‘ప్రాజెక్ట్ ఉద్వాసన’గురించి విన్నారా? సూపర్ పోగ్రామ్

—సూర్య ప్రకాష్ జోశ్యుల

ఇళ్లల్లో ఏళ్ల తరబడి పూజించిన దేవుళ్ల ఫోటోలు పాడైపోయినా, విగ్రహాలు విరిగిపోయినా ఏం చేయాలో పాలుపోక చాలామంది ఇబ్బంది పడుతుంటారు. పారేయడానికి మనసు రాక చెట్ల కింద పెట్టడమో, గుళ్ల ప్రాంగణాల్లో వదిలేయడమో లేదా నదులు, చెరువుల్లో కలిపేయడమో చేస్తుంటారు. చివరికి అవి మున్సిపల్ చెత్తలో కలిసిపోవడం లేదా పర్యావరణానికి హాని కలిగించడం జరుగుతోంది. ఈ సమస్యకు శాశ్వత, గౌరవప్రదమైన పరిష్కారాన్ని చూపుతూ గ్రేటర్ హైదరాబాద్ మున్సిపల్ కార్పొరేషన్ (GHMC) ‘ప్రాజెక్ట్ ఉద్వాసన’ అనే వినూత్న కార్యక్రమానికి శ్రీకారం చుట్టింది.

ఏమిటీ ప్రాజెక్ట్ ఉద్వాసన?
ధార్మిక భావనలను గౌరవిస్తూనే, పర్యావరణాన్ని కాపాడేందుకు రూపొందించిన ప్రత్యేక వ్యవస్థ ఇది. ఇళ్లలోని పాత దేవుడి ఫోటోలు, విగ్రహాలు, క్యాలెండర్లు, ఇతర పూజా సామగ్రిని సేకరించి, సాంప్రదాయబద్ధంగా ఉద్వాసన పూజ నిర్వహించి, ఆపై శాస్త్రీయంగా రీసైకిల్ చేస్తారు.

అమలు జరుగుతున్న తీరు:

శాస్త్రోక్తంగా వీడ్కోలు: సేకరించిన సామగ్రికి ముందుగా ఆలయంలో అర్చకుల ద్వారా అధికారికంగా ఉద్వాసన పూజ నిర్వహిస్తారు.

వస్తువుల వర్గీకరణ: వాలంటీర్ల బృందాలు ప్రతీ వస్తువును పరిశీలించి గాజు, కాగితం, చెక్క, లోహం, ప్లాస్టిక్, గుడ్డ, ప్లాస్టర్ ఆఫ్ పారిస్ (PoP) వంటి భాగాలుగా విడదీస్తారు.

పునర్వినియోగం & రీసైక్లింగ్: మంచి కండిషన్‌లో ఉన్న ఫోటో ఫ్రేమ్‌లను పేద ప్రజలకు ఉచితంగా ఇస్తారు. మిగిలిన పదార్థాలను గుర్తింపు పొందిన రీసైక్లింగ్ సంస్థలకు అప్పగిస్తారు.

అద్భుత స్పందన – గణనీయమైన పురోగతి:
జూన్ 6న ఒక గుడిలో పైలట్ ప్రాజెక్ట్‌గా ప్రారంభమైన ఈ ఉద్దేశం, స్వల్ప కాలంలోనే నగరవ్యాప్తంగా విస్తరించింది. ఇప్పటివరకు:

4,372 కిలోల పూజా సామగ్రిని సేకరించారు.

ఇందులో 4,000 పైగా ఫోటో ఫ్రేమ్‌లు, దేవుళ్ల చిత్రాలు, 600 కంటే ఎక్కువ విగ్రహాలు ఉన్నాయి.

విస్తరిస్తున్న ప్రాజెక్టు:

GHMC సాధించిన ఈ విజయాన్ని చూసి పక్కనే ఉన్న సైబరాబాద్ మున్సిపల్ కార్పొరేషన్ (CMC) కూడా “డివైన్ వేస్ట్ – దేవోషనల్ కలెక్షన్ డ్రైవ్” పేరుతో ఈ మోడల్‌ను స్వీకరించింది. జులై 18న నిర్వహించిన మొదటి విడతలోనే 783 కిలోల సామగ్రిని సేకరించిన CMC, ఆన్‌లైన్ రిజిస్ట్రేషన్ల ద్వారా ఆగస్టు 22న 16 సర్కిళ్ల వ్యాప్తంగా పెద్ద ఎత్తున ఈ డ్రైవ్ నిర్వహించేందుకు ప్రణాళిక సిద్ధం చేసింది.

భక్తిశ్రద్ధలను కాపాడుతూనే నగరాన్ని పరిశుభ్రంగా ఉంచేందుకు హైదరాబాద్ రూపొందించిన ఈ ‘ఉద్వాసన’ నమూనా, ఇప్పుడు దేశంలోని ఇతర నగరాలకు సైతం మార్గదర్శకంగా నిలుస్తోంది.