ఏపీ ప్రభుత్వానికి సుప్రీం కోర్ట్ నోటీసులు..!

ఆంధ్రప్రదేశ్‌లో మున్సిపాలిటీలు, మున్సిపల్ కార్పొరేషన్లలో(Municipal Corporation) చుట్టుపక్కల ఉన్న గ్రామ పంచాయతీలను ఏకపక్షంగా విలీనం చేశారంటూ దాఖలైన పిటిషన్లపై సుప్రీంకోర్టులో బుధవారం కీలక విచారణ జరిగింది. నిబంధనలకు విరుద్ధంగా, స్థానిక గ్రామాల అభిప్రాయాలను, పంచాయతీల తీర్మానాలను పరిగణనలోకి తీసుకోకుండా ప్రభుత్వం విలీన ప్రక్రియను చేపట్టిందని పిటిషనర్లు సుప్రీంకోర్టును ఆశ్రయించారు. ఈ పిటిషన్లను పరిశీలించిన అత్యున్నత న్యాయస్థానం.. ఈ వ్యవహారంలో పూర్తి వివరాలతో కౌంటర్ దాఖలు చేయాలంటూ ఆంధ్రప్రదేశ్ ప్రభుత్వానికి అధికారికంగా నోటీసులు జారీ చేసింది.

విచారణ సందర్భంగా విలీన ప్రక్రియను తక్షణమే నిలిపివేయాలని, యథాతథ స్థితిని కొనసాగించేలా మధ్యంతర ఉత్తర్వులు ఇవ్వాలని పిటిషనర్ల తరఫు న్యాయవాదులు కోర్టును అభ్యర్థించారు. అయితే, ప్రస్తుత దశలో ఎలాంటి మధ్యంతర ఉత్తర్వులు (Interim Orders) ఇచ్చేందుకు సుప్రీంకోర్టు నిరాకరించింది. ప్రభుత్వ వివరణ విన్న తర్వాతే ఈ విషయంలో నిర్ణయం తీసుకుంటామని ధర్మాసనం స్పష్టం చేసింది. ఇదే సమయంలో సుప్రీంకోర్టు ఒక కీలకమైన వెసులుబాటు మరియు నిబంధనను విధించింది.

రాష్ట్రంలో మున్సిపాలిటీలలో గ్రామాల విలీన ప్రక్రియలు ఏవైనా జరిగినప్పటికీ.. అవన్నీ కూడా కోర్టు ఇచ్చే తుది తీర్పుకు లోబడే ఉండాలని స్పష్టం చేసింది. అంటే, విచారణ ముగిసిన తర్వాత సుప్రీంకోర్టు ఇచ్చే తుది తీర్పును బట్టి ఆయా గ్రామాలు మున్సిపాలిటీల్లో కొనసాగుతాయా లేదా అనేది ఆధారపడి ఉంటుంది. కాగా, ఇటీవలే రాష్ట్ర హైకోర్టు ఆదేశాల మేరకు ప్రభుత్వం కొన్ని విలీన గ్రామ పంచాయతీల పునర్వ్యవస్థీకరణపై కీలక ఉత్తర్వులు జారీ చేసిన సంగతి తెలిసిందే. ఇప్పుడు ఈ వ్యవహారం సుప్రీంకోర్టు మెట్లు ఎక్కడం, కోర్టు నోటీసులు జారీ చేయడంతో ఏపీ స్థానిక రాజకీయాల్లో మున్సిపల్ విలీనాల అంశం మళ్లీ హాట్ టాపిక్‌గా మారింది.