ఎల్‌నినో ముప్పుపై ఏపీ ప్రభుత్వం అలెర్ట్.. చంద్రబాబు కీలక ఆదేశాలు..!

‘ఎల్‌నినో'(El nino) వాతావరణ మార్పుల ప్రభావంపై ఆంధ్రప్రదేశ్(Andhra Pradesh) ప్రభుత్వం తీవ్ర అప్రమత్తమైంది. రాష్ట్రంలో రాబోయే రోజుల్లో తలెత్తబోయే నీటి ఎద్దడి, వాతావరణ మార్పులను ఎదుర్కొనేందుకు ముఖ్యమంత్రి చంద్రబాబు నాయుడు(Chandrababu Naidu) ముందస్తు చర్యలు చేపట్టారు. ఎల్‌నినో ప్రభావం వల్ల రాష్ట్రవ్యాప్తంగా సాగు, తాగునీటి సరఫరాకు ఎలాంటి ఇబ్బందులు కలగకుండా చూడాలని అధికారులను ఆదేశించారు. ఇందులో భాగంగా వాతావరణ పరిస్థితులపై పూర్తి అప్రమత్తతతో వ్యవహరించాలని స్పష్టం చేశారు.

ఈ మేరకు రాష్ట్రంలోని పంటల పరిస్థితి, వివిధ జలాశయాల్లో (డ్యామ్‌లలో) ఉన్న నీటి నిల్వల వివరాలపై ఒక సమగ్ర నివేదికను అందజేయాలని ఇరిగేషన్ శాఖను సీఎం చంద్రబాబు ఆదేశించారు. ఏ ఏ రిజర్వాయర్లలో ఎంతెంత నీరు ఉంది? ప్రస్తుత అవసరాలకు అవి ఎలా సరిపోతాయి? అనే విషయాలపై తక్షణమే లెక్కలు తేల్చాలని అధికారులకు సూచించారు. వర్షాభావ పరిస్థితులు ఎదురైనా తట్టుకునేలా ముందస్తు ప్రణాళికలు సిద్ధం చేయాలని పేర్కొన్నారు.

ప్రస్తుత పరిస్థితిని గమనిస్తే.. రాష్ట్రంలోని పలు జిల్లాల్లో ఆశించిన స్థాయిలో వర్షాలు పడకపోవడం వల్ల జలాశయాల్లో నీటి మట్టాలు క్రమంగా తగ్గుముఖం పడుతున్నాయి. దీనివల్ల ఖరీఫ్, రబీ సీజన్ల పంటల సాగుపై ప్రభావం పడే అవకాశం ఉందని నిపుణులు ఆందోళన వ్యక్తం చేస్తున్నారు. కొన్ని ప్రాంతాలలో ఇప్పటికే భూగర్భ జలాలు కూడా అడుగంటుతుండటంతో రైతాంగంలో అప్పుడే ఆందోళన మొదలైంది. ఈ నేపథ్యంలో ప్రభుత్వం తీసుకునే ముందస్తు నిర్ణయాలు అత్యంత కీలకంగా మారాయి.

రైతులకు మరియు సామాన్య ప్రజలకు ఎలాంటి ఇబ్బందులు తలెత్తకుండా తాగునీరు, సాగునీటి సరఫరాపై ప్రత్యేక దృష్టి సారించాలని సీఎం చంద్రబాబు అధికారులకు దిశానిర్దేశం చేశారు. కరవు లేదా వర్షాభావ పరిస్థితులు ఏర్పడితే ప్రత్యామ్నాయ పంటల వైపు రైతులను ప్రోత్సహించాలని, వారికి అవసరమైన విత్తనాలు, ఎరువులను సిద్ధం చేయాలని వ్యవసాయ, నీటిపారుదల శాఖలను ప్రభుత్వం ఆదేశించింది. ఎలాంటి విపత్కర పరిస్థితినైనా ఎదుర్కొనేందుకు యంత్రాంగం సిద్ధంగా ఉండాలని సీఎం స్పష్టం చేశారు.