రేవంత్ రెడ్డి లక్ష్యంగా కేఏ పాల్ తీవ్ర ఆరోపణలు

ప్రజాశాంతి పార్టీ అధ్యక్షుడు కేఏ పాల్ సంచలన వ్యాఖ్యలతో మరోసారి వార్తల్లో నిలిచారు. ముఖ్యమంత్రి రేవంత్ రెడ్డి, ఆయన కుటుంబసభ్యుల అవినీతిని లక్ష్యంగా చేసుకుంటూ పాల్ సంధించిన విమర్శలు రాష్ట్ర రాజకీయ వర్గాల్లో చర్చనీయాంశంగా మారాయి. రేవంత్ కుటుంబం సాగిస్తున్న అవినీతి అక్రమాలపై అటు న్యాయస్థానాలను ఆశ్రయించడంతో పాటు, ఇటు కేంద్ర దర్యాప్తు సంస్థలు, అగ్ర నాయకత్వానికి కీలక ఆధారాలతో లేఖలు రాశానని పాల్ వెల్లడించారు. ఆ పత్రాలను బయటపెడితే వారం రోజుల్లోగా రేవంత్ రెడ్డి ముఖ్యమంత్రి పీఠం నుంచి దిగిపోవాల్సి వస్తుందని తీవ్ర హెచ్చరికలు జారీ చేశారు.

రాష్ట్ర ప్రభుత్వం ప్రతిష్ఠాత్మకంగా భావిస్తూ ఈ నెల 12, 13, 14 తేదీల్లో నిర్వహించ తలపెట్టిన భారత్ సమ్మిట్ తీవ్ర వివాదాస్పదంగా మారిందని కేఏ పాల్ వ్యాఖ్యానించారు. గత ఏడాది నిర్వహించిన సదస్సు ద్వారా రాష్ట్ర ఖజానాకు గానీ, సామాన్య ప్రజలకు గానీ ఒనగూరిన ప్రయోజనం శూన్యమని ఆయన ఎద్దేవా చేశారు. ప్రజాధనంతో ఆర్భాటంగా నిర్వహించే ఇలాంటి సదస్సులు కేవలం నల్లధనాన్ని తెల్లధనంగా మార్చుకునేందుకు మాత్రమే వేదికలుగా ఉపయోగపడుతున్నాయని ప్రతిపక్షాలు సైతం భావిస్తున్నాయని గుర్తుచేశారు. ఈ నేపథ్యంలో బీఆర్ఎస్, బీజేపీ, సీపీఐ, సీపీఎం సహా అన్ని రాజకీయ పక్షాలు, ప్రజా సంఘాలు ఈ సదస్సును ముక్తకంఠంతో బహిష్కరించాలని పిలుపునిచ్చారు. సదస్సులో కుదిరే ఒప్పందాల పైనా ఆయన ఘాటు హెచ్చరికలు చేశారు. సీఎం రేవంత్ రెడ్డితో కాంట్రాక్టులు కుదుర్చుకునేది అదానీ, అంబానీ లాంటి జాతీయ పారిశ్రామిక దిగ్గజాలైనా లేదా స్థానిక కాంట్రాక్టర్లైనా సరే.. భవిష్యత్తులో ఆ ఒప్పందాలన్నింటినీ రద్దు చేస్తామని స్పష్టం చేశారు.

తనకు బీజేపీ, బీఆర్ఎస్, కాంగ్రెస్ పార్టీలతో ఎలాంటి వ్యక్తిగత వైరం లేదని స్పష్టం చేసిన కేఏ పాల్, కేవలం రేవంత్ రెడ్డి అవినీతి ఆకాశాన్ని తాకడం వల్లే తాను తీవ్రంగా స్పందించాల్సి వస్తోందని చెప్పారు. నవంబర్ 14వ తేదీలోగా రేవంత్ రెడ్డి తన పరిపాలనా తీరును సమూలంగా మార్చుకుని రాష్ట్ర ప్రయోజనాల కోసం పనిచేయాలని, లేనిపక్షంలో కాంగ్రెస్ అగ్రనేత రాహుల్ గాంధీ, గాంధీ కుటుంబం జోక్యం చేసుకుని ఆయన్ను సీఎం పదవి నుంచి వెంటనే తప్పించాలని డిమాండ్ చేశారు. కాంగ్రెస్ పెద్దలు చర్యలు తీసుకోకపోతే ప్రజాక్షేత్రంలో ఆ పార్టీయే తగిన మూల్యం చెల్లించుకోక తప్పదని హెచ్చరించారు.

ముఖ్యమంత్రి రేవంత్ రెడ్డితో పాటు ఆయన సోదరులు, కుటుంబసభ్యుల అవినీతి వ్యవహారాలపై ఇప్పటికే తెలంగాణ హైకోర్టులో పిటిషన్ దాఖలు చేసినట్లు పాల్ తెలిపారు. దీనికితోడు సుప్రీంకోర్టు ప్రధాన న్యాయమూర్తి జస్టిస్ సూర్యకాంత్, ప్రధానమంత్రి నరేంద్ర మోదీ, కేంద్ర హోం మంత్రి అమిత్ షా, సీబీఐలకు సమగ్ర వివరాలతో లేఖలు సమర్పించానని వివరించారు. మరోవైపు ఏఐసీసీ ముఖ్య నేతలు రాహుల్ గాంధీ, కేసీ వేణుగోపాల్, సల్మాన్ ఖుర్షీద్, మల్లు రవిలకు సైతం రేవంత్ అవినీతి చిట్టాను పంపినట్లు పేర్కొన్నారు. ఈ ఫిర్యాదులలోని అంశాలు, నివేదికలు బహిర్గతమైతే రేవంత్ కుర్చీకి ముప్పు తప్పదని నొక్కిచెప్పారు.

మరోవైపు అంతర్జాతీయ పరిణామాలపైనా కేఏ పాల్ స్పందించారు. ప్రపంచవ్యాప్తంగా నిత్యావసరాల ధరలు పెరగడానికి ఇరాన్ యుద్ధం దారితీస్తోందన్నారు. దాన్ని ఆపడానికి శాంతిదూతగా దౌత్యపరమైన ప్రయత్నాలు చేస్తున్నానని, త్వరలోనే స్వదేశానికి చేరుకుని తెలంగాణ ప్రజల హక్కులు, సంక్షేమం కోసం ప్రత్యక్ష పోరాటానికి దిగుతానని స్పష్టం చేశారు.