపు స్టేషన్‌కు రావాలి” అంటాడు. ఒక్కసారిగా గుండె వేగంగా కొట్టుకోవడం మొదలవుతుంది. ఏం జరిగింది? ఎవరు కేసు పెట్టారు? ఏం ఆరోపణలు చేశారు? అని ఆలోచిస్తుండగానే భార్య గుర్తొస్తుంది.

కొద్దిసేపటి క్రితం వరకూ ఆమెతో జరిగిన గొడవ గుర్తొస్తుంది. వెంటనే ఆమెకు ఫోన్ చేయాలనిపిస్తుంది. “నాపై కేసు ఎందుకు పెట్టావు?” అని నిలదీయాలనిపిస్తుంది. ఇంకా కోపం పెరిగితే ఆమె ఇంటికి వెళ్లి అరవాలనిపించవచ్చు. కానీ ఆ క్షణంలో మీరు చేసే ఒక చిన్న తప్పు.. రేపు కోర్టులో మీకే పెద్ద సమస్యగా మారొచ్చని మర్చిపోతాము.

వైవాహిక వివాదం పోలీస్ కేసుగా మారినప్పుడు చాలామంది పురుషులు ముందుగా న్యాయపరమైన మార్గం గురించి ఆలోచించరు. భయపడతారు. కోపంతో స్పందిస్తారు. భార్యకు వరుసగా ఫోన్లు చేస్తారు. మెసేజీలు పంపుతారు. సోషల్ మీడియాలో పోస్టులు పెడతారు. ఆస్తులను బంధువుల పేర్లకు మార్చాలని చూస్తారు. చివరకు సమస్యను పరిష్కరించాల్సింది పోయి.. తమ చేతులతోనే కేసును మరింత క్లిష్టం చేసుకుంటారు.

అందుకే భార్య కేసు పెట్టిందని తెలిసిన క్షణం నుంచి ఏం చేయాలి? ఏం చేయకూడదు? అనేది ప్రతి భర్త తెలుసుకోవాల్సిన విషయం.

మొదటి పని.. న్యాయవాదిని సంప్రదించాలి

కేసు నమోదైందని తెలిసిన వెంటనే వైవాహిక కేసుల్లో అనుభవం ఉన్న న్యాయవాదిని సంప్రదించాలి. మీపై ఏ సెక్షన్ల కింద కేసు పెట్టారు? ఎఫ్‌ఐఆర్‌లో అసలు ఆరోపణలు ఏమిటి? అరెస్టు చేసే అవకాశం ఉందా? ముందస్తు బెయిల్ అవసరమా? ఉన్నత న్యాయస్థానంలో ఎఫ్‌ఐఆర్‌ను రద్దు చేయించే అవకాశం ఉందా? వంటి విషయాలను న్యాయవాదితో పరిశీలించాలి.

కేసు తీవ్రత తెలియకుండానే పోలీస్ స్టేషన్‌కు వెళ్లడం, భార్యతో నేరుగా వాదించడం కంటే ముందుగా చట్టపరమైన పరిస్థితిని అర్థం చేసుకోవడం మంచిది.

మీ ఫోన్‌.. మీకు తెలియని సాక్ష్యం కావచ్చు

భార్యతో జరిగిన సంభాషణలు, వాట్సాప్ చాట్స్, ఈమెయిల్స్, మెసేజీలు, కాల్ వివరాలు, ఫొటోలు, వీడియోలు, సోషల్ మీడియా పోస్టులు వంటి ఆధారాలను భద్రపరచాలి. ముఖ్యంగా మీపై వచ్చిన ఆరోపణలకు విరుద్ధంగా ఉన్న సమాచారాన్ని తొలగించకుండా ఉంచాలి.

అయితే ఆధారాలను తయారు చేయడం లేదా మార్చడం మాత్రం చేయకూడదు. నిజంగా ఉన్న సమాచారాన్ని భద్రపరచడం వేరు.. తర్వాత ఉపయోగపడుతుందని తప్పుడు ఆధారాలు సృష్టించడం వేరు.

