అజింక్య రహానే రిటైర్మెంట్. సచిన్ మొదటి ఫోన్ కాల్..!
- Published By: techteam
- August 11, 2026 / 11:37 AM IST
టీమిండియా క్లాసిక్ బ్యాటర్, టెస్ట్ క్రికెట్లో వైస్ కెప్టెన్గా భారత్కు ఎన్నో చిరస్మరణీయ విజయాలు అందించిన అజింక్య రహానే అన్ని రకాల క్రికెట్ ఫార్మాట్లకు రిటైర్మెంట్ ప్రకటిస్తూ సంచలన నిర్ణయం తీసుకున్నారు. ముఖ్యంగా విదేశీ గడ్డపై పేస్, స్వింగ్ పిచ్లపై భారత్ నమ్ముకోదగ్గ నమ్మకమైన ఆటగాడిగా పేరు తెచ్చుకున్న రహానే.. రిటైర్మెంట్ వీడియోను సోషల్ మీడియాలో పోస్ట్ చేసిన తర్వాత తీవ్ర భావోద్వేగానికి గురైనట్లు పేర్కొన్నారు. రహానే తన రిటైర్మెంట్ ప్రకటించిన వెంటనే క్రికెట్ లెజెండ్ సచిన్ టెండూల్కర్ ఆయనకు మొదటి ఫోన్ కాల్ చేశారట.
ఈ సందర్భంగా సచిన్ తన అసంతృప్తిని వ్యక్తం చేస్తూ.. రహానే భారత్ తరపున ఇంకా ఎక్కువ కాలం ఆడాల్సిందని, త్వరగా నిర్ణయం తీసుకున్నావని అన్నట్లు రహానే వెల్లడించారు. దీనికి రహానే స్పందిస్తూ.. “నేను ఎలాంటి అసంతృప్తి, బాధ లేకుండా రిటైర్ అవుతున్నాను. అందుకే ఆటను ఇంకా సాగదీయడం ఇష్టం లేకపోయింది” అని మాస్టర్ బ్లాస్టర్కు బదులిచ్చారు. సచిన్తో పాటు మాజీ క్రికెటర్ ఇర్ఫాన్ పఠాన్ కూడా రహానేకు ఫోన్ చేయగా, ప్రస్తుత టీమిండియా స్టార్స్ విరాట్ కోహ్లీ(Virat Kohli), రోహిత్ శర్మ(Rohit Sharma), జస్ప్రీత్ బుమ్రాలు ఆయనకు ప్రత్యేకంగా టెక్స్ట్ మెసేజ్లు పంపారు.
వారందరికీ కూడా రహానే ఒకే సమాధానం ఇచ్చారట. తానేంటో క్రికెట్ ఆటకు వంద శాతం పూర్తిగా ఇచ్చేశానని, ఈ నిర్ణయంతో తాను చాలా సంతృప్తిగా, ప్రశాంతంగా ఉన్నానని వారితో పంచుకున్నారు. రిటైర్మెంట్ ప్రకటన సమయం నాటి తన మానసిక స్థితిని వివరిస్తూ.. “నా కుటుంబంతో దీనిపై చర్చించేటప్పుడే చాలా ఎమోషనల్ అయ్యాను. ఇక రిటైర్మెంట్ వీడియో రికార్డ్ చేసిన తర్వాత చాలా ఏడ్చాను. ఇన్నేళ్లుగా నా ప్రాణంగా ప్రేమించిన ఆటకు ఇకపై దూరంగా ఉండబోతున్నాననే నిజం నన్ను బాగా కుదిపేసింది” అని రహానే ఆవేదన వ్యక్తం చేశారు. అలాగే కోహ్లీ, పుజారాలతో కలిసి 2015లో 6, 7 స్థానాల్లో ఉన్న భారత టెస్ట్ జట్టును కష్టపడి నంబర్ 1 స్థానానికి చేర్చిన రోజులను ఆయన ఈ సందర్భంగా గుర్తుచేసుకున్నారు.
