ఆక్వా రైతులకు ఏపీ ప్రభుత్వం బంపర్ ఆఫర్..!

ఆంధ్రప్రదేశ్‌లోని ఆక్వా సాగు రైతులకు చంద్రబాబు నాయుడు నేతృత్వంలోని కూటమి ప్రభుత్వం మరో భారీ శుభవార్త అందించింది. రాష్ట్రంలో ఆక్వా రైతుల ప్రయోజనాలే పరమావధిగా సరికొత్త నిర్ణయాన్ని తీసుకుంది. పెట్టుబడి ఖర్చులు పెరిగి ఇబ్బందులు పడుతున్న ఆక్వా రంగాన్ని ఆదుకునేందుకు, వారికి అందించే నాణ్యమైన విద్యుత్ ధరను యూనిట్‌కు కేవలం రూ.1.50లకే పరిమితం చేస్తూ ప్రభుత్వం సంచలన నిర్ణయం తీసుకుంది. రైతు సంక్షేమమే లక్ష్యంగా ప్రభుత్వం తీసుకున్న ఈ నిర్ణయంపై రాష్ట్రవ్యాప్తంగా హర్షాతిరేకాలు వ్యక్తమవుతున్నాయి.

ఆక్వా రైతులకు రూ.1.50లకే సబ్సిడీ విద్యుత్ అందించే ఈ కీలక నిర్ణయానికి సంబంధించి ఆంధ్రప్రదేశ్ ఇంధన శాఖ (Energy Department) తాజాగా G.O.Rt.No.57ను జారీ చేసింది. ఈ ఉత్తర్వుల ప్రకారం నిర్దేశిత నిబంధనలు కలిగిన ఆక్వా సాగుదారులందరికీ తక్కువ ధరకే కరెంట్ సరఫరా కానుంది. ఈ కొత్త జీవో అమలు ద్వారా రాష్ట్రవ్యాప్తంగా ఉన్న 6,500కు పైగా ఆక్వా ఫారాలకు (Aqua Farms) నేరుగా భారీ ఆర్థిక ప్రయోజనం చేకూరనుంది.

ఆక్వా సాగులో రొయ్యలు, చేపల చెరువులకు వాడే ఏరేటర్ల వల్ల విద్యుత్ బిల్లులు రైతులకు ఒక పెద్ద భారంగా మారాయి. ఇప్పుడు ప్రభుత్వం యూనిట్ ధరను రూ.1.50కి తగ్గించడంతో ఆక్వా రైతులకు ఉత్పత్తి ఖర్చులు గణనీయంగా తగ్గనున్నాయి. ఇది అంతర్జాతీయ మార్కెట్‌లో మన ఆక్వా ఉత్పత్తుల ధరల పోటీని తట్టుకోవడానికి, తద్వారా ఏపీ నుండి రొయ్యలు, చేపల ఎగుమతులను (Exports) మరింత బలోపేతం చేయడానికి ఎంతగానో దోహదపడుతుందని నిపుణులు అంచనా వేస్తున్నారు.