PhonePe, Google Payలకు ఇక ఫోన్ అవసరం లేదా?
- Published By: Surya Prakash josyula
- October 14, 2026 / 11:56 AM IST
—సూర్య ప్రకాష్ జోశ్యుల
ఉదయం టీ తాగేందుకు వెళ్లినా, షాపింగ్ చేసినా, కిరాణా దుకాణంలో సరుకులు కొన్నా.. వెంటనే ఫోన్ తీసి PhonePe లేదా Google Pay ఓపెన్ చేసి పేమెంట్ చేస్తుంటాం. అయితే, ఇకపై ఈ పనుల కోసం జేబులో నుంచి స్మార్ట్‌ఫోన్ తీయాల్సిన అవసరమే లేని రోజులు రాబోతున్నాయి. కళ్లకు పెట్టుకున్న కళ్లద్దాలతోనే డిజిటల్ చెల్లింపులు చేసే రోజులు వస్తున్నాయి. రిలయన్స్ జియో ప్రదర్శించిన AI స్మార్ట్ గ్లాసెస్ ఇప్పుడు ఇలాంటి ఆసక్తికరమైన చర్చకు తెరతీశాయి.
PhonePe, Google Payలకు పోటీగా AI గ్లాసెస్?
భారతదేశంలో UPI పేమెంట్లు రోజువారీ జీవితంలో భాగమైపోయాయి. చిన్న టీ షాపు నుంచి పెద్ద షాపింగ్ మాల్స్ వరకు PhonePe, Google Pay వంటి యాప్‌లతో చెల్లింపులు చేయడం సాధారణమైంది. ఇప్పుడు ఈ డిజిటల్ చెల్లింపుల విధానాన్ని మరో స్థాయికి తీసుకెళ్లే ప్రయత్నంలో భాగంగా రిలయన్స్ జియో AI స్మార్ట్ గ్లాసెస్‌ను ప్రదర్శించింది. ఈ కళ్లద్దాల ద్వారా UPI చెల్లింపులు చేసే సదుపాయాన్ని అందుబాటులోకి తీసుకురావాలని కంపెనీ భావిస్తోంది.
అయితే, PhonePe లేదా Google Pay యాప్‌లను నేరుగా ఈ గ్లాసెస్‌లో ఉపయోగించవచ్చా? పేమెంట్ చేసేటప్పుడు PIN లేదా ఇతర భద్రతా ధ్రువీకరణ అవసరమవుతుందా? అనే వివరాలు ఇంకా వెల్లడికాలేదు.
రెండు వేరియంట్లు.. మరో ప్రత్యేక ఫీచర్!
జియో ఈ AI స్మార్ట్ గ్లాసెస్‌ను రెండు వేరియంట్లలో తీసుకురావాలని భావిస్తోంది. ఒకటి ఆడియో సదుపాయంతో పనిచేసే మోడల్ కాగా, మరొకటి కెమెరాతో కూడిన మోడల్. వీటిలో లైవ్ వాయిస్ ట్రాన్స్‌లేషన్ ఫీచర్ కూడా ప్రత్యేక ఆకర్షణగా నిలుస్తోంది. అంటే, వేర్వేరు భాషలు మాట్లాడే వ్యక్తుల మధ్య సంభాషణను సులభతరం చేసేందుకు ఈ టెక్నాలజీ ఉపయోగపడుతుంది.
విదేశాలకు వెళ్లినప్పుడు, కొత్త ప్రాంతాల్లో పర్యటించినప్పుడు లేదా మనకు తెలియని భాష మాట్లాడే వ్యక్తులతో సంభాషించాల్సి వచ్చినప్పుడు ఇది ఉపయోగకరంగా ఉండవచ్చు. భారతీయ వినియోగదారులకు అందుబాటు ధరలో వీటిని అందించాలని జియో భావిస్తున్నప్పటికీ, ఖచ్చితమైన ధర, విడుదల తేదీ, పూర్తి ఫీచర్ల వివరాలు ఇంకా తెలియాల్సి ఉంది.
UPI పేమెంట్ల భవిష్యత్తు మారనుందా?
ఇప్పటివరకు డిజిటల్ పేమెంట్ల కోసం స్మార్ట్‌ఫోన్‌పై ఆధారపడుతున్న వినియోగదారులకు AI గ్లాసెస్ మరో మార్గాన్ని అందించే అవకాశం ఉంది. అయితే, ఈ టెక్నాలజీ ఎంత సురక్షితంగా పనిచేస్తుంది? ఇప్పటికే కోట్లాది మంది ఉపయోగిస్తున్న PhonePe, Google Pay వంటి సేవలతో ఇది ఎలా అనుసంధానమవుతుంది? అన్నది కీలకం.
