ఏపీఎండీసీకి కూటమి ప్రభుత్వం భారీ ఊరట..!
- Published By: G Vencatesh
- November 9, 2026 / 01:17 PM IST
ఆంధ్రప్రదేశ్ ఖనిజాభివృద్ధి సంస్థ (APMDC) వ్యాపార విస్తరణకు, మైనింగ్ రంగంలో మరింత పురోగతి సాధించేందుకు వీలుగా కూటమి ప్రభుత్వం ఒక కీలక నిర్ణయం తీసుకుంది. జాతీయ స్థాయిలో జరిగే బొగ్గు గనుల వేలంలో ఏపీఎండీసీ మరింత చురుగ్గా పాల్గొనేందుకు, దూకుడుగా బిడ్డింగ్స్ దాఖలు చేసేందుకు వీలుగా ప్రభుత్వం భారీ ఆర్థిక ఊరటనిచ్చింది. ఈ మేరకు ఏపీఎండీసీకి అదనపు బ్యాంక్ గ్యారెంటీని మంజూరు చేస్తూ ఆర్థిక శాఖ అమరావతి వేదికగా అధికారికంగా జీవో (G.O) జారీ చేసింది.
ప్రభుత్వం తీసుకున్న ఈ తాజా నిర్ణయంతో ఏపీఎండీసీ రుణ గ్యారెంటీ పరిమితి గణనీయంగా పెరిగింది. ఇప్పటివరకు ఉన్న రూ.906.52 కోట్ల రుణ పరిమితిని ఏకంగా రూ.1,021.52 కోట్లకు పెంచుతూ ప్రభుత్వం ఉత్తర్వులు ఇచ్చింది. అంటే సంస్థకు అదనంగా రూ.115 కోట్ల రుణ గ్యారెంటీని ప్రభుత్వం సమకూర్చింది. దీనివల్ల రాబోయే ప్రతిష్టాత్మక కోల్ బ్లాక్ వేలం ప్రక్రియలో పెద్ద మొత్తంలో నిధులను సేకరించడానికి, గనులను దక్కించుకోవడానికి ఏపీఎండీసీకి మార్గం సుగమం కానుంది.
అయితే, ఈ అదనపు ఆర్థిక సదుపాయానికి సంబంధించి ప్రభుత్వం కొన్ని కఠినమైన నిబంధనలను కూడా జీవోలో పొందుపరిచింది. ప్రభుత్వ పూచీకత్తును వాడుకుంటున్నందుకు గాను ఏపీఎండీసీ నిబంధనల ప్రకారం 5 శాతం మొత్తాన్ని గ్యారెంటీ కమిషన్‌గా ప్రభుత్వ ఖజానాకు చెల్లించాల్సి ఉంటుందని స్పష్టం చేసింది. దాంతో పాటు బ్యాంకుల నుంచి తీసుకునే ఈ అదనపు రుణం, దానికి సంబంధించిన వడ్డీ చెల్లింపుల పూర్తి బాధ్యత ఏపీఎండీసీదేనని, ఇందులో ప్రభుత్వానికి ఎలాంటి ఆర్థిక భారం ఉండబోదని జీవోలో స్పష్టంగా పేర్కొంది. ప్రభుత్వ సపోర్ట్ దొరకడంతో జాతీయ బొగ్గు గనుల వేలంలో ఏపీఎండీసీ మరిన్ని మైనింగ్ ప్రాజెక్టులను దక్కించుకునే అవకాశం ఉందని మార్కెట్ వర్గాలు భావిస్తున్నాయి.
