ఏసీ ఖర్చును తగ్గిస్తున్న ‘Ice Battery’.. ఎలా పనిచేస్తుందంటే?

–సూర్య ప్రకాష్ జోశ్యుల

వేసవి వచ్చిందంటే ఇంట్లో ఏసీ ఎక్కువసేపు తిరుగుతుంది. ఆఫీసులు, మాల్స్, హోటళ్లు, పెద్ద భవనాల్లో పరిస్థితి ఇంకా ఎక్కువ. బయట ఎండ పెరిగే కొద్దీ ఏసీలు ఎక్కువగా పనిచేయాలి. దాంతో కరెంట్ వినియోగం ఒక్కసారిగా పెరిగిపోతుంది.

ఇప్పుడు ఇదే సమస్యకు ఓ ఆసక్తికరమైన పరిష్కారాన్ని అమెరికాలోని న్యూయార్క్‌లో ఉపయోగిస్తున్నారు. కరెంట్‌ను బ్యాటరీలో దాచడం కాదు.. ముందుగానే మంచుగా తయారు చేసి పెట్టుకుంటున్నారు! దీనినే ‘Ice Battery’ అంటున్నారు.

ఇంతకీ ఇది ఎలా పనిచేస్తుంది?

చాలా సింపుల్‌గా చెప్పాలంటే.. మనం ఇంట్లో ఫ్రిజ్‌లో నీళ్ల బాటిల్ పెట్టి చల్లబరుచుకున్నట్టే అనుకోండి. కానీ ఇక్కడ చిన్న బాటిల్ కాదు. పెద్ద భవనాలకు సరిపడేంత పెద్ద ట్యాంకుల్లో నీటిని ఉంచుతారు. రాత్రి సమయంలో కరెంట్ వినియోగం తక్కువగా ఉన్నప్పుడు, ఈ వ్యవస్థ ఆ విద్యుత్‌ను ఉపయోగించి ఆ నీటిని మంచుగా మారుస్తుంది. అంటే రాత్రి చౌకగా లభించే కరెంట్‌తో ముందుగానే చలిని తయారు చేసి పెట్టుకుంటారు. ఇప్పుడు అసలు పని పగటిపూట మొదలవుతుంది.

పగలు ఏసీకి ఈ మంచు ఎలా ఉపయోగపడుతుంది?

మధ్యాహ్నం ఎండ మండిపోతుంది. భవనంలో ఏసీల అవసరం పెరుగుతుంది. అప్పుడు రాత్రి తయారు చేసి పెట్టుకున్న మంచును ఉపయోగిస్తారు. ఆ మంచుని చల్లటి నీటిగా మార్చుతారు. ఈ చల్లటి నీటిని భవనం కూలింగ్ వ్యవస్థలోకి పంపిస్తారు. దాంతో భవనాన్ని చల్లగా ఉంచడానికి ఏసీ యంత్రాలు అంత ఎక్కువగా పనిచేయాల్సిన అవసరం ఉండదు. ఇదే Ice Battery ఐడియా.

మరి ఇలా చేయడం వల్ల లాభం ఏంటి?

పగటి సమయంలోనే కరెంట్‌కు డిమాండ్ ఎక్కువగా ఉంటుంది. అందరూ ఏసీలు, కూలర్లు, ఇతర పరికరాలు ఒకేసారి వాడితే విద్యుత్ గ్రిడ్‌పై భారీ భారం పడుతుంది. ఐస్ బ్యాటరీ ఆ భారాన్ని తగ్గించడంలో సహాయపడుతుంది. రాత్రి కరెంట్ తక్కువగా అవసరమైన సమయంలో చలిని తయారు చేసి పెట్టుకుంటారు. పగటి సమయంలో దాన్ని ఉపయోగిస్తారు. దాంతో పీక్ అవర్స్‌లో విద్యుత్ వినియోగం తగ్గుతుంది. భవనం నిర్వహించే వారికి కూలింగ్ ఖర్చులు తగ్గే అవకాశం ఉంటుంది. అదే సమయంలో నగర విద్యుత్ వ్యవస్థపై కూడా ఒత్తిడి తగ్గుతుంది.

మరి మన ఇళ్లలో కూడా పెట్టుకోవచ్చా?

ఇది మన ఇంట్లో ఫ్రిజ్ పక్కన పెట్టుకునే చిన్న బ్యాటరీ కాదు. ఇలాంటి వ్యవస్థలు పెద్ద ఆఫీసులు, మాల్స్, హోటళ్లు, ఆసుపత్రులు, డేటా సెంటర్లు వంటి భారీ భవనాలకు ఎక్కువ ఉపయోగపడతాయి. ఎందుకంటే అక్కడ రోజంతా కూలింగ్ అవసరం చాలా ఎక్కువగా ఉంటుంది.

అయితే ఇందులో ఉన్న ఆలోచన మాత్రం చాలా సింపుల్.

విద్యుత్ చౌకగా ఉన్నప్పుడు చలిని తయారు చేసి పెట్టుకోవాలి. విద్యుత్‌కు డిమాండ్ ఎక్కువగా ఉన్నప్పుడు ఆ చలిని ఉపయోగించుకోవాలి. అంటే.. బ్యాటరీలో కరెంట్‌ను దాచినట్టే, Ice Batteryలో చలిని దాచిపెట్టి తర్వాత అవసరమైనప్పుడు వాడతారు.

వేసవిలో ఏసీల వల్ల కరెంట్ డిమాండ్ రోజురోజుకూ పెరుగుతున్న సమయంలో, భవనాలను చల్లగా ఉంచుతూ విద్యుత్ వినియోగాన్ని తెలివిగా నిర్వహించడానికి ఈ విధానం ఉపయోగపడే అవకాశం ఉంది.