భారత్ సమ్మిట్: పెట్టుబడుల సదస్సా? పొలిటికల్ ప్లాట్‌ఫామా?
- Published By: Vasishta
- November 12, 2026 / 03:37 PM IST
హైదరాబాద్ మరో ప్రతిష్టాత్మక అంతర్జాతీయ సదస్సుకు సిద్ధమవుతోంది. నవంబర్ 13, 14 తేదీల్లో జరగనున్న ‘భారత్ సమ్మిట్’ ఇప్పుడు రాష్ట్ర సరిహద్దులను దాటి జాతీయ స్థాయిలో రాజకీయ, దౌత్య వర్గాల్లో హాట్ టాపిక్‌గా మారింది. ఒకవైపు రాష్ట్రానికి అంతర్జాతీయ పెట్టుబడులు, సాంకేతిక ప్రగతిని తీసుకురావడానికి ముఖ్యమంత్రి రేవంత్ రెడ్డి ప్రభుత్వం ఈ వేదికను ఉపయోగించుకుంటుందని అధికార వర్గాలు చెబుతున్నాయి. మరోవైపు ఇది కాంగ్రెస్ పార్టీ సిద్ధాంతాల ప్రచార వేదికగా మారిందంటూ ప్రతిపక్షాలు తీవ్ర స్థాయిలో విమర్శలు గుప్పిస్తున్నాయి.
భారత్ సమ్మిట్ చుట్టూ రాజకీయ వేడి రాజుకోవడానికి ప్రధాన కారణం ఏఐసీసీ సీనియర్ నేత, మాజీ విదేశాంగ మంత్రి సల్మాన్ ఖుర్షిద్ చేసిన వ్యాఖ్యలేనని రాజకీయ విశ్లేషకులు భావిస్తున్నారు. స్విట్జర్లాండ్‌లోని దావోస్ సదస్సు తరహాలో హైదరాబాద్‌ను ఒక శాశ్వత అంతర్జాతీయ మేధో కేంద్రంగా తీర్చిదిద్దుతామని ఖుర్షిద్ పేర్కొన్నారు. అయితే ఇదే సమయంలో ప్రస్తుత కేంద్ర ప్రభుత్వ విదేశాంగ విధానాలను పరోక్షంగా ప్రస్తావిస్తూ.. జవహర్‌లాల్ నెహ్రూ అలీన విధానం, ఇందిరా గాంధీ, రాజీవ్ గాంధీ రూపొందించిన రాజనీతి సిద్ధాంతాలతో పాటు, భవిష్యత్ ప్రపంచానికి రాహుల్ గాంధీ అందించే నూతన అంతర్జాతీయ దృక్పథాన్ని ప్రపంచ ప్రతినిధుల ముందుంచే వేదికగా దీనిని నిర్వహిస్తున్నట్లు ఆయన ప్రకటించారు.
ఈ సదస్సులో లోక్‌సభ ప్రతిపక్ష నేత రాహుల్ గాంధీ స్వయంగా పాల్గొంటుండటం, అలాగే శామ్ పిట్రోడా, శశి థరూర్, గుర్దీప్ సప్పల్ వంటి కాంగ్రెస్ పార్టీ కీలక నేతలు దీని రూపకల్పనలో ప్రధాన పాత్ర పోషించడంతో ఈ చర్చ మరింత ముదిరింది. ప్రపంచవ్యాప్తంగా 70కి పైగా దేశాల నుంచి దాదాపు 1,000 మంది ప్రతినిధులు హాజరవుతున్న ఈ సదస్సులో భౌగోళిక రాజకీయాలు, ప్రగతిశీల భావజాలం, ప్రజాస్వామ్య సూత్రాలపై ప్రధానంగా చర్చలు జరగనున్నాయి.