ఆ ఒక్క ఫోన్ కాల్ మీ కేసును మార్చొచ్చు

కేసు పెట్టిందనే కోపంతో భార్యకు ఫోన్ చేసి తిట్టడం, బెదిరించడం, “కేసు వెనక్కి తీసుకోకపోతే చూస్తా” అని చెప్పడం చాలా ప్రమాదకరం. పదేపదే ఆమె ఇంటికి వెళ్లడం కూడా చేయకూడదు. ఆత్మహత్య చేసుకుంటానని లేదా తనకు తాను హాని చేసుకుంటానని బెదిరించకూడదు.

అలాగే భార్య లేదా ఆమె కుటుంబంపై సోషల్ మీడియాలో ఆరోపణలు చేస్తూ పోస్టులు పెట్టకూడదు. మీకు అన్యాయం జరిగిందని అనిపించినా.. దానికి సమాధానం కోపంతో కాదు, చట్టపరమైన మార్గంలో ఇవ్వాలి.

ఆస్తులను దాచొద్దు

కేసు పడిన వెంటనే భయంతో ఆస్తులు అమ్మేయడం, బంధువుల పేర్లకు బదిలీ చేయడం, డబ్బును దాచడం వంటి ప్రయత్నాలు చేయకూడదు. మీ ఆస్తులు, ఆదాయం, అప్పులు, ఇతర ఆర్థిక బాధ్యతల గురించి న్యాయవాదికి పూర్తి వివరాలు చెప్పాలి. ఆ తర్వాత చట్టబద్ధంగా ఏం చేయాలో నిర్ణయించుకోవాలి.

“ఎంత డబ్బైనా ఇచ్చి బయటపడదాం” అనుకోవద్దు

కేసులు మొదలైన తర్వాత చాలామంది పురుషులకు ఒకే ఆలోచన వస్తుంది. “ఏదో ఒక మొత్తం ఇచ్చి ఈ సమస్యను ముగించేద్దాం.” కానీ ఆవేశంలో లేదా భయంతో సెటిల్‌మెంట్‌కు అంగీకరించడం మంచిది కాదు.

ఒకేసారి పెద్ద మొత్తాన్ని చెల్లించి సమస్యను ముగించడమా? లేక నెలవారీ భరణం చెల్లించడమా? అనే నిర్ణయం తీసుకునేటప్పుడు మీ ఆదాయం, ఆస్తులు, అప్పులు, పిల్లల భవిష్యత్తు, కుటుంబ బాధ్యతలు, రిటైర్మెంట్ అవసరాలు వంటి అంశాలన్నింటినీ లెక్కలోకి తీసుకోవాలి.

కేసు పడింది అంటే జీవితం అయిపోయిందని కాదు

భార్య కేసు పెట్టిందని తెలిసిన క్షణంలో భయం రావచ్చు. కోపం రావచ్చు. అవమానంగా అనిపించొచ్చు. కానీ అదే సమయంలో తీసుకునే నిర్ణయాలే తర్వాతి పరిస్థితిని నిర్ణయించవచ్చు.

అందుకే మొదటి రూల్ చాలా సింపుల్‌: ఆవేశంతో ఒక్క అడుగు కూడా వేయొద్దు. భార్యను బెదిరించొద్దు. సోషల్ మీడియాలో పోస్టులు పెట్టొద్దు. ఆధారాలు నాశనం చేయొద్దు. ఆస్తులు దాచొద్దు. భయంతో సెటిల్‌మెంట్‌కు ఒప్పుకోవద్దు.

ముందుగా న్యాయవాదిని కలవండి. జరిగిన ప్రతిదాన్ని నిజాయితీగా చెప్పండి. మీ దగ్గర ఉన్న ఆధారాలను భద్రపరచండి. తర్వాత ప్రతి అడుగూ చట్టపరమైన సలహాతో వేయండి.

ఎందుకంటే.. కేసు పెట్టిన రోజు కోర్టులో విచారణ మొదలవకపోయినా, మీ ప్రతి మాటకు అప్పుడే సాక్ష్యం మొదలవుతుంది.

—సూర్య ప్రకాష్ జోశ్యుల