ప్రభుత్వ అధికారిక యంత్రాంగం, ప్రజల పన్నుల సొమ్ముతో నిర్వహించే సదస్సులో ఒక రాజకీయ పార్టీ సిద్ధాంతాలకు, నేతల ఇమేజ్ బిల్డింగ్‌కు ప్రాధాన్యత ఇవ్వడంపై బీజేపీ మండిపడుతోంది. తెలంగాణ ప్రజల నిధులను రాహుల్ గాంధీ అంతర్జాతీయ ప్రచారం కోసం కాంగ్రెస్ ప్రభుత్వం దుర్వినియోగం చేస్తోందని ఎన్డీయే నేతలు ఆరోపిస్తున్నారు. నిజమైన పెట్టుబడుల సదస్సు అయితే పారిశ్రామిక దిగ్గజాలు, కంపెనీల మధ్య ఒప్పందాలు, ఉద్యోగ కల్పనపై చర్చలు జరగాలని, అందుకు భిన్నంగా నెహ్రూ విదేశాంగ విధానంపై ప్రభుత్వ ఖర్చుతో సదస్సులు పెట్టడం ఎంతవరకు సమంజసమని బీజేపీ నేతలు ప్రశ్నిస్తున్నారు. రాష్ట్రంలోని రైతులు, నిరుద్యోగుల సమస్యలను పక్కనబెట్టి, పార్టీ రాజకీయ వ్యూహాలకు ప్రభుత్వ వేదికను వాడుకోవడాన్ని తాము వ్యతిరేకిస్తున్నామని విపక్షాలు స్పష్టం చేస్తున్నాయి.
మరోవైపు.. ప్రతిపక్షాల ఆరోపణలను తెలంగాణ ప్రభుత్వం పూర్తిగా తోసిపుచ్చుతోంది. ఈ సదస్సును సంకుచిత రాజకీయ కోణంలో చూడకూడదని మంత్రి దుద్దిళ్ల శ్రీధర్ బాబు హితవు పలికారు. డిసెంబర్ నెలలో జరగనున్న ‘ఇన్వెస్ట్ తెలంగాణ గ్లోబల్ సమ్మిట్’కు ఈ భారత్ సమ్మిట్ ఒక బలమైన వైజ్ఞానిక, మేధోపరమైన భూమికగా ఉపయోగపడుతుందని ఆయన వివరించారు. కేవలం ఫ్యాక్టరీలు, పెట్టుబడుల ఒప్పందాలే కాకుండా, అంతర్జాతీయ స్థాయి విధాన నిర్ణేతలు, సాంకేతిక నిపుణులు హైదరాబాద్ వేదికగా ఆలోచనలు పంచుకోవడం వల్ల ప్రపంచపటంలో తెలంగాణ బ్రాండ్ ఇమేజ్ మరింత బలపడుతుందని ప్రభుత్వం వాదిస్తోంది. ఇది దీర్ఘకాలంలో రాష్ట్రానికి ఆర్థిక ప్రయోజనాలను చేకూరుస్తుందని అధికార పక్షం ధీమా వ్యక్తం చేస్తోంది.
ఈ పరిణామాలను పక్క రాష్ట్రమైన ఆంధ్రప్రదేశ్‌తో పోల్చి చూస్తే ఆసక్తికరమైన భిన్నత్వం కనిపిస్తోంది. విశాఖపట్నంలో నవంబర్ 12, 13 తేదీల్లో జరుగుతున్న సీఐఐ భాగస్వామ్య సదస్సు పూర్తిగా పారిశ్రామిక రంగాలు, వ్యాపార ఒప్పందాల చుట్టూనే కేంద్రీకృతమై ఉంది. అందుకు భిన్నంగా, హైదరాబాద్‌లో జరుగుతున్న భారత్ సమ్మిట్ ఆర్థిక అంశాలతో పాటు రాజకీయ, సామాజిక-రాజనీతి చర్చలకు వేదికగా నిలుస్తోంది. అంతర్జాతీయ మేధావులు, విధాన నిర్ణేతలు ఒక నగరానికి రావడం వల్ల ప్రపంచ స్థాయిలో గుర్తింపు లభిస్తుందనడంలో సందేహం లేదు. అయితే, పన్ను చెల్లింపుదారుల సొమ్ముతో నిర్వహించే ఇలాంటి భారీ సదస్సుల అసలు లక్ష్యం రాష్ట్రానికి పారిశ్రామిక ప్రగతిని, యువతకు ఉద్యోగ అవకాశాలను తీసుకురావడమే. ఆ ప్రాథమిక లక్ష్యాలు నెరవేరి, క్షేత్రస్థాయిలో ఫలితాలు కనిపించినప్పుడే ఈ సమ్మిట్‌కు నిజమైన సార్థకత చేకూరుతుందని విశ్లేషకులు అభిప్రాయపడుతున్నారు.
